The Guardian: დაკავებული ოპოზიციონერები ბრიტანეთს ირანთან კავშირების გამო "ოცნების" სანქცირებისკენ მოუწოდებენ
დაკავებული ოპოზიციონერები ბრიტანეთს მიმართავენ
The Guardian-ის ინფორმაციით, დაკავებულმა ქართველმა ოპოზიციონერმა პოლიტიკოსებმა “ქართულ ოცნებასა“ და ირანს შორის კავშირების შესახებ დიდი ბრიტანეთის საგარეო საქმეთა მინისტრს წერილი გაუგზავნეს.
გამოცემის ცნობით, დაკავებული შვიდი ოპოზიციონერი პოლიტიკოსი გაერთიანებული სამეფოს საგარეო საქმეთა მინისტრს, ივეტ კუპერს საქართველოში ირანის გავლენის “უპრეცედენტო გაფართოების გამო“ სანქციების დაწესებისკენ მოუწოდებს.
ოპოზიციის დაკავებული ლიდერები კუპერს მოუწოდებენ, სანქციები დააწესოს მათ წინააღმდეგ, ვინც, სავარაუდოდ, ირანთან კავშირებს ამყარებს, ასევე, საქართველოში მოქმედი პროპაგანდისტული საშუალებების მფლობელების, მათ შორის მათ წინააღმდეგ, ვინც “ლონდონშია დაფუძნებული“ და საქართველოს მთავრობის მესიჯებს ავრცელებს.
როგორც The Guardian აღნიშნავს, დაკავებული ქართველი პოლიტიკოსები წერილში წერენ, რომ ისინი რუსეთის მიერ მხარდაჭერილი “ქართული ოცნების“ რეჟიმის მიერ არიან დაკავებულები. მათივე თქმით, ამას ადასტურებს აშშ-ის მიერ ირანის ბირთვულ ობიექტებზე განხორციელებული დარტყმების შემდეგ, საქართველოს საგარეო საქმეთა მინისტრის მოადგილის, ალექსანდრე ხვთისიაშვილის მიერ ირანის საელჩოში “სოლიდარობის გამოხატვა“.
ასევე, წერილში ნახსენებია საქართველოს პრემიერ-მინისტრის, ირაკლი კობახიძის თეირანში ვიზიტი, სადაც ის “ჰამასისა“ და “ჰეზბოლას“ ლიდერების გვერდით იდგა, და ისმოდა შეძახილები: “სიკვდილი ამერიკას!“
ივეტ კუპერისთვის გაგზავნილ წერილში დაკავებული პოლიტიკოსები აცხადებენ:
“ჩვენ, პატივისცემით მოგიწოდებთ, განიხილოთ სანქციების გავრცელება ამ პირების, მათი ორგანიზაციებისა და მათი ოჯახის წევრების წინააღმდეგ, რათა მათ ვეღარ ისარგებლონ დიდი ბრიტანეთის დემოკრატიული საზოგადოების უპირატესობებით, მაშინ როდესაც ისინი მისთვის ძირის გამოთხრას ცდილობენ.
ბოლო წლებში, “ქართულმა ოცნებამ“ და მისმა პატრონმა, ოლიგარქმა ბიძინა ივანიშვილმა ყველა სახელმწიფო ინსტიტუტზე სრულ კონტროლსა და სახელმწიფოს ხელში სრულად ჩაგდებას მიაღწიეს და დემოკრატიულ კონსტიტუციურ წესრიგს თანდათანობით ანგრევენ. ამჟამად საქართველოში ერთ სულ მოსახლეზე პოლიტპატიმრების რაოდენობა უფრო მეტია (60-ზე მეტი), ვიდრე რუსეთში. სამოქალაქო საზოგადოება თავდასხმის ქვეშ არის დრაკონული კანონმდებლობის მეშვეობით, რომელიც რუსულის მსგავსია და მიზანს მისი სრული განადგურება წარმოადგენს. არანაკლებ შემაშფოთებელია ირანული გავლენის უპრეცედენტო გაფართოება.
გაერთიანებულმა სამეფომ უკვე გამოიჩინა ლიდერობა, „ქართული ოცნების“ რეპრესიული აპარატის წევრების წინააღმდეგ სანქციების დაწესებით. ზომების, რომლებსაც რეალური გავლენა ჰქონდა და ჩვენმა ხალხმა ღრმად დააფასა.
მიუხედავად ამისა, შეშფოთებულები ვართ, რომ “ქართული ოცნების“ მთავარი ხელშემწყობი პირები – ბიზნესპარტნიორები, ბატონი ივანიშვილის ოჯახის წევრები და პროპაგანდისტული საშუალებების მფლობელები, რომლებიც საიმედო ცნობების თანახმად, რუსული ხელწერით მომზადებულ დეზინფორმაციას ავრცელებენ, მათ შორის, დიდი ბრიტანეთის წინააღმდეგ – კვლავაც სარგებელს იღებენ დიდი ბრიტანეთის ფინანსური სისტემიდან, ხოლო ზოგიერთი მათი ოპერაცია, როგორც ცნობილია, ლონდონშია დაფუძნებული.“
