აფხაზეთში ე.წ. საპრეზიდენტო კანდიდატების დასკვნითი წინასაარჩევნო დებატები გაიმართა
საპრეზიდენტო კანდიდატების სატელევიზიო დებატები აფხაზეთში
აფხაზეთში ე.წ. საპრეზიდენტო კანდიდატებმა ტელედებატებში მიიღეს მონაწილეობა – ეს ფაქტობრივად წინასაარჩევნო კამპანიის ეპილოგი იყო 15 თებერვლის კენჭისყრის წინ.
სამსაათიან დებატებში მონაწილეობა მიიღო ხუთივე კანდიდატმა.
თავდაპირველ ფავორიტებად სახელდებიან ხელისუფლების კანდიდატი ბადრა გუნბა, რომელსაც აქტიურად უჭერს მხარს მოსკოვი, და ოპოზიციის ლიდერი ადგურ არძინბა.
თუმცა, კიდევ ორი კანდიდატი – აფხაზეთის ყოფილი სავაჭრო წარმომადგენელი რუსეთში, ოლეგ ბარციცი, და კონტროლის პალატის ყოფილი ხელმძღვანელი, რობერტ არშბა – საკუთარ თავს “მესამე ძალად“ წარმოაჩენენ და წინასაარჩევნო მარათონში მხოლოდ სტატისტების როლს არ დასჯერდნენ.
ამის თქმა ნაკლებად შეიძლება მეხუთე კანდიდატზე – ბანკირ ადგურ ხურხუმალზე, რომელიც აშკარა აუტსაიდერად მოიაზრება.
მიუხედავად ამისა, სწორედ ხურხუმალი გახდა დებატების ყველაზე დასამახსოვრებელი მონაწილე – თავისი ექსცენტრული გამოსვლით მან მაყურებლების ყურადღება მიიპყრო. მიუხედავად იმისა, რომ ცოტას საუბრობდა, მისი გამონათქვამები სოციალურ ქსელებში მყისიერად მემებად იქცა: “რუსეთმა ჩვენი დამოუკიდებლობა აღიარა და შემდეგ ისევ წაიღო“, “საზღვრები პერიმეტრის გარშემო უნდა ჩავკეტოთ”, ჩვენ თავად უნდა ვირჩინოთ თავები“ და სხვა.
დაპირისპირება ვერ შედგა, მაგრამ პოლიტიკური პოზიციები გამოიკვეთა
ტელედებატებზე ბევრს ელოდა მწვავე დაპირისპირებას ადგურ არძინბასა და ბადრა გუნბას შორის, თუმცა სრულფასოვანი სიტყვიერი დუელი არ შედგა – დებატების რეგლამენტით, კანდიდატს მხოლოდ ერთი შეკითხვის დასმის უფლება ჰქონდა ოპონენტის მისამართით.
მიუხედავად ამისა, ესეც საკმარისი აღმოჩნდა, რომ არძინბასა და გუნბას შორის ცხარე კამათი გაჩაღებულიყო. დისკუსიაში ოლეგ ბარციცმა და რობერტ არშბამ ოპოზიციონერ არძინბას მხარი დაუჭირეს, თუმცა მას წარსული საქმიანობაც შეახსენეს – მათ შორის, 2015-2020 წლებში ხელისუფლებაში ყოფნისას დაშვებული შეცდომები.
გუნბას, როგორც გადაყენებული პრეზიდენტის, ასლან ბჟანიას მემკვიდრეს, ბევრი სწორედ იმ საკითხებზე უსმენდა, რომლებიც მის წინამორბედს პოლიტიკურ თანამდებობად დაუჯდა – მათ შორის, ბინების შესახებ სადავო კანონსა და რუსეთ-აფხაზეთის საინვესტიციო შეთანხმებაზე.
ბადრა გუნბას თქმით, თავდაპირველად მხარს უჭერდა როგორც ბინების შესახებ კანონს, ისე საინვესტიციო შეთანხმებას, თუმცა ეს იყო მისი პირადი პოზიცია, რომელიც, როგორც თავად აღიარა, “შეიძლება, მცდარიც ყოფილიყო“. გუნბას განცხადებით, თუ საზოგადოება ამ შეთანხმებების მიღებას არ მიიჩნევს საჭიროად, ის ხალხის ნებას დაემორჩილება.
დებატების მსვლელობისას ადგურ არძინბამ და ოლეგ ბარციცმა ერთხმად განაცხადეს, რომ აფხაზეთის ისტორიაში ეს საპრეზიდენტო არჩევნები ყველაზე ბინძურია.
ადგურ არძინბამ განსაკუთრებით გაუსვა ხაზი იმას, რომ ხელისუფლების კანდიდატის, ბადრა გუნბას მხარდასაჭერად სოხუმში რუსეთის პოლიტიკური ტექნოლოგების მთელი გუნდი ჩავიდა, რომლებიც ოპონენტებზე მიზანმიმართულ დისკრედიტაციას ახორციელებენ. მისი თქმით, მათ დაუყოვნებლივ უნდა დატოვონ ქვეყანა.
ოლეგ ბარციცმა კი გუნბას საარჩევნო კამპანიაზე გაწეულ უზარმაზარ ფინანსურ ხარჯებზე ისაუბრა და პარალელი გაავლო ორი წლის ბავშვის, ლეიკემიით დაავადებული ლია ადლეიბას მძიმე მდგომარეობასთან. ბავშვი სასწრაფოდ საჭიროებს მკურნალობას, რომლის ღირებულებაც 26 მილიონ რუბლს შეადგენს.
“ამ ბავშვის ბედი ჩვენს საზოგადოებრივ აქტივისტებზე, მოხალისეებსა და ქველმოქმედებზეა დამოკიდებული. ჩემთვის კი ეს ანალოგია აფხაზეთის მომავლის საკითხსაც ეხება – ქვეყნის ბედს არც უზარმაზარი ფინანსური რესურსი გადაწყვეტს, არც ადმინისტრაციული რესურსი, არც რეკლამებით სავსე ვიზიტები და ტურისტული ავტობუსების კოლონები, არამედ თავად აფხაზი ხალხი.“ – განაცხადა ოლეგ ბარციცმა.
