ახალი პარლამენტის პირველი სხდომა 11 დეკემბერს გაიმართება
ახალარჩეული პარლამენტის პირველი სხდომა 2020 წლის 11 დეკემბერს გაიმართება და მას ბუბა კიკაბიძის ნაცვლად, ლადო კახაძე გაუძღვება. შესაბამის განკარგულებას ხელი პრეზიდენტმა სალომე ზურაბიშვილმა უკვე მოაწერა.
“განკარგულების მიხედვით, პირველი სხდომა 11 დეკემბერს, 12:00 საათზე დაინიშნა“, – ნათქვამია პრეზიდენტის ადმინისტრაციის მიერ გავრცელებულ ინფორმაციაში.
_____________________
● პარლამენტის სხდომის პირველ დღეს, ოპოზიცია მეტეხის ტაძართან შეიკრიბება
● საქართველოს ერთპარტიული პარლამენტი: შეძლებს თუ არა იგი სრულფასოვნად მუშაობას
● საზოგადოების სხვადასხვა სფეროს წარმომადგენლებმა “შეურიგებლობის მანიფესტს” მოაწერეს ხელი
________________________
მეათე მოწვევის პარლამენტის დამტკიცებისთანავე, მთავრობა პარლამენტის წინაშე უფლებამოსილებას მოიხსნის და ახალი პრემიერ-მინისტრის დანიშვნამდე, მოვალეობის შესრულებას განაგრძობს.
მთავრობის უფლებამოსილების მოხსნიდან ორი კვირის ვადაში, პარლამენტი ნდობას არჩევნებში საუკეთესო შედეგის მქონე პარტიის – ამ შემთხვევაში მმართველი “ქართული ოცნების” – წამოყენებულ პრემიერ-მინისტრობის კანდიდატსა და მის მიერ წარდგენილ მთავრობას უცხადებს.
ამის შემდეგ პარლამენტს უნდა წარედგინოს მთავრობის შემადგენლობა და სამთავრობო პროგრამა, რის შემდეგაც განხილვის პროცესი კომიტეტებსა და ფრაქციებში დაიწყება.
ნდობის მისაღებად საჭიროა პარლამენტის სრული შემადგენლობის უმრავლესობის – სულ მცირე 76 დეპუტატის მხარდაჭერა.
ვინაიდან ოპოზიცია ბოიკოტის რეჟიმს ინარჩუნებს, პარლამენტის პირველ სხდომას, რომელსაც წესით ბუბა კიკაბიძე უნდა გაძღოლოდა, ლადო კახაძე გაუძღვება.
რეგლამენტის თანახმად, პრეზიდენტის მიერ პარლამენტის სხდომის გახსნის შემდეგ, სხდომას სპიკერის არჩევამდე, პარლამენტის უხუცესი წევრი უძღვება.
