აფხაზეთში, ჩინოვნიკებს თავიანთი შემოსავლების დეკლარირება დაავალდებულეს
მოქალაქეთა საინიციატივო ჯგუფის რამდენიმეწლიანმა ბრძოლამ აფხაზეთში კორუფციის წინააღმდეგ, შედეგი გამოიღო – ჩინოვნიკებს თავიანთი შემოსავლების დეკლარირება დაევალათ. 10 ივნისს, პარლამენტის მიერ მიღებული კანონი ოდნავ შემცირებული იყო თავდაპირველ კანონპროექტთან შედარებით. მაგრამ მისი ლობისტები – საინიციატივო ჯგუფი, რომელიც რიგითი მოქალაქეებისგან შედგება – შედეგით კმაყოფილები არიან.
სამი წლის განმავლობაში, კანონპროექტი განხილვის სტადიაში იყო პარლამენტში. მისი მიღება რამდენჯერმე გადაიდო, რის გამოც, საინიციატივო ჯგუფის მონაწილეები პერიოდულად პიკეტებს აწყობდნენ, ცალკეული წევრები კი შიმშილობასაც აცხადებდნენ.
ახლა, ჩინოვნიკებს, თავიანთი ოჯახის წევრებთან ერთად მოეთხოვებათ, უკვე პირველი ივლისიდან შეავსონ თავიანთი შემოსავლისა და გასავლის დეკლარაციები.
ცნების, „ოჯახის წევრების“ ქვეშ, კანონის თანახმად მოხვდნენ: მეუღლე, არასრულწლოვანი შვილები, დეკლარანტის მშობლები, ასევე, სრულწლოვანი შვილები, ღვიძლი ძმები და დები, რომლებიც დეკლარანტზე არიან დამოკიდებული.
საინიციატივო ჯგუფი მოითხოვდა, რომ დეკლარაციები უპირობოდ შეევსოთ ჩინოვნიკების ძმებს, დებსა და შვილებს. თუმცა, დეპუტატებმა ასეთ ფორმულირებას მხარი არ დაუჭირეს.
მიღებული კანონის თანახმად, თუკი ჩინოვნიკის დეკლარაციაში წარმოდგენილი იქნება არასწორი ან არასრული მონაცემები, დეკლარანტი შეიძლება გაათავისუფლონ სახელმწიფო სამსახურიდან სამომავლო აღდგენის უფლების გარეშე.
ანტიკორუფციული კანონის ერთ-ერთ ინიციატორს, ასტამურ კაკალიას დეკლარაციის შესახებ კანონის მიღება დიდ მიღწევად მიაჩნია, რადგან „ნახევრად ფეოდალური სისტემა შეიცვლება საჯარო სამსახურის რეალური სისტემით“.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
