აფხაზეთში აფრიკელი სტუდენტი დაიღუპა. მისი ოჯახი არ თვლის, რომ ეს უბედური შემთხვევა იყო
აფრიკელი სტუდენტი აფხაზეთში გარდაიცვალა
აფხაზეთში კონგოს დემოკრატიული რესპუბლიკიდან სტუდენტის ტრაგიკული დაღუპვის გარშემო სიტუაცია იძაბება. სტუდენტი რუსეთში სწავლობდა და აფხაზეთში სამუშაოდ ჩამოვიდა.
ჯერემი მეკანდა ქალაქ ოჩამჩირის ცემენტის ქარხანაში მუშად მუშაობდა.
შინაგან საქმეთა სამინისტრომ განაცხადა, რომ ეს საწარმოო უბედური შემთხვევა იყო. გარდაცვალების მიზეზად დასახელდა “თავის ქალის ძვლებისა და ტვინის ნივთიერების დაზიანებით გამოწვეული ჭრილობები და თავის ტვინის დაჟეჟილობები“.
გაირკვა, რომ ის 24 დეკემბერს გარდაიცვალა, მაგრამ ეს მხოლოდ ახლა გახდა საჯარო, მას შემდეგ, რაც ჯერემი მეკანდას ნათესავებმა და მეგობრებმა კონგოს დემოკრატიული რესპუბლიკის დედაქალაქ კინშასაში პროტესტი დაიწყეს.
ოჯახი აცხადებს, რომ მისი გარდაცვალება შესაძლოა ძალადობრივი ყოფილიყო და დამოუკიდებელ გამოძიებას და ფინანსურ კომპენსაციას ითხოვს.
- “ჩვენ ყველაფრის კეთება შეგვიძლია”: შრომითი მიგრანტების ისტორიები აფხაზეთიდან
- აფხაზეთში მიგრანტებს ტაქსის მძღოლებად მუშაობა აეკრძალებათ
ადგილობრივი მედიის ცნობით, მეკანდა რუსეთის ქალაქ ბრიანსკში, უნივერსიტეტში მარკეტინგს სწავლობდა. სტუდენტურ ვიზას ვადა გაუვიდა და ახალი ვიზის მისაღებად სწავლის პროცესის ხელახლა დაწყება იყო საჭირო. სამშობლოში დაბრუნების მაღალი ხარჯების გამო, მან დროებით აფხაზეთში გამგზავრება არჩია.
ეს პრაქტიკა საკმაოდ გავრცელებულია რუსეთში მყოფ აფრიკელ სტუდენტებს შორის. ვიზის მოლოდინის პერიოდი ხშირად რამდენიმე თვეს გრძელდება და სტუდენტები ამ დროს მეზობელ ქვეყნებსა და რეგიონებში რჩებიან, სადაც საცხოვრებელი და ყოფითი ხარჯები შედარებით დაბალია. აფხაზეთი ასეთ შემთხვევებში ერთ-ერთ პოპულარულ მიმართულებად იქცა.
ვიზის მოლოდინში მყოფი უცხოელები, როგორც წესი, დროებით სამუშაოს პოულობენ მშენებლობაზე, კვების ობიექტებში ან ტაქსის მძღოლებად. ჯერემი მეკანდამ მუშაობა ოჩამჩირის ცემენტის ქარხანაში დაიწყო, რომელიც United Cement Group-ს (UCG) ეკუთვნის — ცენტრალური აზიის ერთ-ერთ მსხვილ ცემენტის ჰოლდინგს, ოპერაციებით უზბეკეთში, ყირგიზეთსა და ყაზახეთში.
კომპანიის ოფიციალურ ვებსაიტზე აფხაზეთის ქარხანა წარმოების ობიექტად არ არის მითითებული, თუმცა ქარხანა ადგილზე ფუნქციონირებს და აქტიურ წარმოებას ეწევა.
მეკანდას ოჯახის განცხადებით, გარდაცვალების ზუსტი მიზეზის მიუხედავად, ინციდენტი სამუშაო ცვლის დროს და ქარხნის ტერიტორიაზე მოხდა. მათი თქმით, მოქმედი კანონმდებლობის მიხედვით, დამსაქმებელ კომპანიას ეკისრება ვალდებულება, ოჯახს ფინანსური კომპენსაცია გადაუხადოს.
აფხაზეთის დე ფაქტო ხელისუფლებას მომხდართან დაკავშირებით კომენტარი ჯერჯერობით არ გაუკეთებია. გარდაცვლილის ნათესავები პასუხებსა და ოფიციალურ განმარტებებს ელოდებიან.
