აფხაზეთმა ენერგოსექტორის პრივატიზების წინააღმდეგ კანონი ვერ მიიღო
ენერგოსექტორის პრივატიზება აფხაზეთში
აფხაზეთში პარლამენტმა კანონი „რესპუბლიკის სტრატეგიული ობიექტების შესახებ“ ვერ მიიღო. დოკუმენტის ავტორების თქმით, ის ენერგეტიკული ობიექტების პრივატიზებისგან დაცვას ითვალისწინებდა.
კანონპროექტი “რესპუბლიკის სტრატეგიული ობიექტების შესახებ”, სახალხო კრების ბოლო სესიაზე, დეპუტატმა ალხას ჯინჯოლიამ წარადგინა. იგი ენერგეტიკული ინდუსტრიის დენაციონალიზაციის იდეის პრინციპული მოწინააღმდეგეა.
- ასლან ბჟანიამ პარლამენტზე სრული კონტროლი მიიღო
- „მოსახლეობა აქ ხუთ წელიწადში ერთხელ ჭამს“ – რა შედეგით დამთავრდა საპარლამენტო არჩევნები აფხაზეთში
- რუსეთი აფხაზეთს ფინანსურ დახმარებას უმცირებს, რათა დამოუკიდებლობა ასწავლოს
დოკუმენტმა ვერ მოიპოვა საკმარისი ხმები, მეორე, საბოლოო მოსმენით მისაღებად. იმის გათვალისწინებით, რომ პარლამენტის ახალი შემადგენლობა, რომელიც მუშაობას მომავალ კვირას დაიწყებს, ღიად საპრეზიდენტოა, ეს ოპოზიციის ბოლო მცდელობა იყო, ხელი შეეშალა მთავრობისთვის ბოლო წლების მწვავე ენერგეტიკული კრიზისის პრივატიზების გზით გადაჭრაში. საუბარია როგორც ქვესადგურებზე, ასევე გადამცემ ქსელებზე.
წარმოდგენილი კანონპროექტის მიხედვით, დოკუმენტში, სამართალდამცავი ორგანოების კონტროლქვეშ მყოფი ქონების გარდა, სტრატეგიულ ობიექტებად იყო განხილული ენერგეტიკული ობიექტებიც (მათ შორის ენგურჰესი).
ამავე დოკუმენტის თანახმად, სახელმწიფო საკუთრებაში არსებული სტრატეგიული ობიექტები პრივატიზებას არ ექვემდებარებოდა.
ბევრი ექსპერტი მიიჩნევს, რომ ამ კანონპროექტის ჩავარდნის შემდეგ, მთავრობა, ახალი, მისდამი ლოიალური პარლამენტის დახმარებით, ენერგეტიკის მოქმედ კანონში ცვლილებებს შეიტანს. ამით კი მოხსნის იმ ბოლო ბარიერებსაც, რაც არის დარჩენილი ენერგეტიკული ინდუსტრიის პრივატიზებისთვის.
აფხაზეთის ხელისუფლება რამდენიმე წელია ცდილობს გაუმკლავდეს ენერგეტიკულ კრიზისს, რომლის მთავარი მიზეზი კრიპტოვალუტის მაინინგის გავრცელებაა. ოპოზიციაში მიაჩნიათ, რომ ენერგეტიკული ობიექტების პრივატიზებით, ისინი რუსეთის ხელში აღმოჩნდება.
ენერგოსექტორის პრივატიზება აფხაზეთში
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
