აფხაზეთში რუსეთთან საზღვრის გახსნას მოითხოვენ, ინფიცირების შემთხვევების რიცხვი იზრდება

აფხაზეთში რუსეთთან საზღვრის ჩაკეტვის რეჟიმის  გაგრძელებას აპროტესტებენ – იმ ფონზე, რომ კორონავირუსის შემთხვევების რაოდენობა იზრდება. პრეზიდენტმა ხალხს სპეციალური მოწოდებით მიმართა. კორონავირუსის დიაგნოზი აფხაზეთის პარლამენტის დეპუტატს დაუდასტურდა, რის გამოც ყველა პარლამენტარმა ტესტი უნდა ჩაიტაროს.

აქცია გაგრაში

აფხაზეთში შექმნილი ვითარებით უკმაყოფილო გაგრელებმა აქცია მოაწყეს. აქციის ზოგიერთი მონაწილე რუსეთთან საზღვრის გახსნას, ზოგი კი მთავრობისგან მატერიალურ დახმარებას ითხოვდა.

ძირითადად, ხალხი მთავრობის ქმედებებში სიცხადის შეტანას მოითხოვდა. მათ სურთ იცოდნენ, შემდგომში რა მოელით.

მოედანზე გამოსვლის მთავარი მიზეზი ის ეკონომიკური სირთულეებია, რომელსაც აფხაზეთის მთავარი საკურორტო ზონის მცხოვრებლები აწყდებიან. ხალხი ამბობს, რომ ფული აღარ აქვთ და არ იციან, ზამთარში როგორ გადარჩნენ.

”თითოეული ოჯახის წევრისთვის 10 ათასი რუბლი (დაახლოებით 135 აშშ დოლარი) გვჭირდება! თუნდაც საზღვარი 4 აგვისტოს გაისხნას, ეს ვეღარ დაგვეხმარება. რა ჩვაცვათ ბავშვებს სკოლაში? ერთი ბავშვისთვის ტანსაცმელი 20 ათასი ჯდება (დაახლოებით 270 აშშ დოლარი)! ”, – აცხადებდნენ აქციის მონაწილეები.

მათი მოთხოვნები ადგილობრივი საბჭოს  დეპუტატებმა და გაგრის რაიონის ადმინისტრაციის ხელმძღვანელმა იური ხაგუშმა მოისმინეს. მათი თქმით, პანდემიის დროს სახელმწიფომ ხალხს დახმარება არაერთხელ გაუწია. მაგრამ ამავე დროს, ხალხის მოთხოვნების ესმით და მათ პრეზიდენტამდე მიიტანენ.

•ანტიკრიზისული სოფლის მეურნეობა: ორი ამბავი აფხაზეთიდან

•მოსაზრება: აფხაზეთში კრიზისი გარდაუვალია – მნიშვნელოვანია, როგორ შეხვდება მას ხელისუფლება

 •აფხაზეთის ახალი პრეზიდენტის გამოწვევები

მომიტინგეები მშვიდობიანად დაიშალნენ. მაგრამ სოციალური ქსელების მომხმარებლებმა ეს აქცია არაერთგვაროვნად შეაფასეს.

” 10 ათასს რომ ითხოვენ 250 ათასი ადამიანისთვის, ეს 2.5 მილიარდი რუბლია (დაახლოებით 34 მილიონი დოლარი). ეს ჩვენმა სახელმწიფო თვეში უნდა გადაუხადოს? აჩუქეთ ადამიანს კალკულატორი. ეს ჩვენი ქვეყნის წლიური ბიუჯეტია, ”- წერს მომხმარებელი.

”და რა უნდა გავაკეთოთ ოჩამჩირის, ტყვარჩელის და სხვა რაიონების მცხოვრებლებმა? უსინდისოები, გეგონება ბოლო ლუკმას აცლიან. ამათ ეშინიათ, რომ სეზონის ბოლოს ახალ ლექსუსს ვერ იყიდიან, ან სასტუმროს კიდევ ერთი სართულს ვერ დაადგამენ”, – ამბობს მეორე.

შეგახსენებთ, 28 ივლისს, აფხაზეთის პრეზიდენტმა ასლან ბჟანიამ რუსეთთან საზღვრის ჩაკეტვის რეჟიმი 4 აგვისტომდე გააგრძელა.

იმავდროულად, აფხაზეთში COVID-19-ით დაავადებულ პაციენტთა მკვეთრი მატებაა. 20 ივლისს, ხელისუფლებამ ოფიციალურად გამოაცხადა, რომ კორონავირუსით დაავადებული ბოლო პაციენტი განიკურნა, მაგრამ რამდენიმე დღის შემდეგ ახალი პაციენტები გამოჩნდნენ. ამჟამად დაფიქსირებულია კორონავირუსის 24 შემთხვევა. ერთი პაციენტი გარდაიცვალა.

პრეზიდენტის მიმართვა

არსებული ვითარებიდან გამომდინარე, აფხაზეთის პრეზიდენტმა ასლან ბჟანიამ პანდემიის დაწყებიდან პირველად ხალხს საგანგებოდ მიმართა:

”ქვეყნის ხელისუფლება სიტუაციის სირთულეს აცნობიერებს. ჩვენ გვესმის სიტუაცია, რომელშიც მოქალაქეები აღმოჩნდნენ სახელმწიფო საზღვრის ჩაკეტვის გამო. მაგრამ ჩვენ გამოვდივართ იქიდან, რომ სახელმწიფოსთვის ყველაზე მაღალი ღირებულება მოქალაქეების სიცოცხლე და ჯანმრთელობაა. “

პრეზიდენტის თქმით, რუსეთის ფედერაციასთან სახელმწიფო საზღვრის ცალმხრივად გახსნა შეუძლებელია, მაგრამ აფხაზეთის ხელისუფლება ”მუდმივ კავშირშია რუსულ მხარესთან, რათა შეიმუშაონ ყველაზე უსაფრთხო გადაწყვეტილება ორივე ქვეყნის მოქალაქეების სიცოცხლისა და ჯანმრთელობისთვის. ამ გამოსავალს უახლოეს მომავალში ვნახავთ. ”

პრეზიდენტმა აღნიშნა, რომ ეპიდემიის რისკების შესამცირებლად ყველა ღონეს იხმარს.

კორონავირუსიანი დეპუტატი

COVID-19-ის დიაგნოზი აფხაზეთის პარლამენტის ერთ-ერთ წევრს დაუდასტურდა – ამის შესახებ პარლამენტის სპიკერმა, ვალერი კვარჩიამ განაცხადა. ამასთან დაკავშირებით გადაწყდა, რომ სახალხო კრების ყველა წევრს კორონავირუსის ტესტი ჩაუტარდება.

დეპუტატმა ლევან გალუსტიანმა COVID-19-ის ტესტის ჩატარება ნებაყოფლობით გადაწყვიტა მძღოლთან ერთად, რადგან მის მეზობელს კორონავირუსი აღმოაჩნდა.

დეპუტატის მძღოლის ტესტმა უარყოფითი შედეგი აჩვენა, თუმცა თავად დეპუტატის ტესტის პასუხმა დააგვიანა. გალუსტიანის თქმით, მისი ანალიზის პასუხი დადებითი რომ იყო, ამის შესახებ ეპიდემილოგიური ლაბორატორიის დაცვის თანამშრომლისგან გაიგო და რაიმე ოფიციალური საბუთი  დიაგნოზის შესახებ არ მიუღია.

“გვაქვს ინფორმაცია სპეციალისტებისგან. დიაგნოზი დადასტურებულია, ”- თქვა, თავის მხრივ,  პარლამენტის სპიკერმა ვალერი კვარჩიამ.

30 ივლისს დეპუტატები აფხაზეთის პრეზიდენტ ასლან ბჟანიას უნდა შეხვედროდნენ. თუმცა, ლევონ გალუსტიანის ავადმყოფობის გამო, შეხვედრა გაუქმდა და ყველა დეპუტატი ტესტის ჩასატარებლად წავიდა.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო