აფხაზეთში ოპოზიცია ხელისუფლების მიერ ამომრჩევლის მოსყიდვაზე ჩივის

არჩევნები აფხაზეთში 

აფხაზეთი ოპოზიცია ჩივის, რომ ხელისუფლება საპარლამენტო არჩევნების წინ ამომრჩევლის მოსყიდვას ახდენს. ოპოზიციის ლიდერმა ადგურ არძინბამ გენერალურ პროკურატურას მიმართა განცხადებით, წინასაარჩევნო კამპანიის მიმდინარეობისას დარღვევების შესახებ. მისი აზრით, ადგილი აქვს ამომრჩევლის მოსყიდვას და ადმინისტრაციული რესურსის გამოყენებას. 

საკუთარი განცხადებების დასამტკიცებლად ოპოზიციის ლიდერი გვთავაზობს ყურადღება სოციალურ ქსელებს მივაქციოთ, სადაც „მსგავსი სახის დარღვევების აქტიურ დემონსტრირებას ახდენენ გარკვეული დეპუტატობის კანდიდატების მხარდამჭერები“. 

ადგურ არძინბა გენერალურ პროკურორ ადგურ აგრბას სახელზე გაკეთებულ განცხადებაში არ ასახელებს სახელებს და არ მოჰყავს არანაირი კონკრეტული ფაქტი, რომელიც ამომრჩევლის მოსყიდვას უკავშირდება. ამის მიუხედავად, სოციალურ ქსელებში მართლაც გვხვდება ზოგიერთი საარჩევნო შტაბის სააგიტაციო შეტყობინება, სადაც წერენ, რომ ესა თუ ის კომუნალური სამუშაო (მაგალითად, გზების რემონტი, ქუჩების განათება, ახალი ტრანსფორმატორის დაყენება და ა.შ.) სწორედ მათი დეპუტატობის კანდიდატის წყალობით მიმდინარეობს. 

• 2022 წლის ტოპ-5 ყველაზე მოსალოდნელი მოვლენა აფხაზეთში
• ”აფხაზეთის ნებისმიერ ლიდერს ორი პრობლემა აქვს: დახმარება უნდა ითხოვოს და ახსოვდეს, რომ ამისთვის გადახდა მოუწევს”
• ბრძოლა და მსხვერპლშეწირვა: საქართველოს უახლესი ისტორიის ნარატივები

„ზემოაღნიშნულიდან გამომდინარე, გთხოვთ, მიიღოთ საპროკურორო რეაგირების ზომები, რომლებიც მიზნად ისახავს არ დაუშვას ადმინისტრაციული რესურსის გამოყენება და ამომრჩევლის მოსყიდვა ეროვნული კრების – აფხაზეთის პარლამენტის არჩევნების წინასაარჩევნო კამპანიის მიმდინარეობისას, ასევე, პასუხისმგებლობა დააკისროთ პასუხისმგებელ პირებს“, – ნათქვამია ოპოზიციის ლიდერის განცხადებაში. 

თავად ადგურ არძინბამ გადაწყვიტა არ მიიღოს მონაწილეობა 12 მარტს დანიშნულ საპარლამენტო არჩევნებში, თუმცა მისი ბევრი თანაგუნდელი იყრის კენჭს.

ოპოზიცია ჯერ კიდევ გასული წლის დეკემბერში სთავაზობდა პრეზიდენტ ასლან ბჟანიას საპარლამენტო არჩევნების ერთი წლით გადადებას, რათა ამ პერიოდში მოეხდინათ საარჩევნო სისტემაში ცვლილებების შეტანა, საკონსტიტუციო კომისიის წინადადებების შესაბამისად. 

ცვლილებები ითვალისწინებს მაჟორიტარულიდან შერეულ – მაჟორიტარულ-პროპორციულ საარჩევნო სისტემაზე გადასვლას. 

პრეზიდენტმა ბჟანიამ, იმის მიუხედავად, რომ ეთანხმება ახალ სისტემაზე გადასვლას, მაინც უარი განაცხადა არჩევნების გადადებაზე და ის ჩატარდება ძველი, მაჟორიტარული სისტემით – დეპუტატებს მხოლოდ ერთმანდატიან ოლქებში აირჩევენ. 

თუმცა, აფხაზეთში ზოგიერთებს მიაჩნიათ, რომ ოპოზიციის მცდელობა, ხელისუფლება ამომრჩევლის მოსყიდვაში დაადანაშაულოს, ნაკლებად მოუტანს მას სარგებელს. 

„რა თქმა უნდა, არანაირი პერსპექტივა ამ განცხადებას არ აქვს. და აქ საქმე პროკურატურის შესაძლო ანგაჟირებულობაში არ არის. ოპოზიცია აქტიური და მიზანმიმართული კამპანიის ნაცვლად, უბრალოდ გაქრა პოლიტიკური ველიდან ყველაზე მნიშვნელოვან მომენტში. და ეს არ შეიძლება არ აისახოს კენჭისყრის შედეგებზე. აი, ამიტომ, წინასწარ მზადდება ტექსტები წინასაარჩევნო უკანონობასა და თანმდევ ფალსიფიკაციაზე“, – ასეთ კომენტარს აკეთებს ოპოზიციის ლიდერის ქმედებებზე Telegram-არხი „АБХАЗИЯ-ЦЕНТР“.

საპარლამენტო არჩევნები აფხაზეთში 2022 წლის 12 მარტს გაიმართება. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო