აფხაზ გიდებს არ სურთ რუსი კოლეგების საკუთარ ტერიტორიაზე შეშვება

რუსი გიდები აფხაზეთში

აფხაზეთის მთავრობა ამზადებს შეთანხმებას, რომელიც რუს გიდებს ადგილობრივ ტურისტულ ინდუსტრიაში მუშაობის საშუალებას მისცემს. აფხაზი გიდები ამის კატეგორიული წინააღმდეგნი არიან, რადგან შიშობენ, რომ თავად უმუშევრად დარჩებიან.

აფხაზური ტელეგრამ-არხებით გავრცელებული ინფორმაციის თანახმად, ასლან ბჟანია სანქტ-პეტერბურგში საერთაშორისო ეკონომიკურ ფორუმზე მოგზაურობისას შეთანხმდა რუსეთის ხელისუფლების წარმომადგენლებთან, რომ უახლოეს მომავალში აფხაზეთი გააუქმებს რუს გიდებზე მოქმედ აკრძალვას.

აფხაზური საექსკურსიო კომპანიები შეშფოთებულნი არიან ამ პერსპექტივით, რადგან ისინი ვერ გაუწევენ კონკურენციას რუსულ კომპანიებს. ხელისუფლების ამ ინიციატივის დასაპირისპირებლად სპეციალური შტაბიც კი შექმნეს. შტაბის მუშაობის პირველი 24 საათის განმავლობაში მას ტურიზმის ათასზე მეტი თანამშრომელი შეუერთდა.

• “იზოლირებული დასვენება“: რუსი ოლიგარქი აფხაზეთში „ანკლავს“ აშენებს
• უაზრო რეკონსტრუქცია თუ ტურიზმის სტიმული? მოსაზრება აფხაზეთის აეროპორტის შესახებ
• ტესტი ერთგულებასა და ალკოჰოლზე – როგორ გრძელდება ტურისტული სეზონი აფხაზეთში

აფხაზეთის ტურისტული ინდუსტრიის თავისებურება ის არის, რომ ექსკურსანტების უმეტესობა ტურისტები არიან, რომლებიც ისვენებენ რუსეთის ახლომდებარე კურორტ სოჭში. აფხაზეთში მათ „ერთდღიან ტურისტებს“ უწოდებენ, რადგან ისინი მხოლოდ ერთი დღით მოდიან ადგილობრივი ღირსშესანიშნაობების სანახავად. მხოლოდ გასულ წელს, 2023 წელს, აფხაზეთს 1,2 მილიონი ასეთი ტურისტი ეწვია.

ყოველდღე, დილიდან რამდენიმე ასეული საექსკურსიო ავტობუსი ტოვებს სოჭს და მიდის რუსეთის საზღვრამდე, სადაც მათ აფხაზური ტურისტული სააგენტოების წარმომადგენლები ხვდებიან. ადგილობრივი გიდები ტურისტებისთვის ატარებენ ექსკურსიებს სხვადასხვა მარშრუტებზე: საბჭოთა დროიდან ყველაზე ცნობილი (რიწის ტბა და ახალი ათონის მღვიმე), სრულიად ახალამდე (მაგალითად, ენგურის ჰიდროელექტროსადგური).

„წადით მერე ევროპაში, ვინ გიშლით?“ რიწის ტბა და მისი ტურისტები

როგორ ისახება რუსეთში მომხდარი მოვლენები აფხაზეთის ტურისტულ ბიზნესზე და რითი არიან უკმაყოფილო ტურისტები და მასპინძლები

აფხაზეთი დიდი პოპულარობით სარგებლობს რუს ტურისტებში და, შესაბამისად, გიდის პროფესია ყველაზე პოპულარულია აფხაზეთში.

გიდების შემოსავალი, ადგილობრივი სტანდარტებით, საკმაოდ ღირსეულია და ამით რეგულარულად 700-ზე მეტი ადამიანია დაკავებული (დაახლოებით 250 000 მოსახლიდან). ზაფხულში კი, ტურისტული სეზონის პიკზე, გიდების რაოდენობა ორმაგდება იმ მასწავლებლების ხარჯზე, რომლებიც ამ გზით დამატებით ფულს შოულობენ სასკოლო არდადეგებზე.

და ამ ხალხს ნამდვილად არ სურს თავისი რუსი კოლეგების საკუთარ ტერიტორიაზე შეშვება.

„რუსული საექსკურსიო ორგანიზაციები ბაზარზე საკუთარი გიდებითა და მანქანებით შევლენ, მიწოდების ასეთი მოცულობა ჩაანაცვლებს ადგილობრივ სპეციალისტებს, რომლებიც მუშაობენ მცირე და საშუალო ბიზნესში“, – ნათქვამია აფხაზური საექსკურსიო კომპანიების ერთობლივ განცხადებაში.

მათი გათვლებით, თუ რუსებისთვის საექსკურსიო საქმიანობის ტაბუ მოიხსნება, მაშინ აფხაზეთის მოსახლეობის 13% საარსებო წყაროს გარეშე დარჩება.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო