აფხაზეთში არჩევნების წინ რუსული მედია ცდილობს ოპოზიციის კანდიდატი "თურქეთის აგენტად“ წარმოაჩინოს
აფხაზეთის ოპოზიციის ლიდერი პროთურქულად არის წარმოდგენილი
რუსული მედია და ბლოგერები აფხაზეთის ოპოზიციონერ ლიდერსა და საპრეზიდენტო კანდიდატს, ადგურ არძინბას, პროთურქულ განწყობებში ადანაშაულებენ.
ამ ბრალდების ერთადერთი “დამადასტურებელი მტკიცებულება“ ის არის, რომ 43 წლის არძინბამ განათლება თურქულ სკოლა “ბაშარან-კოლეჯში“ მიიღო.
31 იანვარს გამართულ პრესკონფერენციაზე რუსეთის სახელმწიფო ტელეკომპანია RT-ის (Russia Today) კორესპონდენტმა არძინბას ჰკითხა, ინარჩუნებს თუ არა კონტაქტს თურქ თანაკლასელებთან. ჟურნალისტს, სავარაუდოდ, არ ჰქონდა ინფორმაცია, რომ “ბაშარან-კოლეჯი“ აფხაზეთში ფუნქციონირებდა, შესაბამისად, მისი თანაკლასელებიც აფხაზები იყვნენ.
მიუხედავად იმისა, რომ არძინბას თურქეთთან რეალური კავშირები არ აქვს, რუსული მედია აგრძელებს მისი “პროთურქულ კანდიდატად“ წარმოჩენის მცდელობას და ამტკიცებს, თითქოს ის რუსეთის წინააღმდეგ არის განწყობილი.
ეს ნარატივი გარკვეულწილად შენელდა მას შემდეგ, რაც რამდენიმე დღის წინ კრემლის ადმინისტრაციის პირველმა მოადგილემ, სერგეი კირიენკომ, რომელმაც ახლა აფხაზეთის საკითხებზე კონტროლი გადაიბარა, განაცხადა, რომ მოსკოვი პატივისცემით მიიღებს აფხაზი ხალხის ნებისმიერ არჩევანს და ითანამშრომლებს ახალ პრეზიდენტთან, ვინც არ უნდა იყოს ის.
თუმცა, მიუხედავად იმისა, რომ რუსული ფედერალური არხები უკვე ცდილობენ მსგავსი რიტორიკისგან თავის შეკავებას, Telegram-არხები და ბლოგერები კვლავ განაგრძობენ ადგურ არძინბას “თურქეთის აგენტად“ მხილებას.
აფხაზეთის საპრეზიდენტო არჩევნების ისტორიაში ეს უკვე მეორე შემთხვევაა, როცა კანდიდატს ანტირუსულ ელემენტად და “უცხო ქვეყნის აგენტად“ აცხადებენ.
პირველი პრეცედენტი 20 წლის წინ მოხდა. მაშინ მოსკოვმა პრეზიდენტობის კანდიდატად რაულ ხაჯიმბას მხარდაჭერა გადაწყვიტა, ხოლო მისი მთავარი ოპონენტი, სერგეი ბაღაფში, რუსმა პოლიტტექნოლოგებმა პროქართველ პოლიტიკოსად წარმოაჩინეს. თუმცა, აფხაზურმა საზოგადოებამ ეს მცდელობა მტკივნეულად აღიქვა და შედეგი საპირისპირო აღმოჩნდა – მიუხედავად მოსკოვის სერიოზული ზეწოლისა, პრეზიდენტად სწორედ ბაღაფში აირჩიეს. აღსანიშნავია, რომ მოგვიანებით მან კრემლთან შესანიშნავი ურთიერთობები დაამყარა.
ახლა, როგორც ჩანს, იგივე მეთოდი გამოიყენება ადგურ არძინბას დასასუსტებლად და ხელისუფლების კანდიდატის, მოსკოვის აშკარა ფავორიტის, ბადრა გუნბას გასაძლიერებლად.
რამდენად გაამართლებს ეს სტრატეგია ამჯერად, მალე გაირკვევა – აფხაზეთის საპრეზიდენტო არჩევნები 15 თებერვალს გაიმართება.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
