აფხაზეთის პარლამენტში შესაბამისი ეკონომიკური კომიტეტის სხდომა გაიმართა, რომელზეც ბინების შესახებ სკანდალური კანონი განიხილეს. უფრო სწორად, მსჯელობდნენ ამ კანონისთვის მწვანე შუქის ანთებაზე ჯერჯერობით მხოლოდ აფხაზეთის აღმოსავლეთ ნაწილში და არა მის მთელ ტერიტორიაზე.
იმის გათვალისწინებით, რომ აფხაზური საზოგადოების მნიშვნელოვანი ნაწილი კატეგორიულად ეწინააღმდეგება ამ კანონის რაიმე ფორმით მიღებას, შეხვედრის დროს პარლამენტის დაცვაში ჩართული იყო სახელმწიფო უსაფრთხოების ძალების მთელი შემადგენლობა.
არც სამოქალაქო აქტივისტები და არც ჟურნალისტები პარლამენტში არ შეუშვეს.
შედეგად, კომიტეტმა კანონპროექტის განხილვა მომდევნო სხდომისთვის გადადო, რომლის თარიღი ჯერჯერობით უცნობია.
შეგახსენებთ, რომ აფხაზეთის პრეზიდენტი ასლან ბჟანია უკვე ორი წელია წარუმატებლად ცდილობს კანონის მიღებას, რომელიც რუსებს აფხაზეთში ბინების აშენებისა და ყიდვის უფლებას აძლევს.
რადგან ვერ მიაღწია კანონის „სუფთა“ სახით მიღებას, ბჟანიამ გადაწყვიტა, რომ იგი ქვეყნის აღმოსავლეთ რეგიონების განვითარების დონის ამაღლების შესახებ კანონპროექტის განუყოფელ ნაწილად აქციოს. ახლა ის გვთავაზობს დაუშვას ბინების მშენებლობა აფხაზეთის მხოლოდ სამ რეგიონში, რომლებიც ითვლება “დეპრესიულად” და საჭიროებს ეკონომიკურ აღორძინებას.
შეხვედრაში მონაწილეობის უფლება არ მისცეს საჯარო პირებს, მათ შორის, მაგალითად, აფხაზეთის ომის ვეტერანებს – ლევან მიქაას, ახრა ბჟანიას და ილია გუნიას. უშიშროების ძალებმა პირველი პარლამენტის შენობიდან გააძევეს, დანარჩენ ორს კი ხმამაღლა მიუთითეს კარისკენ. აფხაზეთისთვის, სადაც ვეტერანებს საყოველთაოდ პატივს სცემენ, ეს აშკარად მძიმე ეპიზოდია.
შეხვედრაში მონაწილეობა თავად ასლან ბჟანიამ მიიღო და კანონპროექტის მხარდასაჭერად თავისი არგუმენტები წარმოადგინა – ეს ასევე უჩვეულო მოვლენაა, რადგან აქამდე არც ერთი აფხაზი პრეზიდენტი არ დასწრებია პარლამენტში კომიტეტის სხდომას.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
