"არ უნდა მივცეთ მამაჩემს საშუალება, გარდაიცვალოს ციხეში" - პრესკონფერენცია სტრასბურგში სააკაშვილის ჯანმრთელობასთან დაკავშირებით
პრესკონფერენცია სტრასბურგში სააკაშვილის ჯანმრთელობასთან დაკავშირებით
სტრასბურგში საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებით პრესკონფერენცია გაიმართა, სადაც ექსპრეზიდენტის შვილმა, ედუარდ სააკაშვილმა საქართველოს ხელისუფლებას მიმართა. მისი თქმით, “ჩვენ არ უნდა მივცეთ მამაჩემს საშუალება, გარდაიცვალოს ციხეში.”
პრესკონფერენციაში მონაწილეობას მიხეილ სააკაშვილის ოჯახის წევრები – გიული ალასანია, სანდრა რულოვსი, ედუარდ სააკაშვილი; ევროპარლამენტარები ანა ფოტიგა და მირიამ ლექსმანი და სააკაშვილის უცხოელი ადვოკატი მასიმო დანჯელო იღებდნენ. მათ სიტყვით გამოსვლისას კიდევ ერთხელ მოუწოდეს ქართულ ოცნებას, გაათავისუფლონ სააკაშვილი პატიმრობიდან.
“ჩვენ უნდა გავუძლოთ ამ რთულ პერიოდს ჩვენი ოჯახის ისტორიაში. გამოსავალი მარტივია, რეალური შესაძლებლობა არსებობს, საქართველოს მთავრობამ სწორი ნაბიჯი გადადგას და მისცეს საშუალება, საზღვარგარეთ იმკურნალოს. ვფიქრობ, რეალური შანსი გვაქვს ახლა ჩვენი მეგობრების მხარდაჭერით ევროპიდან მზარდი კონსენსუსის ფონზე საქართველოსა და ევროპაში, რომ სიტუაცია ძალიან მძიმეა და ის უნდა შეიცვალოს. შემდეგ რა მოხდება ჯერ განსაზღვრული არ არის. ეს დამოკიდებულია ყველა ჩვენგანზე – ოჯახზე, ადამიანებზე, რომლებიც თანხმდებიან იმაზე, რომ რაღაც უნდა შეიცვალოს და მამაჩემის სიცოცხლე უნდა გადარჩეს და მისი ჯანმრთელობა უნდა იყოს შენარჩუნებული”– ამბობს ედუარდ სააკაშვილი.
მესამე პრეზიდენტის ამერიკელმა ადვოკატმა მასიმო დანჯელომ კი განაცხადა, რომ პრეზიდენტ მიხეილ სააკაშვილის ჯანმრთელობა ნამდვილად არის ძალიან მნიშვნელოვანი. მისი თქმით, ჩვენ ვსაუბრობთ იმ ადამიანზე, ვინც ქვეყანას იდენტურობა მისცა, რომელმაც წარმოუდგენელი ცვლილებები შემოიტანა საქართველოში, რომელიც ეცადა ქვეყნის დასავლეთის რელსებზე გადაყვანას. დანჯელომ ხაზი გაუსვა, რომ სააკაშვილი არის პოლიტიკური პატიმარი და “სჭირდება სიცოცხლის გადამრჩენი” მკურნალობა:
“ოქტომბრის დასაწყისში ვეწვიე და საკუთარი თვალით ვნახე. ექიმებისგან შექმნილი გუნდი, ამტკიცებს, სააკაშვილის მძიმე მდგომარეობას. მას არამხოლოდ აწამებდნენ, არამხოლოდ მოწამლული იყო, არამედ აძლევდნენ ისეთ მედიკამენტებს, რომლებიც მის მდგომარეობას ართულებს. მას სჭირდება სიცოცხლის გადარჩენის მკურნალობა. მოვუწოდებთ ქართულ ოცნებას და ბიძინა ივანიშვილს, სააკაშვილის დაუყოვნებლივ გათავისუფლებას მოვითხოვთ. გვინდა მოვისმინოთ ხმები და იმედი გვაქვს, რომ ეს ხმები იქნება გაჟღერებული და მიხეილ სააკაშვილის სიცოცხლე იქნება გადარჩენილი.”
ევროპარლამენტარმა, ევროპის სახალხო პარტიის ჯგუფის, ქრისტიან-დემოკრატების წევრმა მირიამ ლექსმანმა კი აღნიშნა, რომ არის იურიდიული საფუძველი იმისა, რომ სააკაშვილი გათავისუფლდეს მისი ჯანმრთელობის გამო. როგორც ლექსმანი ამბობს, პირობები, რომელიც საქართველომ უნდა შეასრულოს, იმისთვის, რომ მიიღოს კანდიდატის სტატუსი, ორი პირობას გულისხმობს – თავისუფალ სასამართლო სისტემას და ბრძოლას პოლარიზაციის წინააღმდეგ.
“არსებობს იურიდიული საფუძველი, 283-ე მუხლში, მისი ჯანმრთელობიდან გამომდინარე და ჩვენ გვაქვს მტკიცებულება, რომ მისი ჯანმრთელობის მდგომარეობა შეესაბამება ამ მუხლს, ჩვენ გვწამს, რომ საქართველოს სასამართლო სისტემისა და მოსამართლეების გადასაწყვეტია, რომ ეს საკითხი კანონმდებლობის შესაბამისად უნდა განიხილოს და სააკაშვილი უნდა იყოს გათავისუფლებული” – განაცხადა ლექსმანმა.
ლექსმანის თქმით, თუ სისტემის გამო, სააკაშვილი ციხეში მოკვდება, არსებობს სამართლებრივი საფუძველი, “ამ ყველაფრის გათვალისწინებით რთული იქნება იმის დეკლარირება”, რომ საქართველოში სასამართლოს დამოუკიდებლობა არსებობს.
ასევე, მირიამ ლექსმანმა ხაზი გაუსვა კიდევ ერთ საკითხს – “მთავარი არხის” დამფუძნებლის, ნიკა გვარამიას პატიმრობას:
“ნიკა გვარამიას საქმე, რომელზეც ომბუდსმენმა თავის განცხადებაში ხაზი გაუსვა, რომ არსებობს პოლიტიკური მოტივები გვარამიას საქმეში. ეს ორი შემთხვევაც კი თუ არ მოგვარდება საქართველოს კანონმდებლობის შესაბამისად, ეს იქნება საფუძველი ევროკავშირისთვის, რომ მან თქვას – არა.“
ევროპარლამენტარმა ანა ფოტიგამ საქართველოს პრეზიდენტსა და “ქართულ ოცნებას” მიმართა, რომ მიხეილ სააკაშვილი პატიმრობიდან გაათავისუფლონ.
როგორც ფოტიგამ სტრასბურგში გამართულ პრესკონფერენციაზე აღნიშნა, მესამე პრეზიდენტის გათავისუფლება ჰუმანიტარულ საფუძველზე უნდა მოხდეს, რადგან მისი ჯანმრთელობის მდგომარეობა მძიმეა.
“მე ორჯერ მივმართე თხოვნით, რომ მიხეილ სააკაშვილი მომენახულებინა ციხეში ყოფნის დროს და უარი მივიღე, მიუხედავად იმისა, რომ ნებართვა მომეცა სხვა პატიმრების შემთხვევაში… ძალიან მნიშვნელოვანია ევროპარლამენტის წევრებისთვის, ევროკავშირის ლიდერებისთვის, რომ საშუალება ჰქონდეთ მოინახულონ მიხეილ სააკაშვილი.” – განაცხადა ფოტიგამ.
● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
● სააკაშვილის საქმეები. რისთვის ზის ციხეში ყოფილი პრეზიდენტი
6 დეკემბერს სახალხო დამცველის მიერ შექმნილმა კონსილიუმმა მიხეილ სააკაშვილის ჯანმრთელობის შესახებ დასკვნა მოამზადა. ოთხმა ექიმმა ექსპრეზიდენტი 5 დეკემბერს მოინახულა და მის ჯანმრთელობის მდგომარეობას დეტალურად გაეცნო.
კარდიოლოგ გიორგი კაჭარავას თქმით, ექსპრეზიდენტმა ჯობია, გამოიცვალოს სამკურნალო ადგილი, ხოლო ნევროლოგ თენგიზ წულაძის თქმით, მიხეილ სააკაშვილის ჯანმრთელობის მდგომარეობა აპრილთან შედარებით, “მნიშვნელოვნად” არის გაუარესებული.
ასევე, ექიმების განმარტებით, მესამე პრეზიდენტს აქვს მეოთხე დონის კახექსია, რაც გულისხმობს, რომ სიცოცხლის ხანგრძლივობა რამდენიმე თვე შეიძლება იყოს დარჩენილი.
თავად სახალხო დამცველის, ნინო ლომჯარიას შეფასებით, მიხეილ სააკაშვილის ჯანმრთელობის მდგომარეობა სასჯელი გადავადების მოთხოვნას შეესაბამება.
ასევე, 2 დეკემბერს გამოქვეყნდა ამერიკაში ჩატარებულ ტოქსიკოლოგიურ ექსპერტიზა, რომელსაც პროფესორი დეივიდ სმიტი აწერს ხელს. დასკვნაში წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.
●”ხილული კავშირები რუსეთთან” – ანა ფოტიგამ ბრიუსელში კონფერენცია გამართა
● Le Figaro: მიხეილ სააკაშვილი დაპატიმრების შემდეგ მოწამლეს
პირველ დეკემბერს ცენტრმა “ემპათია” მიხეილ სააკაშვილის ჯანმრთელობის მდგომარეობასთან დაკავშირებით სამედიცინო დასკვნა გამოაქვეყნა, რომლის მიხედვით, სააკაშვილს ოცზე მეტი დიაგნოზი თუ სიმპტომი აქვს – მათგან, დაახლოებით ათი პატიმრობასთან შეუთავსებელია.
“ემპათიაში” აცხადებენ, რომ ძირითადი დიაგნოზები არ საჯაროვდება. დასკვნაში ვკითხულობთ, რომ მიხეილ სააკაშვილის ამჟამინდელი ჯანმრთელობის მდგომარეობა ფასდება როგორც მძიმე და პატიმრობასთან შეუთავსებელი – ცალკეული დიაგნოზები ცალკეც და ერთობლიობაში გამოიწვევს ჯანმრთელობის მდგომარეობის შეუქცევად მოშლას, სიცოცხლის ხანგრძლივობის შემოკლებას და სიკვდილსაც, თუკი მას არ მიეცემა შესაძლებლობა მიიღოს ადეკვატური დიაგნოსტიკისა და მკურნალობის უფლება.
