აფხაზეთში საპროტესტო აქციები გრძელდება. ოპოზიციამ დაკავებების საპასუხოდ სტრატეგიული ხიდები გადაკეტა
აფხაზეთში ოპოზიციის დაპატიმრებები
11 ნოემბრის საღამოს, აფხაზეთში ოპოზიციის ლიდერების სასტიკი დაპატიმრებების და შიდა პოლიტიკური დაპირისპირების ახალი რაუნდი დაიწყო, რომელიც გამოწვეულია ე.წ. პრეზიდენტის მცდელობით, მოთხოვოს პარლამენტს დაამტკიცოს რუსულ-აფხაზური შეთანხმება ინვესტიციების შესახებ, რომელსაც ეწინააღმდეგება ბევრი ექსპერტი და აფხაზური საზოგადოების უმრავლესობა.
სოხუმის ცენტრში ათასობით ადამიანმა მთელი ღამე გაატარა სახელმწიფო უსაფრთხოების შენობის წინ დაკავებულების გათავისუფლების მოთხოვნით. ადვოკატებსა და ახლობლებს მათი ნახვის უფლება ამ დრომდე არ ეძლევათ – მათი მდგომარეობის შესახებ არაფერია ცნობილი.
ასევე, ოპოზიციამ გადაკეტა სტრატეგიული მნიშვნელობის ორი ხიდი – მდინარე გუმისთასან და კოდორზე.
ოფიციალურად, გენერალური პროკურორის, ადგურ აგრბას განცხადებით, კრიზისი დაიწყო “ოპოზიციონერების უკანონო ქმედებებით და მათი უხამსი მიმართვებით დეპუტატების მიმართ“.
მან ეს დეპუტატი არ დაასახელა. თუმცა, ცნობილია, რომ დღის მეორე ნახევარში პარლამენტის წინ რამდენიმე ოპოზიციონერსა და დეპუტატ ალმას აქაბას შორის კონფლიქტი მოხდა. კამერებში ჩანს ადამიანების ჯგუფი, რომლებიც უბრალოდ ცხარედ კამათობენ, მაგრამ აქ ჩხუბი არ ჩანს.
თუმცა, 11 ნოემბრის საღამოს, სოხუმის შესასვლელთან მანქანა, რომელშიც ოთხი ოპოზიციონერი იჯდა – ორი ყოფილი დეპუტატი ალმასკან არძინბა და გარი კოკაია, ასევე ომარ სმირი და რამაზ ჯოპუა – გააჩერეს ნიღბიანმა უშიშროების თანამშრომლებმა, გადმოიყვანეს მანქანიდან, დააგდეს მიწაზე და სახელმწიფო უსაფრთხოების სამსახურში გადაიყვანეს.
ოპოზიცია და აფხაზური საზოგადოების დიდი ნაწილი ოქტომბრის ბოლოს მოსკოვში გაფორმებულ შეთანხმებას აფხაზეთისთვის უკიდურესად არახელსაყრელად მიიჩნევს. ამ დოკუმენტის მიხედვით, მსხვილი რუსული ბიზნესი უპრეცედენტო სარგებელს იღებს, რაც მომავალში სოხუმის უსაფრთხოებისთვის დიდ საფრთხედ იქცევა.
აქტივისტების დაკავებიდან ერთ საათში სახელმწიფო უსაფრთხოების სამსახურის შენობასთან რამდენიმე ასეული ოპოზიციონერი და დაკავებულების ახლობლები შეიკრიბნენ. მათსა და უსაფრთხოების ძალების წარმომადგენლებს შორის შეტაკება მოხდა.
აღშფოთებულმა ხალხის მასამ სპეცსამსახურის შენობის ეზოს შესასვლელში არსებული ჭიშკარი შეანგრია, თუმცა ჩხუბი სწრაფად დამთავრდა.
ამის შემდეგ ოპოზიციის წარმომადგენლებმა თავისუფლების მოედანზე გადაინაცვლეს – იქ გადაწყდა სოხუმში შესასვლელ-გასასვლელების გადაკეტვა.
შუაღამისას, ოპოზიციის წარმომადგენლებმა გადაკეტეს ორი ხიდი მდინარე გუმისთაზე, რომელიც უზრუნველყოფს სოხუმში მისასვლელს დასავლეთ მხრიდან და კოდორის ხიდი აფხაზეთის აღმოსავლეთ ნაწილში.
შექმნილ ვითარებასთან დაკავშირებით ასლან ბჟანიამ უშიშროების საბჭოს საგანგებო სხდომა გამართა.
რამდენიმე დღით ადრე, შინაგან საქმეთა სამინისტროში პოლიციის დღისადმი მიძღვნილ შეხვედრაზე გამოსვლისას, ბჟანიამ უსაფრთხოების ძალებს “პოლიტიკურ ექსტრემიზმთან“ ბრძოლისკენ მოუწოდა.
“ასლან ბჟანიამ, ჩვენდა სამწუხაროდ, გამოსვლაში შემდეგი ფრაზა წარმოთქვა: მან ყველას – ჩვენი ქვეყნის უზარმაზარ ნაწილს – ექსტრემისტები უწოდა. შევარდნაძე ჩვენს მამებს ომის დროს სეპარატისტებს უწოდებდა, დღეს ჩვენ გავხდით ექსტრემისტები ჩვენს მიწაზე“, – განაცხადა ოპოზიციის ლიდერმა ადგურ არძინბამ.
ოპოზიცია მიიჩნევს, რომ აქტივისტების დაკავება ასლან ბჟანიას პირდაპირი ბრძანებაა.
15 ნოემბერს პარლამენტის სხდომაა ჩანიშნული, რომლის დღის წესრიგში საინვესტიციო ხელშეკრულების რატიფიცირების საკითხია. ოპოზიცია დაჰპირდა ხელისუფლებას, რომ რატიფიცირების თავიდან ასაცილებლად, იმ დღეს პარლამენტის შენობის წინ დიდი აქცია გაიმართება.
11 ნოემბერს ხელისუფლებამ, შეშფოთებულმა იმით, რომ შეთანხმება არა მხოლოდ ოპოზიციაში, არამედ მთლიანად აფხაზურ საზოგადოებაშიც არაპოპულარული იყო, აშკარად გადაწყვიტა ნეგატიური აღქმის “შერბილება“ და ცალკე საკონსტიტუციო კანონის მიღების შესახებ განაცხადა.
“მრავალფუნქციური კომპლექსი“ – ეს ფრაზა წარმოდგენილია საინვესტიციო ხელშეკრულებაში, როგორც ობიექტი, სადაც რუს ინვესტორებს შეუძლიათ ფულის დაბანდება.
ოპოზიციამ განაცხადა, რომ ამ ტერმინის უკან დგას ასლან ბჟანიას მხრიდან ბინების მშენებლობისა და უცხოელებისთვის მათი შემდგომი მიყიდვის პროექტის ლეგალიზების კიდევ ერთი მცდელობა. ეს პროექტი მანამდე პარლამენტში ვერ გავიდა.
- ბინების შესახებ კანონის წინააღმდეგ პროტესტი ასლან ბჟანიამ უცხოეთის დაზვერვის სამსახურების გავლენას დაუკავშირა
- “ერთადერთი დაზარალებული მხარე აფხაზეთია” – მოსაზრება რუსეთ-აფხაზური საინვესტიციო შეთანხმების შესახებ
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
