აფხაზეთში მერს ოპოზიციის აგიტატორიზე თავდასხმაში ადანაშაულებენ
აფხაზეთში მერმა აგიტატორი სცემა
ადგილობრივი მედიის ცნობით, 19 იანვარს გაგრის მერი იური ხაგუში, რომელიც მხარს უჭერს ამჟამინდელი ხელისუფლების საპრეზიდენტო კანდიდატს ბადრა გუნბას, თავს დაესხა ოპოზიციის კანდიდატის, ადგურ არძინბას ადგილობრივი შტაბის აქტივისტს, მიხაილ გოლოვინს. მერის დაცვამ გოლოვინს სცემა, მერი კი მას და მის ოჯახს მოკვლით დაემუქრა, თუ არძინბას სასარგებლოდ კამპანიას არ შეწყვეტდა.
15 თებერვალს აფხაზეთში რიგგარეშე საპრეზიდენტო არჩევნები გაიმართება.
საპრეზიდენტო არჩევნებში ხუთი კანდიდატი მონაწილეობს, თუმცა ორი აშკარა ფავორიტია: ბადრა გუნბა და ადგურ არძინბა.
თავდაპირველად, თავდასხმის შესახებ ინფორმაცია ოპოზიციურმა მედიამ გაავრცელა, რის შემდეგაც ოპოზიციის რამდენიმე ასეული მხარდამჭერი გაგრის მერიასთან შეიკრიბა იური ხაგუშთან შესახვედრად. თუმცა ის იქ არ იმყოფებოდა და მისმა თანამშრომლებმა განაცხადეს, რომ მერი შვებულებაშია.
ხელისუფლების მხარდამჭერებმა, თავის მხრივ, სასწრაფოდ განაცხადეს, რომ ეს ყველაფერი ოპოზიციამ მოიგონა. მათი სიტყვების დასადასტურებლად მათ სოციალურ ქსელში გამოაქვეყნეს ინტერვიუ მიხაილ გოლოვინის მამასთან, სადაც ის ამბობს, რომ ცემა არ მომხდარა და იური ხაგუში მათი “კარგი მეზობელია“.
ოპოზიციის თქმით, დაზარალებულის მამამ ეს ინტერვიუ ზეწოლის ქვეშ მისცა.
ბოლოს თავად მიხაილ გოლოვინმაც ისაუბრა. მან დაადასტურა, რომ ის მართლაც სცემეს და აღწერა, როგორ მოხდა ეს.
ოფიციალური პასუხი სამართალდამცავი ორგანოებიდან და ცენტრალური საარჩევნო კომისიიდან ჯერ არ ყოფილა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
