აფხაზეთში მოქალაქეობის შესახებ კანონი გამკაცრდება. პარლამენტის მიერ პირველი მოსმენით ერთხმად მიღებულ ცვლილებებს შორის არის პუნქტი, რომლის მიხედვითაც აფხაზეთის მოქალაქეობის მიღების უფლება ჩამოერთმევათ როგორც სხვადასხვა პერიოდში აფხაზეთის წინააღმდეგ სამხედრო მოქმედებებში მონაწილე პირებს, ასევე მათი ოჯახის წევრებს. საუბარია ძირითადად 1992-1993 წლების აფხაზეთის ომის მონაწილეებზე.
“გადაუდებელი აუცილებლობაა აფხაზეთის რესპუბლიკის მოქალაქეობაზე მიღებულ ან აღდგენილ პირთა აღრიცხვასთან დაკავშირებული საკითხების გამარტივება და გამჭვირვალობა“, – განაცხადა დეპუტატმა დიმიტრი მარშანიამ კანონპროექტის წარდგენისას.
განახლებული კანონმდებლობის თანახმად, მოქალაქეობის მინიჭება/აღდგენა ეკრძალებათ იმ პირებს, რომლებიც:
დაგეგმა, მოამზადა, წამოიწყო ომი აფხაზეთის რესპუბლიკის წინააღმდეგ, ასევე მსახურობდა შეიარაღებულ ფორმირებებში (ნაწილებში), სამხედრო პოლიციაში, ძალოვან სტრუქტურებში და საქართველოს რესპუბლიკის სხვა სტრუქტურებში საქართველოს მიერ აფხაზეთის რესპუბლიკის ოკუპაციის პერიოდში – 1992 წლის 14 აგვისტოდან 1993 წლის 30 სექტემბრამდე. ან სხვა სახის დახმარება გაუწია საქართველოს საოკუპაციო რეჟიმს მითითებულ პერიოდში, მონაწილეობა მიიღო სამხედრო მოქმედებებში, აფხაზეთის წინააღმდეგ მიმართულ სპეციალურ სამხედრო ოპერაციებში.
გარდა ამისა, უცხოელებსა და მოქალაქეობის არმქონე პირებს, რომლებიც მიმართავენ მოქალაქეობის თაობაზე, იზრდება რესპუბლიკაში უწყვეტი ცხოვრების აუცილებელი ვადა.
ახლა, ბინადრობის მოწმობის მიღების დღიდან, სანამ არ შეიტანთ განცხადებას, აფხაზეთში უწყვეტად უნდა იცხოვროთ არა 10 წელი, როგორც აქამდე იყო, არამედ 25 წელი.
ასევე დადგენილია მოქალაქეობაზე გამარტივებული წესით მიღების კვოტა – წელიწადში არაუმეტეს 30 ადამიანისთვის, ვისაც განსაკუთრებული დამსახურება აქვს აფხაზეთისა და კაცობრიობის წინაშე, ან აქვს “რესპუბლიკისთვის საინტერესო” პროფესია ან კვალიფიკაცია.
თუმცა, არ არის დაკონკრეტებული, კონკრეტულად რისგან უნდა შედგებოდეს ეს „განსაკუთრებული დამსახურება“. როგორც ჩანს, ეს რჩება პრეზიდენტის შეხედულებისამებრ, რომელიც მოქალაქეობას გამარტივებული წესით გასცემს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
