აფხაზი ჩინოვნიკები შეღავათიან სესხებს რუსული ბანკებიდან მიიღებენ, მიუხედავად იმისა, რომ მათ ამის უფლება არ აქვთ
აფხაზ ჩინოვნიკებს შეღავათიანი სესხები სურთ
ინტერნეტში გაჟონილი დოკუმენტის მიხედვით, აფხაზი მაღალჩინოსნები და დეპუტატები შეღავათიან სესხებს რუსული ბანკებიდან მიიღებენ, თუმცა ეს უკანონოა. ტელეგრამ-არხის, Абхазский портал-ის მიერ გამოქვეყნებულ სიაში შედიან აფხაზეთის ე.წ. ვიცე-პრეზიდენტი ბადრე გუმბა, პრემიერ-მინისტრი ალექსანდრ ანქვაბი, ეკონომიკისა და იუსტიციის მინისტრები, ერთ-ერთი ოლქის უფროსი, მისი სამი მოადგილე და ე.წ. პრეზიდენტის, ასლან ბჟანიას სიძე.
რუსულმა ბანკებმა თანამდებობის პირებისა და მოადგილეების განაცხადები დაამტკიცეს აფხაზი მეწარმეების 2022-2025 წლების შეღავათიანი კრედიტების პროგრამის ფარგლებში. მაგრამ ფაქტია, რომ აფხაზეთის კანონმდებლობა თანამდებობის პირებსა და მოადგილეებს სამეწარმეო საქმიანობას უკრძალავს.
- ეკონომისტის მოსაზრება: როგორ გადავარჩინოთ აფხაზეთის ეკონომიკა რუსი ინვესტორებისთვის შეღავათების გარეშე?
- “აფხაზეთის პრეზიდენტი ლობირებს რუსი ოლიგარქების ინტერესებს, რათა დარჩეს ხელისუფლებაში” – მოსაზრება სოხუმიდან
აფხაზური პორტალის წყაროს ცნობით, სესხები გამოიყო:
- ოლქის უფროსის მოადგილეები ტიმურ ბეი და ალხას ბარციცი და იუსტიციის მინისტრი ანრი ბარციცი – სოხუმში ბინების მშენებლობისთვის (დაახლოებით $12,5 მილიონი);
- პრემიერ-მინისტრი ალექსანდრ ანქვაბი, ეკონომიკის მინისტრი ქრისტინა ოზგანი და მოადგილე ასლან ლაკობა -ქალაქ გუდაუთაში ლუდსახარშის მშენებლობისთვის (6,25 მილიონი დოლარი) და ახალ ათონში სასტუმროს მშენებლობისთვის (5,21 მილიონი დოლარი);
- ვიცე პრეზიდენტი ბადრე გუმბა – სოხუმში ბინების მშენებლობისთვის (11,46 მილიონი დოლარი);
- გალის რაიონის ადმინისტრაციის ხელმძღვანელი კონსტანტინე ფილია და აფხაზეთის პრეზიდენტის სიძე ომარ ავიძბა – ბინების მშენებლობისთვის (12,5 მილიონი დოლარი);
- ალისა გულარია – გაგრის რაიონში სასტუმროს მშენებლობისთვის (5,21 მილიონი დოლარი).
ეს ინფორმაცია ჯერ კიდევ 11 ოქტომბერს გავრცელდა, მაგრამ ამ დროისთვის, ე.ი. ხუთი დღის შემდეგ, სკანდალური სიის მხოლოდ ერთმა ფიგურანტმა, ტიმურ ბეიმ გაავრცელა ოფიციალური განცხადება და სესხის მიღება უარყო. მისი თქმით, სესხის შესახებ განაცხადი არ შეუტანია და არც აპირებს ამის გაკეთებას.
ოპოზიციის ერთ-ერთი ლიდერის, ადგურ არძინბას თქმით, მას სულაც არ უკვირს ჩინოვნიკების მსგავსი მოქმედება, რადგან შეღავათიანი სესხების მიღება “აბსოლუტურად შეესაბამება [აფხაზეთის] ხელისუფლების ქცევის ლოგიკას და მათი ქმედებების ალგორითმს“.
მისივე განმარტებით, 2015 წელს აფხაზი მეწარმეების მხარდაჭერის პროგრამა რუსეთის პრეზიდენტმა ვლადიმირ პუტინმა აფხაზეთის მაშინდელი ლიდერის, რაულ ხაჯიმბას მოთხოვნით დაამტკიცა. ამ მიმართულების “ხელმძღვანელობა“ დაევალა თავად ინალ არძინბას, რომელიც მაშინ ეკონომიკის მინისტრის თანამდებობას იკავებდა.
“ხაზგასმით მინდა აღვნიშნო, რომ ბიზნესის დაკრედიტებასთან დაკავშირებული ყველა პროცესი უპრეცედენტო ღია პირობებში მიმდინარეობდა. შეიქმნა სპეციალური ღია კომისია, რომლის ყველა შეხვედრა ჟურნალისტების თანდასწრებით იმართებოდა. უფრო მეტიც, ყველა მეწარმის შესახებ ინფორმაცია, რომლებმაც გაიარეს კონკურსი, გამოქვეყნდა ღიად – დამფუძნებლების სახელების მითითებით. ბუნებრივია, რომ ამ თანხებიდან ვერც ერთი ჩინოვნიკი თანხას ვერ მიითვისებდა“, – ამბობს არძინბა.
მისი აზრით, დღევანდელი ხელისუფლება ხალხის მიმართ “უპატივცემულო და ბოღმა“ დამოკიდებულებით გამოირჩევა და სესხების გაცემასთან დაკავშირებულ ყველა პროცესს საიდუმლოდ ინახავს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
