ირაკლი კობახიძე: კომპანიებმა TV იმედთან და POSTV-სთან თანამშრომლობა უნდა გააგრძელონ
TV იმედი და POSTV
დიდი ბრიტანეთის მიერ პროსამთავრობო პროპგანადისტული მედიების, TV იმედისა და POSTV-ის დასანქცირების შემდეგ, “ქართული ოცნების” პრემიერ-მინისტრმა ირაკლი კობახიძემ განაცხადა, რომ გადაწყვეტილება “არასერიოზული და სამარცხვინოა“. მისი თქმით, ლონდონში “აღარაფერი აღარ ფასობს“, მათ შორის – მედიის თავისუფლება.
კობახიძემ სანქციები ფორმალურად მედიის თავისუფლების შელახვად შეაფასა, თუმცა დაამატა, რომ პრაქტიკულ შედეგს ისინი ვერ გამოიღებს. მისი განცხადებით, ხელისუფლება იღებს სრულ პასუხისმგებლობას იმაზე, რომ არცერთ ჟურნალისტს არცერთ ტელეკომპანიაში მდგომარეობა არ გაუუარესდეს.
“რა თქმა უნდა, ბუნებრივია, ყველა სახელმწიფო და არასახელმწიფო კომპანიამ TV იმედთან და POSTV-სთან თანამშრომლობა უნდა გააგრძელოს. თქვენ იმის იმედი ნუ გაქვთ, რომ საქართველოში მედიისა და მეწარმეობის თავისუფლების ძირითადი უფლება შეილახება.
ყველა ქმედება განხორციელდება და ყველა შესაძლო ზომა იქნება მიღებული, რაც აუცილებელია იმისთვის, რომ TV იმედსა და POSTV-ის საქართველოში მედიის თავისუფლების ძირითადი უფლება არ შეელახოს […] საქართველოს ხელისუფლება უკლებლივ ყველა ზომას მიიღებს იმისთვის, რომ დაცული იყოს TV იმედისა და POSTV-ის მედიის თავისუფლების ძირითადი უფლება – რისი შელახვაც სცადა ბრიტანეთმა, იმას ბოლომდე დავიცავთ.” – ამბობს კობახიძე.
ჟურნალისტებთან საუბრისას კობახიძემ თქვა, რომ ბრიტანეთის ნაბიჯი ასახავს “ტრაგიკულ მდგომარეობას“, რომელიც, მისი შეფასებით, ევროპულ ბიუროკრატიაში ჩამოყალიბდა. მისი თქმით, ქვეყანა, რომელიც ისტორიულად ადამიანის უფლებების სამშობლოდ მიიჩნეოდა, დღეს თავად უგულებელყოფს მედიისა და სხვა ფუნდამენტურ უფლებებს.
პრემიერის განცხადებით, 2012 წლამდე ქვეყანაში მედიის სფეროში “სრული მონოპოლია“ არსებობდა, ხოლო 2012 წლის შემდეგ მედიის თავისუფლება ხელისუფლების მიერ არის უზრუნველყოფილი. მან აღნიშნა, რომ მთავრობა მიიღებს “ყველა შესაძლო ზომას“, რათა TV იმედსა და POSTV-ს საქართველოში მაუწყებლობის გაგრძელება შეუფერხებლად შეეძლოს.
კობახიძის თქმით, თუ 2007 წლის შემდეგ იმედისთვის მედიის თავისუფლების აღდგენას ხუთი წელი დასჭირდა, ახლა “ხუთი დღეც საკმარისი იქნება“ იმისთვის, რომ ტელეკომპანიების უფლებები სრულად იყოს დაცული. მისი მტკიცებით, ორივე არხი მაუწყებლობას ჩვეულ რეჟიმში გააგრძელებს და ჟურნალისტების უფლებები “ბოლომდე დაცული იქნება“.
კომენტარი
ეკონომისტი რომან გოცირიძე ირაკლი კობახიძის მოწოდებას ეხმაურება და ამბობს, რომ “იმედს” ხელოვნური სუნთქვით ვერ გადაარჩენ.”
“ოცნების” მთავრობის მოწოდება, რომ ყველა სახელმწიფო და არასახელმწიფო ორგანიზაციამ უნდა გააგრძელოს “იმედთან” და “პოსტივისთან” თანამშრომლობა, სინამდვილეში ნიშნავს სახელმწიფოს ანუ ხალხის ფულით ამ ორი რუსული არხის შენახვას.
მანამდეც არ აკლებდა რეკლამას საბიუჯეტო ორგანიზაციები ამ ტელევიზიას, მაგრამ ეს ფული ხელფასებსაც კი არ ჰყოფნიდა, ძირითადი დაფინანსება ივანიშვილ-რუხაძისგან მოდიოდა. 500 მილიონი ლარი აქვს დავალიანება იმედს ამ პირებთან დაკავშირებული კომპანიების, მათ შორის ქართუბანკის წინაშე. “იმედის” აქტივები მხოლოდ 25 მილიონი ლარია, ვალდებულებები კი ნახევარი მილიარდი.
“იმედს” ხელოვნური სუნთქვით ვერ გადაარჩენ. ვინც მასთან ითანამშრომლებს განწირულია სანქციებისათვის. გგონიათ ივანიშვილი გაწირავს “ქართუს” ან რუხაძე “ლიბერთის”(სადღაც ხომ უნდა ჰქონდეს ანგარიშები გახსნილი, თუნდაც ლარებში)? ეჭვი მეპარება.
ბრიტანულ სანქციებს რომ ევროპული და ამერიკული მოჰყვება, ნურც ამაში შეგეპარებათ ეჭვი. არც ბრიტანულის სჯეროდა ზოგიერთებს, მაგრამ ხომ მოხდა?
რაც მოსახდენია, მოხდება. ეს მერფის დაუწერელი კანონია.”
დიდმა ბრიტანეთმა 24 თებერვალს სანქციები დაუწესა ტელეკომპანია “იმედსა” და POSTV-ს, რუსეთის წინააღმდეგ სანქციების რეჟიმის ფარგლებში.
სანქციების სიის დოკუმენტის მიხედვით, TV იმედსა და POSTV-ს შეეხებათ აქტივების გაყინვა, ტრასტის მომსახურების სანქციები და დირექტორის დისკვალიფიკაციის სანქცია, რომელიც ინდივიდს კომპანიის დირექტორობას, მის დაარსებას ან მართვას გარკვეული პერიოდით უზღუდავს, სანქციის დარღვევა კი სისხლის სამართლის დანაშაულად ითვლება.
ეს ნიშნავს, რომ:
1) Asset Freeze (აქტივების გაყინვა) – ბრიტანეთთან დაკავშირებულმა ბანკებმა უნდა გაუყინონ ანგარიშები და აღარ მოემსახურონ;
2) Trust Services Sanctions (დირექტორთა დისკვალიფიკაციის სანქცია) – გამორიცხავს ბრიტანეთთან დაკავშირებით კომპანიის წილების გადაცემას და ქონების ამ გზით მართვას;
3) Director disqualification (ტრასტთან დაკავშირებული მომსახურება) – კრძალავს ბრიტანეთის მოქალაქის ჩართვას კომპანიის მართვაში.
