ექთანი, რომელსაც კოვიდის აცრა გაურთულდა, გარდაიცვალა. საქართველო ვაქცინაციას აგრძელებს მხოლოდ ნაწილობრივ

ახალციხელი ექთანი მეგი ბაქრაძე კომაში გუშინ, კორონავირუსის საწინააღმდეგო აცრიდან დაახლოებით 30 წუთში ჩავარდა. ის რეანომობილით თბილისში გადმოიყვანეს.

ექიმებმა მისი გადარჩენა ვერ შეძლეს.

პირველი საუნივერსიტეტო კლინიკის დირექტორი, ლევან რატიანი ამბობს, რომ დიდი ალბათობით ქალს ვაქცინაზე მწვავე ალერგიული რეაქცია ჰქონდა, რაც ვაქცინის ძალიან იშვიათი გვერდითი მოვლენაა. თუმცა, საბოლოო დასკვნისთვის, თუ რამ გამოიწვია მეგი ბაქრაძის სიკვდილი, საჭიროა შემდგომი კვლევები.

ამ შემთხვევამ შეაფერხა საქართველოში ვაქცინაციის პროცესი – აცრების გაკეთება შეაჩერეს მაღალმთიან აჭარაში.

________________________________________________________

ამ შემთხვევამ დიდი ვნებათაღელვა გამოიწვია ქვეყანაში, სადაც ისედაც ბევრი ადამიანი უნდობლობით უყურებს ვაქცინაციის პროცესს. სხვადასხვა გამოკითხვებით, 41 პროცენტი ამბობს, რომ აცრას არ გაიკეთებს.

ახალციხეში მომხდარი შემთხვევის შემდეგ, ჯანდაცვის სამინისტროში შედგა თათბირი, სადაც იმუნიზაციის ექსპერტთა ჯგუფმა და გვერდითი მოვლენების მართვის კომიტეტმა იმსჯელა, დროებით ხომ არ შეეჩერებინათ ქვეყანაში ასტრაზენეკათი ვაქცინაციის პროცესი.

თუმცა, გადაწყვეტილება ვაქცინაციის პროცესის გაგრძელების სასარგებლოდ იქნა მიღებული.

ვაქცინაციის პროცესში შევიდა გარკვეული ცვლილებები – ამიერიდან აცრებს გააკეთებენ მხოლოდ იმ კლინიკებში, რომლებსაც რეანიმაციის განყოფილება აქვთ.

ასევე, აჭარის ოთხ მუნიციპალიტეტში: ხელვაჩაურში, ქედაში, შუახევსა და ხულოში კორონავირუსის საწინააღმდეგო ვაქცინაციის პროცესი შეჩერდა.

ამასთან, აჭარის ჯანდაცვის სამინისტროში ამბობენ, რომ ვაქცინაცია ბათუმსა და ქობულეთის მუნიციპალიტეტებში აქტიურად მიმდინარეობს.

როდის განახლდება ვაქცინაციის პროცესი მაღალმთიან აჭარაში, უწყებაში ჯერ ვერ ასახელებენ.

კორონავირუსის ვაქცინის პირველი პარტია – 43 200 დოზა ასტრაზენეკა საქართველოში 13 მარტს შემოვიდა. 15 მარტს საქართველოში ბრიტანული ასტრაზენეკათი ვაქცინაციის პროცესი დაიწყო. ზუსტად სამ დღეში კი, 18 მარტს კი, ახალციხეში მოხდა ტრაგედია, რომელმაც საფრთხის ქვეშ დააყენა ვაქცინაციის მთელი პროცესი.

_________________________________

● საქართველოში ასტრაზენეკით ვაქცინაციის პროცესი გაგრძელდება
● ახალციხეში აცრის შემდეგ ექთანს ანაფილაქსიური რეაქცია განუვითარდა
● საპატრიარქო არ ჩაერთვება ვაქცინაციის პროპაგანდაში – ჯანდაცვის მინისტრი პატრიარქს შეხვდა

__________________________________

ევროპამ ასტრაზენეკათი ვაქცინაციის პროცესი სწორედ გართულებების გამო არ გააჩერა?

ასტრაზენეკათი ვაქცინაცია ევროკავშირის უმეტეს ქვეყანაში მართლაც შეჩერებული იყო რამდენიმე დღის განმავლობაში, მაგრამ ამის მიზეზი არა ანაფილაქსია, არამედ თრომბების განვითარების შემთხვევები გახდა.

თუმცა, დღეიდან, 19 მარტიდან, მას შემდეგ, რაც ევროპის წამლის სააგენტომ ვერ დაადგინა კავშირი თრომბოელბოლიების შემთხვევებსა და აცრას შორის, ევროპის ბევრმა ქვეყანამ განაახლა ასტრაზენეკათი ვაქცინაცია.

19 მარტს ევროპის წამლის მარეგულირებელმა სააგენტომ, მსოფლიოს ერთ-ერთმა ყველაზე ავტორიტეტულმა ორგანიზაციამ, რომელიც ევროკავშირში მედიკამენტების უსაფრთხოებაზეა პასუხისმგებელი, გამოაქვეყნა თრომბის შემთხვევების მოკვლევებზე დაფუძნებული დასკვნა, სადაც აღნიშნულია, რომ ასტრაზენეკა არის უსაფრთხო ვაქცინა და მასზე უარის თქმის საფუძველი არ აქვს არც ერთ ქვეყანას.

თუკი ვაქცინა უსაფრთხოა, მაშინ ანაფილაქსიური შოკი რატომ განვითარდა?

თუკი საბოლოოდ დადასტურდა, რომ მეგი ბაქრაძის გარდაცვალების მიზეზი ანაფილაქსიური შოკია, ქართველი ექთანი არ იქნება მსოფლიოში პირველი ადამიანი, რომელსაც კორონავირუსის აცრის შემდეგ ანაფილაქსიური შოკი განუვითარდა, თუმცა იქნება პირველი, ვინც ანაფილაქსიური შოკისგან გარდაიცვალა.

თუმცა, კონკრეტულად ამ გვერდითი მოვლენების გამო ვაქცინაციის პროცესი არც ერთ ქვეყანას არ შეუჩერებია.

ანაფილაქსიური შოკი ორგანიზმის მწვავე ალერგიული რეაქციაა, რომელიც შეიძლება განვითარდეს როგორც მედიკამენტებზე, ასევე საკვებზეც, მწერის ნაკბენზე და ა.შ. მაგალითად, იგი შეიძლება განვითარდეს თუკი ადამიანი შეჭამს თხილს, ან მას უკბენს ბზიკი, ან გაიკეთებს გამაყუჩებელს სტომატოლოგთან, მიიღებს ანტიბიოტიკს და ა.შ.

ერთი სიტყვით, ეს ორგანიზმის იშვიათი, მწვავე რეაქციაა სხვადასხვა გამაღიზიანებელზე, მათ შორის ვაქცინებზეც.

ეს რეაქცია იშვიათია, თუმცა მისი წინასწარ განსაზღვრა პრაქტიკულად შეუძლებელია.

ნებისმიერი სამედიცინო მანიპულაციის დროს, თუნდაც კბილზე გამაყუჩებლის გაკეთების წინ, როგორც წესი, პაციენტს პირველ რიგში ეკითხებიან, ხომ არ აქვს მას ალერგია რაიმე პრეპარატზე და ზოგადად ხომ არ არის ალერგიული. იგივე ხდება აცრის წინაც – ექიმი პაციენტს ამ კითხვას აუცილებლად უსვამს. თუმცა, იმ შემთხვევაშიც კი, თუ პასუხი უარყოფითია, ანაფილაქსიური შოკისგან ასი პროცენტით დაზღვეული არავინაა.

რადიო თავისუფლებამ შეაგროვა კოვიდ-ვაქცინისა და ანაფილაქსიური შოკის სტატისტიკა.

მაგალითად, დიდ ბრიტანეთში ასტრაზენეკათი 5 მილიონი აცრილი ადამიანიდან ანაფილაქსიური შოკი გამოუვლინდა 41-ს. ანუ, 122 ათასი აცრიდან ერთ შემთხვევაში.

ანაფილაქსიური შოკი, როგორც იშვიათი გართულება, ხდება სხვა ვაქცინების შემთხვევაშიც: გერმანიაში ფაიზერ-ბიონტეკის 5 387 000 აცრილ ადამიანში დაფიქსირდა 63 ანაფილაქსიური შოკი.

აღმოუჩინეს თუ არა ექთანს დროული დახმარება

მთავარი კითხვები, რომელზეც პასუხი უნდა გასცეს გამოძიებამ, არის ის, თუ რა მოხდა – რა იყო ორგანიზმის ამგვარი რეაქციის მიზეზი და ასევე, იყო თუ არა მზად ამ რეაქიისთვის კლინიკა, აღმოუჩინეს თუ არა კომაში ჩავარდნილ ქალს დროული და ადეკვატური დახმარება.

ანაფილაქსიური შოკზე, როგორც აცრის იშვიათ გვერდით მოვლენაზე (მათ შორის კოვიდის საწინააღმდეგო აცრის) ცნობილია. შესაბამისად, არსებობს კონკრეტული რეკომენდაციები ამ ტიპის რეაქციის შემთხვევაზე.

კიდევ არის ერთი ვერსია, რომ შესაძლოა, ქალს ჰქონდა აქტიური კოვიდი ან ცოტა ხნის წინ ჰქონდა ვირუსი გადატანილი და ჰქონდა ბევრი ანტისხეული, რამაც რეაქცია გამოიწვია.

როგორც ქალის ოჯახის წევრები ამბობენ, მას არ ჰქონდა თანმხლები დაავადებები და არაფერი აწუხებდა.

აცრა მან 18 მარტს დაახლოებით 12:15 სთ-ზე, გაიკეთა. აცრის გაკეთებიდან ორიოდე წუთში მან ადგილობრივ ჟურნალისტებს მისცა ინტერვიუ.

“აუცილებელია ვაქცინაცია, უძლური ვართ მოსახლეობა ამ ვირუსის წინაშე და ამიტომ უნდა ავიცრათ, რათა გადავიტანოთ ეს ვირუსი ისე, რომ არ შეგხვდეს მძიმე ფორმებით. ეშინია მოსახლეობას, მაგრამ არაფერია საშიში, მოვუწოდებ ყველას, რომ აიცრან. აუცილებელია ამის გაკეთება და არაფერი ამაში საშიში არ არის“, – ამბობს ის ინტერვიუში.

მწვავე რეაქცია ამ ინტერვიუს შემდეგ, აცრიდან დაახლოებით ნახევარ საათში დაიწყო.