არაიკ ჰარუთუნიანი და არაღიარებული მთიანი ყარაბაღის სხვა ლიდერები დააკავეს
არღიარებული ლიდერების დაპატიმრებები
აზერბაიჯანში გრძელდება მთიანი ყარაბაღის არაღიარებულ რესპუბლიკის ყოფილი ლიდერების დაკავება. ერთი დღით ადრე დააკავეს ყოფილი ე.წ. პრეზიდენტი არაიიკ ჰარუთუნიანი, არკადი ღუკასიანი, ბაკო საჰაკიანი, ასევე თვითგამოცხადებული რეჟიმის პარლამენტის ყოფილი თავმჯდომარე დავით იშხანიანი. ყველა მათგანს ბრალად ედება ტერორიზმი და მძიმე დანაშაული მშვიდობისა და კაცობრიობის წინააღმდეგ.
არაიკ ჰარუთუნიანს ბრალი აზერბაიჯანის რესპუბლიკის სისხლის სამართლის კოდექსის 9 მუხლით წაუყენეს
აზერბაიჯანის გენერალურმა პროკურატურამ და სახელმწიფო უსაფრთხოების სამსახურმა ერთობლივად ჩატარებული გამოძიების ფარგლებში დააკავეს არაღიარებული ყარაბაღის ყოფილი ლიდერი არაიიკ ჰარუთუნიანი.
„გამოძიება ორიენტირებულია მშვიდობისა და კაცობრიობის წინააღმდეგ ჩადენილი დანაშაულების, ომის დანაშაულების, ტერორიზმის და სხვა დანაშაულებებზე, რომლებიც ჩადენილია არალეგალური სომხური შეიარაღებული ჯგუფების მიერ ყარაბაღში“, – აცხადებენ გენერალურ პროკურატურაში და სახელმწიფო უსაფრთხოების სამსახურში.
განცხადებაში აღნიშნულია, რომ არაიიკ ჰარუთუნიანი, „1973 წელს დაბადებული, წარმოშობით აზერბაიჯანის ქალაქ ხანკენდიდან, მონაწილეობდა აზერბაიჯანის რესპუბლიკის ტერიტორიაზე აგრესიული ომის ორგანიზებაში. დადგინდა, რომ მთიანი ყარაბაღის რესპუბლიკის პრეზიდენტის და მასთან დაკავშირებული სხვა პირები აქტიურად იყვნენ ჩართული დაქირავებულთა რეკრუტირებაში, წვრთნასა და დაფინანსებაში, რომლებიც შემდეგ მონაწილეობდნენ შეიარაღებულ კონფლიქტებში და სამხედრო ოპერაციებში.”
გარდა ამ ბრალდებებისა, ჰარუტიუნიანს ბრალად ედება არასანქცირებული შეიარაღებული ჯგუფების საქმიანობის ორგანიზება და კოორდინაცია, ამ ჯგუფების იარაღით, საბრძოლო მასალითა და სამხედრო ტექნიკით აღჭურვა, იარაღის კონტრაბანდა აზერბაიჯანში და ტერორიზმის ფინანსური მხარდაჭერა.
გარდა ამისა, ჰარუტიუნიანს ბრალი წაუყენეს მჭიდროდ დასახლებულ ქალაქ განჯაში საცხოვრებელი უბნებისა და სამოქალაქო ნაგებობების ბალისტიკური რაკეტებით დაბომბვაში.
ყარაბაღის მეორე ომის დროს განჯაზე 5 სარაკეტო იერიში განხორციელდა, რის შედეგადაც 27 მშვიდობიანი მოქალაქე დაიღუპა და 125 დაშავდა.
ოფიციალური ინფორმაციით, ჰარუთუნიანი სახელმწიფო უსაფრთხოების სამსახურმა ქალაქ ხანკენდში (სტეფანაკერტი) მიმდინარე წლის 3 ოქტომბერს დააკავა და ბრალი აზერბაიჯანის რესპუბლიკის სისხლის სამართლის კოდექსის სხვადასხვა მუხლებით წარუდგინა.
სასამართლოს გადაწყვეტილებით, ჰარუტიუნიანს გამოძიების მიმდინარეობისას აღკვეთის ღონისძიების სახით პატიმრობა შეეფარდა. მას ზემოაღნიშნული ბრალდებებით პოტენციურად უვადო პატიმრობა ემუქრება.
სახელმწიფო უსაფრთხოების სამსახურმა გაავრცელა ვიდეო, სადაც დეტალურად არის აღწერილი არაიკ ჰარუთუნიანის დაკავება.
არაიკ ჰარუთუნიანი არაღიარებული მთიანი ყარაბაღის რესპუბლიკის პრეზიდენტი 2020 წლის 21 მაისიდან იყო. მან თანამდებობა 2023 წლის 31 აგვისტოს დატოვა, მის ნაცვლად კი სამველ შაჰმარიანი აირჩიეს.
კიდევ ორი ყოფილი პრეზიდენტი და ყოფილი სპიკერი დააკავეს
საინფორმაციო სააგენტო APA-ს ცნობით, დღეს (5 ოქტომბერს) ბაკო საჰაკიანს, არკადი ღუკასიანისა და დავით იშხანიანს აღკვეთის ღონისძიების სახით პატიმრობა შეეფარდათ.
მათი დაკავების შესახებ ინფორმაცია წინა დღეს გავრცელდა პროსახელისუფლებო მედიაში. სახელმწიფო უსაფრთხოების სამსახურში და გენერალურ პროკურატურაში ამ ინფორმაციას ჯერ არც ადასტურებენ და არც უარყოფენ.
“300 სეპარატისტი იძებნება”
27 სექტემბერს დააკავეს არაღიარებული ყარაბაღის რესპუბლიკის ყოფილი სახელმწიფო მინისტრი, 55 წლის რუბენ ვარდანიანი.
29 სექტემბერს ლევა მნაცაკანიანი, რომელიც 2015-2018 წლებში იკავებდა არაღიარებული მთიანი ყარაბაღის თავდაცვის მინისტრის პოსტს და სხვა ხელმძღვანელ თანამდებობებს; დავით ბაბაიანი, რომელიც 2013-2023 წლებში მუშაობდა პრეზიდენტის თანაშემწედ. დააკავეს ასევე სომხეთის შეიარაღებული ძალების მეთაურის ყოფილი მოადგილე ყარაბაღში დავით მანუკიანი.
ყველას ბრალად ედება ტერორიზმი და მძიმე დანაშაული მშვიდობისა და კაცობრიობის წინააღმდეგ.
ცოტა ხნის წინ, აზერბაიჯანის გენერალურმა პროკურორმა, კამრან ალიევმა განაცხადა, რომ აზერბაიჯანმა ძებნილთა სიაში შეიყვანა „300-ზე მეტი სომეხი სეპარატისტი, რომლებიც ბრალდებული არიან მძიმე დანაშაულების ჩადენაში“.
