აფხაზეთში მასობრივი პროტესტია რუსეთთან საინვესტიციო შეთანხმების წინააღმდეგ. ითხოვენ პრეზიდენტის გადადგომას. Live

ინფორმაციას იმის შესახებ, რომ აფხაზეთის დე ფაქტო პრეზიდენტმა შეიარაღებული ძალების გამოყენება სცადა საპროტესტო აქციის მონაწილეებისგან სამთავრობო შენობების გასათავისუფლებლად, თავდაცვის სამინისტროს მაღალჩინოსანზე დაყრდნობით აფხაზეთის რამდენიმე დამოუკიდებელი მედიასაშუალება ავრცელებს.

ცნობილია, რომ თავდაცვის მინისტრის მოვალეობის შემსრულებელმა ბესლან ცვიჟბამ (რადგან მინისტრი შვებულებაში იმყოფება) უარი თქვა არმიის ჯავშანტრანსპორტიორების ამ ოპერაციისთვის გამოყოფაზე. მან განაცხადა, რომ არ დაარღვევს კანონს, რომელიც კრძალავს სამხედრო ტექნიკის გამოყენებას საპროტესტო აქციების ჩახშობისთვის.

რუსული პროპაგანდისტული მედიის, „სპუტნიკის“, ჟურნალისტმა პრეზიდენტ ასლან ბჟანიას ჰკითხა: „თითქოს საუბარია, რომ აფხაზეთში ჩავლენ რუსეთის პრეზიდენტის ადმინისტრაციის წარმომადგენლები. ეს მართალია?“
„დაველოდოთ და ვნახავთ,“ – უპასუხა მას ასლან ბჟანიამ.

ბჟანია კვლავ თავის მშობლიურ სოფელ თამიშში იმყოფება და იქ თავისი მინისტრთა კაბინეტის სხდომას მართავს.
„მიუხედავად სახელმწიფო გადატრიალების მცდელობისა, ჩვენ თქვენთან ერთად ვაგრძელებთ მუშაობას და ვდგავართ გაძლიერებულ რეჟიმზე. მთელი ქვეყანა კონტროლდება კანონიერი ხელისუფლებას მიერ, გარდა მიტაცებული სამთავრობო შენობებისა. ძალოვანი სტრუქტურების ნაწილი კვლავ თავის ადგილებზეა,“ – განაცხადა პრეზიდენტმა.

“აფხაზეთში არსებობს მრავალჯერ დადასტურებული პოლიტიკური ტრადიცია: თუ უკმაყოფილო მოქალაქეები დაუპატიჟებლად შედიან პრეზიდენტის კაბინეტში, ქვეყნის ხელმძღვანელი გადაყენებულად ითვლება.” – წაიკითხეთ გამოცემა „ჩეგემსკაია პრავდასა” და JAMnews-ის რედაქტორის ინალ ხაშიგის კომენტარი.

მოთხოვნა მხოლოდ ერთია: პრეზიდენტის ასლან ბჟანიას დაუყოვნებლივ გადადგომა

ოპოზიციის ერთ-ერთმა ლიდერმა ადგურ არძინბამ მიმართა აქციის ათასობით მონაწილეს, რომლებიც გუშინდელი დღის შემდეგ სამთავრობო შენობასტან არიან შეკრებილი:

„ერთი კითხვა მაქვს თქვენთან – პრეზიდენტი ასლან ბჟანია გვთავაზობს, რომ მზადაა გადადგეს, თუ ჩვენ დავტოვებთ პრეზიდენტის ადმინისტრაციის შენობას. პრეზიდენტის მოვალეობას ვიცე პრეზიდენტი ბადრა გუნბა შეასრულებს. ბჟანია ვადამდელ საპრეზიდენტო არჩევნებს დანიშნავს და თავად მიიღებს მონაწილეობას. მინდა ვიცოდე თქვენი აზრი: ეთანხმებით ამას?”

აქციის მონაწილეებმა ერთხმად უპასუხეს: „არა, სასწრაფოდ წავიდეს!“

ამასობაში, პრეზიდენტის ადმინისტრაციის სხდომათა დარბაზში, რომლის გათავისუფლებასაც ასლან ბჟანია ითხოვს, ოპოზიციის საკოორდინაციო საბჭოს სხდომა მიმდინარეობს ინტელიგენციის წარმომადგენლებთან.

რამდენიმე ციტატა შეხვედრიდან:

მხატვარი ნუგზარ ლოგუა, პრეზიდენტ ასლან ბჟანიას ყოფილი მრჩეველი: „ჩვენ ერთნი ვართ, გასაყოფი არაფერი გვაქვს. პრეზიდენტი ასლან ბჟანია ანტისახალხო პოლიტიკას ატარებდა და არავის ითვალისწინებდა. ინტელიგენცია მისი ნათქვამით არ იმართება, არც უხუცესტა საბჭო. და ასევე, არც ოპოზიცია. ბჟანიას სურდა გადაეწერა აფხაზეთის  ისტორიული გზა თავისუფლებისაკენ, ეთნიკურობის შენარჩუნებისაკენ. მას სურდა ჩვენი სისხლით ნაყიდი მიწა თავისი მეგობრებისთვის, ოლიგარქებისთვის დაეთმო და ამით ხალხისთვის მომავალი წაერთმია“.

ოპოზიციის ერთ-ერთი ლიდერი ადგურ არძინბა: „ბჟანიას აქვს  ხელისუფლებაში დარჩენის სასოწარკვეთილი მცდელობები, მაგრამ ის წარმატებას ვერ მიაღწევს. ჩვენი ამოცანაა ავუხსნათ, რომ მისი დრო გავიდა. ის წყნარად და მშვიდად უნდა წავიდეს და მერე ჩვენც წავალთ აქედან“.

პრეზიდენტის მშობლიურ სოფელ ტამიშში, სადაც ის გუშინ ღამით გაემგზავრა, მისი მხარდამჭერებთან შეხვედრა მიმდინარეობს. პრეზიდენტის პრესსამსახურის ცნობით, შეხვედრაში მონაწილეობენ სხვა სოფლების მცხოვრებლებიც.

„ამბობენ, რომ აფხაზეთიდან წამოვედი, მაგრამ აქ ვარ, აფხაზეთში. ჩვენ შევიკრიბეთ არა ჩემი ძალაუფლების შესანარჩუნებლად, არამედ აფხაზეთის სახელმწიფოებრიობის შესანარჩუნებლად. ვინც ახლა პრეზიდენტის ადმინისტრაციაშია (შენობა ღამით ათასობით მომიტინგემ დაიკავა), დატოვონ შენობა. ამის შემდეგ, დავნიშნავ ახალ არჩევნებს და დავტოვებ თანამდებობას”.

ორი განცხადება აფხაზეთის მთავრობისგან:

1. პრეზიდენტმა ასლან ბჟანიამ ხელი არ მოაწერა დოკუმენტს რუსული ინვესტიციების შესახებ შეთანხმების პარლამენტიდან გაწვევის შესახებ, იტყობინება მისი პრესსამსახური. გუშინ იმავე პრესსამსახურმა გაავრცელა შეტყობინება, რომ მიღებული იქნა გადაწყვეტილება პარლამენტიდან ამ შეთანხმების გაწვევის შესახებ.

2. შინაგან საქმეთა სამინისტრო იუწყება, რომ მონიტორინგს უწევს ვითარებას, „მიუხედავად იმ მძიმე შიდაპოლიტიკური მდგომარეობისა, რომელიც რესპუბლიკაში შეიქმნა“.

საკოორდინაციო საბჭოს განცხადებაში ნათქვამია: „ასლან ბჟანიას აქვს სასოწარკვეთილი მცდელობები შეინარჩუნოს ძალაუფლება,  ფორმალურად. მისი მმართველობის დრო უკვე დასრულდა. ის, რაც დღეს აფხაზეთში ხდება, არის საზოგადოების ბუნებრივი პასუხი ასლან ბჟანიას მიერ გატარებულ ანტიხალხურ პოლიტიკაზე, რომელიც მიზნად ისახავს მხოლოდ ახლობლებისა და ახლობლების ვიწრო წრის გამდიდრებას. ჩვენი ამოცანაა მივაღწიოთ ბჟანიას გადადგომას და ქვეყანაში პოლიტიკური სიტუაციის სტაბილიზაციას. ჩვენ პასუხისმგებლობით ვაცხადებთ, რომ ყველა ორგანო, რომელიც უზრუნველყოფს რესპუბლიკის გამართულ მუშაობას, აგრძელებს მუშაობას ჩვეულ რეჟიმში“.

ღამით აფხაზეთში განსაკუთრებული მოვლენები აღარ მომხდარა.  პრეზიდენტი ასლან ბჟანია, რომელმაც უარი თქვა გადადგომაზე, მიუხედავად ოპოზიციისა და ათასობით მომიტინგის მოლოდინისა, რადარიდან ღამის დასაწყისში გაუჩინარდა, მაგრამ შემდეგ გამოჩნდა.

მან სოციალურ ქსელში გამოაქვეყნა ვიდეო, რომელშიც ადასტურებს, რომ მშობლიურ სოფელ ტამიშში იმყოფებოდა. ოპოზიცია ამტკიცებდა, რომ ის რუსეთის სამხედრო ბაზაზე გაიქცა. თუმცა, ახლაც ბევრი კითხულობს, სად წავიდა ასლან ბჟანია სოფელში ჩასვლის ვიდეოს გადაღების შემდეგ.

ოპოზიციის საკოორდინაციო შტაბის ინფორმაციით, მოხალისეები მთელი ღამის განმავლობაში მორიგეობდნენ სამთავრობო შენობებში, რომლებიც წინა დღეს აქციის მონაწილეებმა დაიკავეს. არის განცხადებები: სანამ ბჟანია არ მოაწერს ხელს გადადგომას, ხალხი არ დაიშლება.

დრო, რომელიც ოპოზიციამ მისცა პრეზიდენტს გადადგომის შესახებ განცხადებისთვის, გავიდა. სიტუაცია უცნაურია.  პირველი: უცნობია ასლან ბჟანიას ადგილსამყოფელი მას შემდეგ, რაც განაცხადა, რომ თანამდებობას არ დატოვებდა და მინისტრთა კაბინეტთან ერთად გააგრძელებდა მუშაობას.  პრეზიდენტის პრესსამსახურის განცხადებით, “ის მშობლიურ სოფელ ტამიშში წავიდა”.  ამან ბევრი გააკვირვა – პრეზიდენტი, ათასობით ადამიანის პროტესტის და სამთავრობო შენობების ბლოკირების ფონზე, ღამით სოფელში მიემგზავრება.

ოპოზიციამ განაცხადა, რომ ფაქტობრივად, ასლან ბჟანია რუსული სამხედრო ბაზის ტერიტორიაზე გადავიდა. ამასთან, ბჟანიას წასვლის შემდეგ,  მისმა მხარდამჭერებმაც და თითქმის ყველა უშიშროების ძალებმა დატოვეს სახელმწიფო უსაფრთხოების სამსახურისა და შინაგან საქმეთა სამინისტროს ტერიტორია.

და, მეორეც: რატომ გამოაცხადა მოულოდნელად ბჟანიამ, რომ ხელისუფლებაში დარჩა, მაშინ, როცა მომლაპარაკებლების თქმით, მისი გადადგომა დასრულებული საქმე იყო და მხოლოდ მოვალეობის შემსრულებელის არჩევა იყო დარჩენილი.

„ერთადერთი მიზეზი, რის გამოც ასლან ბჟანიამ გადაიფიქრა წასვლა, იყო მისი რუსი კურატორების დირექტივა. მოსკოვის, თუ ადგილობრივი საელჩოს“, – წერს ტელეგრამის არხი ABKHAZIA-CENTER.

ოპოზიციის ერთ-ერთმა ლიდერმა, ადგურ არძინბამ განაცხადა,  რომ „ასლან ბჟანია დეზინფორმაციას აწვდის რუსეთის უშიშროების ძალებს და ეუბნება მათ სრულ სისულელეს: სავარაუდოდ,  მომიტინგეები რუსეთის სასაზღვრო პუნქტებზე თავდასხმას ამზადებენ“.

„მეტი სისულელის მოფიქრება შეუძლებელია. რუსეთი ჩვენი სტრატეგიული პარტნიორია, აფხაზეთის არც ერთი მოქალაქე ვერც კი იფიქრებდა ამგვარ პროვოკაციებზე ჩვენი უსაფრთხოების ერთადერთი გარანტიის წინააღმდეგ. ხალხის პროტესტი მიმართულია მხოლოდ ბჟანიას დესტრუქციული პოლიტიკის წინააღმდეგ. ხალხის მთავარი და ერთადერთი მოთხოვნაა, ხელისუფლების ყველა პროვოკაციის შემდეგ, პრეზიდენტის გადადგომაა. აგონიაში მყოფი ასლან ბჟანია ყველა შესაძლო საშუალებით ცდილობს სკამს ჩაეჭიდოს, მაგრამ ეს უკვე შეუძლებელია – ხალხი ბოლომდე იდგება“.

ამ გზავნილით მივიდნენ პრეზიდენტთან ოპოზიციის წარმომადგენლები,.

თუ ეს მოთხოვნა არ დაკმაყოფილდება, ათასობით მომიტინგე გადაინაცვლებს სახელმწიფო უსაფრთხოების შენობის დასაკავებლად, სადაც ამჟამად ასლან ბჟანია იმყოფება – განაცხადეს ოპოზიციის ლიდერებმა.

ასლან ბჟანიამ მხარდამჭერებს შემდეგი სიტყვებით მიმართა:

„დღევანდელმა მოვლენებმა კიდევ ერთხელ დააყენა ჩვენი რესპუბლიკა დიდი პრობლემების წინაშე. აფხაზეთის ხელმძღვანელობა, პრეზიდენტი, ვიცე-პრეზიდენტი, პრემიერ-მინისტრი, მთავრობის წევრები – ყველა ადგილზეა და გააგრძელებს მუშაობას. ამიტომ, გთხოვთ, არ აჰყვე პროვოკაციებს. აქ ვარ აფხაზეთში. ჩვენ გავაგრძელებთ მუშაობას. ჩვენ გავაძლიერებთ ძალისხმევას ამ მოვლენების შედეგების აღმოსაფხვრელად. გმადლობთ ყველა მშვიდობიანი მოქალაქისა და უნიფორმაში ჩაცმული ადამიანების მხარდაჭერისა და სამსახურისთვის“.

ვიდეო: «Нужная газета»

ოპოზიციონერმა დეპუტატმა კან კვარჩიამ  გაავრცელა პრეზიდენტ ასლან ბჟანიასთან მოლაპარაკების შუალედური შედეგები.

მისი თქმით, მთავარი თემაა ვინ გახდება პრეზიდენტის მოვალეობის შემსრულებელი.  კვარჩიას თქმით, ამჟამად სამი ვარიანტია.

1. ხელისუფლება ვარაუდობს, რომ მოვალეობის შემსრულებლად დაინიშნოს მოქმედი ვიცე-პრეზიდენტი ბადრუ გუნბა, მინისტრთა კაბინეტის უფროსად კი გაერთიანებული ოპოზიციის წარმომადგენელი.

2. ოპოზიციამ პრეზიდენტის მოვალეობის შემსრულებლად პარლამენტის თავმჯდომარის ლაშა აშუბას დანიშვნა შესთავაზა.

3. მესამე ვარიანტია მესამე მხარის კანდიდატის, კომპრომისული ფიგურის პოვნაა, რომელიც შეითავსებს ორივე პოზიციას – პრეზიდენტისა და პრემიერ მინისტრის.

პარლამენტის თავმჯდომარე ლაშა აშუბა დაბრუნდა ასლან ბჟანიასთან შეხვედრიდან და ამჟამად მიმდინარეობს მოლაპარაკებები საკოორდინაციო საბჭოს წარმომადგენლებთან პოლიტიკური კრიზისიდან გამოსავლის მოსაძებნად, რომელიც გაერთიანებულმა ოპოზიციამ და საზოგადოებრივმა ორგანიზაციებმა ერთად შექმნეს. სავარაუდოდ, განხილვის მთავარი საგანია, ვინ გახდება პრეზიდენტის მოვალეობის შემსრულებელი ბჟანიას გადადგომის შემდეგ.

რამდენიმე ათასი ადამიანი კვლავ მყარად დგას სამთავრობო შენობის კომპლექსთან, რომელსაც სრულად აკონტროლებენ აქციის მონაწილეები. ისინი ასლან ბჟანიას ოფიციალურ გადადგომას ელოდებიან.

რა ხდება ახლა სოხუმში –   AIASHARA-ს უახლესი ინფორმაცია:

„დეპუტატთა ჯგუფი, სპიკერის ხელმძღვანელობით, ამჟამად სახელმწიფო უსაფრთხოების სამსახურში იმყოფება, სადაც არის პრეზიდენტი და აწარმოებს მასთან მოლაპარაკებას მისი გადადგომის შესახებ. როგორც ვიცით, ეს უკვე მესამე დელეგაციაა, რომელიც პრეზიდენტს  ვითარების უიმედობას უხსნის. მისი გადადგომის მოთხოვნა არის ხალხის მოთხოვნა, რომელიც არ დაუშვებს ქვეყნის დანგრევას და ახალგაზრდებისთვის მომავლის წართმევას. სახელმწიფო უსაფრთხოების სამსახურის შენობაში დიდი რაოდენობით უშიშროების ძალები არიან შეკრებილი. ბჟანია უარს ამბობს თანამდებობის დატოვებაზე.

ყველა კითხვა, რასაც ახლა ხალხი პრეზიდენტს უსვამს – საშინაო საქმეა, ამას არაფერი აქვს საერთო ჩვენს მეგობარ რუსეთთან. აქ მნიშვნელოვანია გვესმოდეს, რომ არის საკითხები, სადაც შეგვიძლია კომპრომისზე წასვლა და არის ისეთებიც, სადაც არ შეგვიძლია დათმობა, რადგან ეს ის საკითხებია, რისი გაკეთებაც მხოლოდ მომავლის ქვეყანას შეუძლია, ეს არის ის, რისთვისაც ბევრმა ადამიანმა გაწირა სიცოცხლე. ველოდებით, რით დაბრუნდება ეს დელეგაცია“.

AIASHARA-ს წარმომადგენელი პრეზიდენტის ადმინისტრაციის შენობიდან საუბრობს, რომელიც რამდენიმე საათის წინ ათასობით მომიტინგემ აიღო.

ტელეგრამის არხი АБХАЗИЯ-ЦЕНТР სვამს საინტერესო კითხვებს:

„სად არის საგარეო საქმეთა სამინისტრო, სახელმწიფო დუმა, ფედერაციის საბჭო, მარია ზახაროვა, მარგარიტა სიმონიანი და ა.შ. პერსონაჟები, რომლებიც ფაქტობრივად სჯიან ყველას თავისუფალი აზროვნებისა და დაუმორჩილებლობის მცდელობისთვის?

აქ კი, აფხაზეთში, სადაც რუსული ჯარია განლაგებული, რუსი მესაზღვრეები მორიგეობენ, რუსეთის ფედერაცია აეროპორტს აშენებს, პრორუსული შეთანხმება არ მოახდინეს და მოსკოვიდან ჩამოსული პრეზიდენტი ჩამოაგდეს. გაუგონარი დაუმორჩილებლობა. მაგრამ მოსკოვი დუმს. იქნებ ის რაღაცას აპირებს?”

საპროტესტო აქციის მონაწილეებმა, რომლებმაც პრეზიდენტის ადმინისტრაციის შენობა დაიკავეს, მისი კაბინეტის კარიდან აბრა ასლან ბჟანიას გვარით ჩამოხსნეს და სანაგვეში გადააგდეს.

რუსეთის საგარეო საქმეთა სამინისტრო განცხადებას ავრცელებს:

„რუსეთი შეშფოთებით ადევნებს თვალს მეზობელ აფხაზეთში განვითარებულ მოვლენებს, სადაც შიდაპოლიტიკური წინააღმდეგობები კვლავ გამძაფრდა. ოპოზიციურმა ძალებმა, სამწუხაროდ, შესაძლებლად არ მიიჩნიეს ქვეყნის ლეგიტიმურ ხელისუფლებასთან უთანხმოების მოგვარება ცივილიზებული, ურთიერთპატივისცემის მქონე დიალოგის გზით და გასცდნენ სამართლებრივ ჩარჩოებს, რამაც გამოიწვია კონფლიქტის ესკალაცია. შედეგად, რესპუბლიკაში შეიქმნა კრიზისული ვითარება და ეს, განურჩევლად მისი შედეგისა, ანელებს აფხაზეთის განვითარებას. კერძოდ, აშკარაა, რომ დღევანდელი სცენარები სულაც არ არის ხელსაყრელი უცხოური ინვესტიციების მოზიდვისთვის, რაც მნიშვნელოვანი ფაქტორია რესპუბლიკის სოციალურ-ეკონომიკური აღდგენისთვის.

რუსული მხარე აფხაზეთის შიდა პროცესებში ჩარევის გარეშე მოელის, რომ შექმნილი ვითარება მხოლოდ მშვიდობიანი პოლიტიკური გზით გადაწყდება. ამ შემთხვევაში, რა თქმა უნდა, მკაცრად უნდა იყოს დაცული აფხაზეთის კანონები, მათ შორის საზოგადოებრივი წესრიგის დაცვის კუთხით.

შექმნილ პირობებში, რუსეთის საგარეო საქმეთა სამინისტრო იძულებულია რუსეთის მოქალაქეებს მოუწოდოს თავი შეიკავონ აფხაზეთში მოგზაურობისგან, მათ შორის ტურისტული მოგზაურობისგან. მათ კი, ვინც ამ ტერიტორიაზე იმყოფება, გამოიჩინონ მეტი სიფრთხილე, არ მიუახლოვდნენ არეულობის ადგილებს და, თუ ეს შესაძლებელია, დატოვონ ქვეყანა“.

ოპოზიციის ერთ-ერთი ლიდერი ადგურ არძიბა მოვლენების განვითარებაზე საუბრობს:

„გვაქვს ინფორმაცია, რომ მოქმედი პრეზიდენტი ცდილობს დეზინფორმაცია მიაწოდოს ჩვენს სტრატეგიულ პარტნიორს რუსეთს, თითქოს აფხაზეთში სახელმწიფო გადატრიალება განხორციელდა ვინმე პროთურქის, პროდასავლური ძალების მიერ. ასლან ბჟანია ახლა ზის და მოსკოვს ასეთი გზავნილით ურეკავს. ეს არის აბსოლუტური ტყუილი.

ბოლო მცდელობა ღამით გვქონდა – შევხვდით დეპუტატებს და ვთხოვეთ, ეს შეთანხმება დღის წესრიგიდან ამოეღოთ, რათა ხალხი დამშვიდებულიყო. ჩვენი წინადადება იგნორირებული იყო. დღეს, როცა პარლამენტის სესიაზე შევიკრიბეთ, დეპუტატებს კვლავ ვთხოვეთ ხალხის დამშვიდება და საკითხის დღის წესრიგიდან ამოღება.

ჩვენს წინადადებებში მთავარია შემდეგი – სულ რამდენიმე თვეში საპრეზიდენტო არჩევნები უნდა გაიმართოს, აქ მდგომთაგან არცერთს არ სურდა მოვლენების ისეთი განვითარება, როგორიც ახლაა. ჩვენ შევთავაზეთ, რომ ამ შეთანხმების საკითხი პრეზიდენტმა თავის საარჩევნო პროგრამაში შეიტანოს. თუ ხალხი მხარს დაუჭერს, ასეც იქნება. მაგრამ ეს წინადადება უგულებელყვეს.

ბოლო ორწელიწად ნახევრის განმავლობაში ასლან ბჟანია ყოველგვარ დიალოგზე უარს ამბობს. კულმინაცია იყო მისი განცხადება უშიშროების ძალებთან, რომ ჩვენთან სალაპარაკო არაფერია, რომ ყველა ექსტრემისტად მივაჩნივართ. მიუხედავად ამისა, ჩვენ ვცდილობდით დაგვერწმუნებინა, რომ ექსტრემალური მოვლენები არ გვჭირდებოდა. ჩვენ ვთქვით, მშვიდად მივუდგეთ არჩევნებს.

შემდეგ, თქვენ იცით, რა მოხდა. დეპუტატებმა ვერ შეძლეს შეკრება და ხელშეკრულების რატიფიცირებაზე უარის თქმა, რასაც ვითხოვდით. პრეზიდენტმა საზოგადოების დასაბუთებულ მოთხოვნებს ვერ უპასუხა, დააიგნორა. ახლა უკვე შექმნილია დეპუტატთა ჯგუფი, მათ პრეზიდენტთან მხოლოდ ერთი მოთხოვნა აქვთ: მისი გადადგომა და ვადამდელი საპრეზიდენტო არჩევნების დანიშვნა.

ამჟამად ველოდებით პასუხს.

ბჟანიას ვთხოვეთ წავიდეს, რომ სიტუაცია კიდევ არ გაუარესედეს, შეტაკებები არ მოხდეს. ვიმედოვნებთ, რომ ვინც მოლაპარაკებებზე შევიდა, დადებითი შედეგით გამოვა“.

აქციის მონაწილეებმა პრეზიდენტის ადმინისტრაცია დაიკავეს და მის გადადგომამდე არ აპირებენ წასვლას

ოპოზიციის წარმომადგენლები პრეზიდენტთან წავიდნენ ულტიმატუმით, რომ ის გადადგეს. როგორც ჩანს, ასლან ბჟანიას თანამშრომლებმა ახალი რეალობა არ იციან. სულ რაღაც ნახევარი საათის წინ გაავრცელეს მესიჯი რუსულ ინვესტიციებზე შეთანხმების გაუქმების შესახებ, რაც პრეზიდენტის გადადგომის მოთხოვნის ფონზე დაგვიანებულ გადაწყვეტილებას ჰგავს.

პრეზიდენტის ადმინისტრაციის მთავარი დარბაზი აქციის მონაწილეებმა დაიკავეს. ისინი აპირებენ დაელოდონ პრეზიდენტის ასლან ბჟანიას გადადგომას

ვითარება კვლავ მკვეთრად დაიძაბა.

ათასობით ადამიანმა პარლამენტის შენობის კარ-ფანჯარა ჩაამსხვრია და შენობაში შევიდა.

აფხაზეთის პრეზიდენტის პრესსამსახური იუწყება, რომ „პრეზიდენტის ადმინისტრაცია ამზადებს დოკუმენტს კანონპროექტის „რუსეთის ფედერაციის მთავრობასა და აფხაზეთის რესპუბლიკის მთავრობას შორის “აფხაზეთის რესპუბლიკის ტერიტორიაზე რუსეთის იურიდიული პირების მიერ საინვესტიციო პროექტების განხორციელების შესახებ” შეთანხმების “ გაუქმების შესახებ. ეს გადაწყვეტილება რესპუბლიკაში სიტუაციის სტაბილიზაციის მიზნით მიიღეს“

აფხაზეთის პარლამენტში მშვიდი ვითარებაა. პრეზიდენტის ადმინისტრაციაში ხელისუფლებისა და ოპოზიციის წარმომადგენლებს შორის მოლაპარაკებები იწყება. შენობაში პარლამენტის წევრები შევიდნენ.

ჯერჯერობით უცნობია, ვინ შედის თითოეულ ჯგუფში. როგორც ვიცით, თავად პრეზიდენტი ასლან ბჟანია შენობაში არ იმყოფება.

ექსპერტები ვარაუდობენ, რომ მოლაპარაკების თემა იქნება არა მხოლოდ ხელშეკრულების რატიფიცირებაზე უარის თქმა, არამედ პრეზიდენტის ვადამდელი გადადგომა. მოლაპარაკებებში, სავარაუდოდ, პრემიერ-მინისტრი ალექსანდრე ანქვაბი მიიღებს მონაწილეობას.

აქციის მონაწილეები სატვირთო მანქანებით გადაადგილდებოდნენ და სამთავრობო შენობის კომპლექსის მიმდებარედ ღობე დაანგრიეს. უსაფრთხოების ძალები მათ წინააღმდეგობას თითქმის არ უწევენ.

ვითარება დაიძაბა, აქციის მონაწილეები ცდილობენ შეიჭრან სამთავრობო შენობებში, უსაფრთხოების ძალები წინააღმდეგობას უწევენ, მაგრამ არც ისე აქტიურად.

ხელისუფლება აშკარად დიდ პროტესტს ელოდა, რადგან ამისთვის ღამიდან მოემზადა. ცენტრი გადაკეტილი იყო, ასობით სამხედრო მანქანამ და სატვირთო მანქანამ გადაკეტა მთელი ტერიტორია სამთავრობო შენობების მიმდებარედ  და კონცენტრირებული იყო უსაფრთხოების ძალების ათასობით თანამშრომელი.

35 დეპუტატიდან დილის სხდომაზე 21 მივიდა, დანარჩენები ხელისუფლების მხარდამჭერები იყვნენ. ვინც არ მივიდა, სხვადასხვა მიზეზი დაასახელა, ზოგმა ავადმყოფობა მოიმიზეზა, ზოგმა თქვა, რომ სასწრაფოდ წასასვლელი გახდა.

გასული კვირის განმავლობაში აფხაზეთის სხვადასხვა რეგიონში ამომრჩევლებმა შეხვედრები გამართეს დეპუტატებთან, რათა დაერწმუნებინათ ისინი არ მოეხდინათ შეთანხმების რატიფიცირება. ბევრი დეპუტატი დაჰპირდა, რომ  მხარს არ დაუჭერდა.

11 ნოემბერს, ერთ-ერთი ასეთი შეხვედრის შემდეგ, ხულიგნობის ბრალდებით ხუთი ოპოზიციონერი დააკავეს. ამის საპასუხოდ ოპოზიციამ საპროტესტო აქცია მოაწყო და დაკავებულები  24 საათზე ნაკლებ დროში გაათავისუფლეს.