"აფხაზეთის განვითარების ვექტორს ახლა კრემლი განსაზღვრავს" - მოსაზრება
აფხაზეთის ახალი ხელისუფლება
ინაუგურაციიდან მეორე დღეს, აფხაზეთის ახალმა ე.წ. პრეზიდენტმა ბადრა გუნბამ პრემიერ-მინისტრის პოსტზე ვლადიმირ დელბა დანიშნა — ფინანსთა ყოფილი მინისტრი, რომელსაც ახლა ახალი მთავრობის ჩამოყალიბება ევალება.
როგორი იქნება ახალი კაბინეტი და ვინ მართავს დღეს სინამდვილეში აფხაზეთს — ამ საკითხებზე თავის მოსაზრებებს გვიზიარებს გაზეთ “ჩეგემსკაია პრავდა“-ს მთავარი რედაქტორი ინალ ხაშიგი, რომელიც რუსეთის ხელისუფლებამ “უცხოელი აგენტების“ სიაში შეიყვანა.
ხაშიგის აზრით, კრემლი ცდილობს აფხაზეთში პოლიტიკური ვითარება დაასტაბილუროს და თანამდებობებიდან გაარიდოს იმ პირები, რომლებიც ოპოზიციის გაღიზიანებას იწვევენ.
ინალ ხაშიგი: “მთავრობა, რომელსაც უთხრეს – არ გააღიზიანო“
აფხაზეთის მთავრობის ახალი ხელმძღვანელი ვლადიმირ დელბა იმ გამოცდილ მოხელეთა რიგს მიეკუთვნება, რომლებსაც ხშირად ტექნოკრატებად მოიხსენიებენ. პროფესიულ საქმიანობაში გატარებული ოცდაათი წლის განმავლობაში დელბამ დაიმკვიდრა სრულიად აპოლიტიკური, მაგრამ არაკორუმპირებული ჩინოვნიკის რეპუტაცია — ადამიანი, რომელიც მხოლოდ მის ხელთ არსებულ სფეროზეა კონცენტრირებული.
ახალი მთავრობა ჯერ არ არის ჩამოყალიბებული, თუმცა, არსებული ნიშნებიდან გამომდინარე, მოსალოდნელია, რომ ის ისეთივე “ნეიტრალური“ იქნება, როგორიც თავად პრემიერ-მინისტრი. შთაბეჭდილება რჩება, რომ მინისტრებს კონკრეტული კრიტერიუმით შეარჩევენ – კვალიფიციური სპეციალისტები, რომელთაც არ აქვთ ტოქსიკური პოლიტიკური წარსული.
სწორედ ამიტომ ახალ კაბინეტში ვერ მოხვდებიან ვერც ყოფილი პრეზიდენტი ასლან ბჟანია, ვერც ყოფილი პრემიერ-მინისტრი ალექსანდრ ანქვაბი, ვერც საგარეო საქმეთა ყოფილი მინისტრი სერგეი შამბა და ვერც ბადრა გუნბას სხვა გავლენიანი თანამოაზრეები.
მიუხედავად ამისა, აღსანიშნავია, რომ ალექსანდრ ანქვაბი გუნბასთვის ერთგვარი მენტორისა და მფარველის როლს ასრულებდა.
ალექსანდრ ანქვაბმა ბადრა გუნბას პოლიტიკური კარიერის განვითარებაში მნიშვნელოვანი როლი ითამაშა — ის პრეზიდენტის არჩევნებზე გუნბას წინასაარჩევნო შტაბსაც კი ხელმძღვანელობდა. ლოგიკური იყო მოლოდინი, რომ გამარჯვების შემთხვევაში გუნბა მის მფარველს ძალაუფლებაში დატოვებდა. თუმცა ანქვაბმა შეცდომით გათვალა.
კრემლმა, რომელმაც უპრეცედენტო მხარდაჭერით ფაქტობრივად თავად აქცია ბადრა გუნბა პრეზიდენტად, ახალი აფხაზური ხელისუფლების შესახებ საკუთარი ხედვა ჰქონდა.
დღეს რუსეთ-აფხაზეთის ურთიერთობების კონცეფციასა და თვითონ აფხაზეთის განვითარების მიმართულებას კრემლის აფხაზური მიმართულების ახალი კურატორი — რუსეთის პრეზიდენტის ადმინისტრაციის ხელმძღვანელის მოადგილე, სერგეი კირიენკო განსაზღვრავს.
ყველაფრიდან ჩანს, რომ კირიენკო (რომელიც, სხვათა შორის, აფხაზეთშია დაბადებული) აფხაზეთში კრიზისული მმართველის როლს იკავებს, რომლის მთავარი მიზანია — სოხუმის შიდა პოლიტიკური ვითარების გრძელვადიანი სტაბილიზაცია.
საუბარია იმგვარ გამოსვლაზე, როცა უკმაყოფილო მოქალაქეები მორიგ ჯერზე იკრიბებიან და მთავრობის შენობების შტურმით აღების შემდეგ, მოქმედ პრეზიდენტს ვადამდელ გადადგომას აიძულებენ — სცენარი, რომელიც აფხაზეთში უკვე სამჯერ გათამაშდა.
ამრიგად, ახალ ხელისუფლებაში აღარ იქნებიან ადამიანები, რომლებიც ბოლო დროის პოლიტიკურ კრიზისთან ასოცირდებიან. ბადრა გუნბას – ან ნებისმიერ სხვა ადგილობრივ პოლიტიკოსს – ასეთი ცვლილებების დამოუკიდებლად განხორციელება, სურვილის შემთხვევაშიც კი, ძნელად თუ შეუძლია. სერგეი კირიენკოსთვის კი ეს პრობლემა ადვილად გადასაჭრელი აღმოჩნდა.
ოპოზიცია, სულ მცირე, უნდა კმაყოფილი იყოს მოვლენების ასეთ განვითარებით. თუმცა, ცხადია, გარე მმართველობის რეჟიმი მისთვის მიუღებელია. მაგრამ ეს უკვე ახალი რეალობაა, რომელთან შეგუებაც ყველას მოუწევს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
