აქთაუში აზერბაიჯანული თვითმფრინავის ჩამოვარდნას 35-მდე ადამიანი ემსხვერპლა
ბაქო-გროზნოს თვითმფრინავი აქტაუში ჩამოვარდა
ყაზახეთში, ქალაქ აქთაუს მახლობლად, აზერბაიჯანის ავიახაზების სამგზავრო თვითმფრინავი, რომელიც ბაქოდან გროზნოში მიფრინავდა, ჩამოვარდა. არსებული მონაცემებით, გაურკვეველი მიზეზების გამო, გროზნოს აეროპორტმა უარი თქვა აზერბაიჯანიდან თვითმფრინავის მიღებაზე. აზერბაიჯანული მხარის ოფიციალური ვერსიით, თვითმფრინავმა უამინდობის გამო მიმართულება შეიცვალა და აქთაუს აეროპორტისკენ გაფრინდა, სადაც დაშვებისას კატასტროფა განიცადა.
ბორტზე 62 მგზავრი და ეკიპაჟის 5 წევრი იმყოფებოდა. გადარჩენილი 32 ადამიანი აქთაუს საავადმყოფოებში გადაიყვანეს. ავარიის ადგილზე სამაშველო სამუშაოები დასრულდა და ავიაკატასტროფის მიზეზების დასადგენად გამოძიება დაიწყო.
აზერბაიჯანული მხარის ინფორმაციით, შემთხვევის პირველივე წუთებიდან შემთხვევის ადგილზე მუშაობდა აზერბაიჯანის გენერალური საკონსულო ქალაქ აქთაუში.
“ყაზახურ მხარესთან კოორდინაციით, სასწრაფო-სამაშველო სამსახურები ატარებენ გადაუდებელ ოპერატიულ ზომებს. ბორტზე 62 მგზავრი და ეკიპაჟის 5 წევრი იყო, სულ 67 ადამიანი. წინასწარი მონაცემებით გადარჩა 32 ადამიანი, მათ შორის რამდენიმეს მდგომარეობა მძიმეა.” – ნათვქამია განცხადებაში.
აზერბაიჯანის პრეზიდენტის, ილჰამ ალიევის ინიციატივით შეიქმნა სახელმწიფო კომისია, რომელსაც პრემიერმინისტრი ალი ასადოვი უხელმძღვანელებს.
აზერბაიჯანის გენერალური პროკურატურის პრესსამსახურის წარმომადგენლის, კანან ზეინალოვის განცხადებით, სისხლის სამართლის საქმის წარმოება ამჟამად ყაზახეთის პროკურატურასთან ერთად მიმდინარეობს.
“ყველა ვერსიაზე მიმდინარეობს მუშაობა, ტარდება შესაბამისი ექსპერტიზები. საგამოძიებო ჯგუფი აზერბაიჯანის გენერალური პროკურორის მოადგილის ხელმძღვანელობით ყაზახეთშია გაგზავნილი და შემთხვევის ადგილზე მუშაობს“, – განაცხადა ზეინალოვმა.
ამასობაში სოციალურ ქსელებში გავრცელდა ვიდეო კადრები თვითმფრინავის ჩამოვარდნის ადგილიდან, ასევე გადარჩენილი მგზავრების მიერ ავარიამდე და მის შემდეგ გადაღებული კადრები.
თვითმფრინავის ნამსხვრევების აღბეჭდილ ვიდეოში ნაჩვენებია მრავალი ნახვრეტი, მსგავსი დაბომბვის კვალის ან აფეთქების.
ერთ-ერთი გადარჩენილი მგზავრი ზაურ მამედოვი გადარჩენის შემდეგ გადაღებულ ვიდეოში ამბობს, რომ ავარიამდე ორი აფეთქების ხმა გაისმა, რის შემდეგაც მგზავრებს შორის პანიკა დაიწყო.
პრეზიდენტი ილჰამ ალიევი, რომელიც რუსეთში, დსთ-ს არაფორმალურ სამიტზე იმყოფებოდა, სასწრაფოდ სამშობლოში დაბრუნდა.
ჰეიდარ ალიევის საერთაშორისო აეროპორტში თვითმფრინავის დაშვებისთანავე, პრეზიდენტმა ილჰამ ალიევმა ინციდენტთან დაკავშირებით შეხვედრა გამართა.
“ჩვენთვის უცნობია ავარიის მიზეზები. არის სხვადასხვა ვერსიები. ვფიქრობ, ჯერ ადრეა ამაზე საუბარი. საქმე სრულად უნდა იქნას გამოძიებული. გენერალურმა პროკურატურამ აღძრა სისხლის სამართლის საქმე და, რა თქმა უნდა, აზერბაიჯანის საზოგადოება რეგულარულად იქნება ინფორმირებული როგორც კომისიის მუშაობის შედეგების, ასევე სისხლის სამართლის საქმის მიმდინარეობის შესახებ“.
ავიაკატასტროფის გამო აზერბაიჯანში 26 დეკემბერს გლოვა გამოცხადდა. შესაბამის ბრძანებას აზერბაიჯანის პრეზიდენტმა ილჰამ ალიევმა მოაწერა ხელი.
