აღდგომის ღამე თბილისში. პროტესტი სანთლებით ხელში
აღდგომის ღამე თბილისში
აქციის მონაწილეები, რომლებიც უკვე თითქმის ერთი თვეა აგენტების კანონს ქუჩაში აპროტესტებენ, აღდგომის ღამეს რუსთაველის გამზირზე შეხვდნენ. დემონსტრანტების ნაწილი ქაშუეთის ეკლესიაში ლიტურგიას დაესწრო. წვიმის მიუხედავად, ათასობით ადამიანი გარეთ იდგა.
მომიტინგეები თბილისის ცენტრალურ გამზირზე სანთლებით, პასკებითა და წითელი კვერცხებით იყვნენ მისული. თვითორგანიზება სოციალურ ქსელებში მოხდა. იდეა პროტესტის ახალგაზრდა მონაწილეებისგან წამოვიდა.
“ჩვენ გვეძახიან სატანისტებს, უღმერთოებს, სარწმუნოების მტრებს. ჩვენ გვინდა ვაჩვენოთ, რომ ჩვენ პატივს ვცემთ სარწმუნოებას. გვჯერა, რომ ღმერთი არის სიყვარული, ერთად ყოფნა, ტოლერანტობა. ჩვენი თაობა ასეთია,” – ამბობს აქციის მონაწილე, 21 წლის მარიამ მეფარიშვილი.
მომიტინგეებმა საავტომობილო გზაზე სანთლებით გააკეთეს წარწერა: “ენა, მამული, სარწმუნოება და ერთობა”.
რუსთაველზე გუშინ რამდენჯერმე შესრულდა საქართველოს ჰიმნი, ასევე სააღდგომო საგალობლები და სხვა პატრიოტული სიმღერები საქართველოზე. მოხალისეებმა აქციაზე მიიტანეს და უფასოდ დაარიგეს პასკები, კვერცხები, ღვეზელები, ხილი.
“მართლა არ მინახავს მსგავსი რამ. არ ვიცი, რა ვუყო ამდენ ემოციას. თურმე როგორ გვჭირდება და როგორ გამოგვდის ერთად ყოფნა და სოლიდარობა და წლებია ხელოვნურად გვხლეჩენ და გვანაწევრებენ,” – ირაკლი, 43 წლის.
“მე არ ვარ რელიგიური და ვინმეს რომ ეთქვა ჩემთვის, რომ რუსთაველზე სანთლით ვიდგებოდი, ამას არასოდეს დავიჯერებდი. მაგრამ მე აქ ვარ, ამაყი, იქ სადაც ჩემი ხალხია. და ეს არის ნამვილი ქრისტიანობა, რომელიც გვაერთიანებს ადამიანებს,” – თამუნა, 27 წლის.
წუხანდელმა ღამემ ინციდენტების გარეშე ჩაიარა. ამიტომ, საპატრულო პოლიცია, რომელიც ადგილზე იყო მობილიზებული, ასევე მომიტინგეებთან ერთად, სანთლებით ხელში იდგა რუსთაველზე.
