"დღესვე უნდა ვიმოქმედოთ, თუ არ გვინდა, რომ მივიღოთ მეორე ბელარუსი კავკასიაში" - გამოხმაურებები ოპოზიციონერების დაპატიმრებებზე
გამოხმაურებები ოპოზიციონერების დაპატიმრებებზე
ევროკავშირის და დიდი ბრიტანეთის წარმომადგენლები ღრმა შეშფოთებას გამოთქვამენ საქართველოში ოპოზიციონერი პოლიტიკოსების დაპატიმრებასა და “ქართული ოცნების” ხელისუფლების მიმართ კრიტიკულად განწყობილი ადამიანების შევიწროებასთან დაკავშირებით.
მაგალითად, ევროპის საბჭოს საპარლამენტო ასამბლეის (PACE ) ვიცე-პრეზიდენტმა, კნუტ აბრაჰამმა განაცხადა, რომ ოპოზიციონერების დაპატიმრება, საზოგადოების დაშინება, დემონსტრანტების ცემა და დაკავება “ძალიან ნაცნობად ჟღერს“ და “ჩვენ შეცდომებზე სწავლა შეგვიძლია“.
ევროკომისიის სპიკერი, ანიტა ჰიპერი კი ამბობს, რომ ოპოზიციის ლიდერების პოლიტიკურად მოტივირებული დევნა და დაპატიმრება ეწინააღმდეგება ძირეულ დემოკრატიულ ღირებულებებს.
გამოხმაურებები
კნუტ აბრაჰამი, ევროპის საბჭოს საპარლამენტო ასამბლეის (PACE ) ვიცე-პრეზიდენტი: “ოპოზიციონერი პოლიტიკოსების დაპატიმრება, სამოქალაქო საზოგადოების დაშინება და მათი გისოსებს მიღმა მოქცევა, დემონსტრანტების ცემა და დაპატიმრება – ეს ყველაფერი ძალიან ნაცნობად ჟღერს, ეს დღეს რეალობაა რუსეთსა და ბელარუსში. ძალიან დიდ ხანს ვუყურებდით ერთი მეორეს მიყოლებით, როგორ მიიღებოდა რეპრესიული კანონები მანამდე, სანამ გვიანი არ იყო, მაგრამ ჩვენს შეცდომებზე სწავლა შეგვიძლია. ასე უნდა გავაკეთოთ საქართველოსთან დაკავშირებით, თუ არ გვინდა, რომ მეორე ბელარუსი მივიღოთ კავკასიაში! საქართველოში ყოველ დღე ახალ ოპოზიციონერ პოლიტიკოსს აპატიმრებენ. როგორც ევროპის საბჭოს წევრმა, საქართველომ ადამიანის უფლებების პატივისცემისა და დემოკრატიის დაცვის ვალდებულება აიღო. მინისტრთა კომიტეტს მოვუწოდებ, დაიცვან ევროპის საბჭოს წითელი ხაზები და დაუყოვნებლივ იმოქმედონ, სანამ გვიანი არ არის!”
ევროკომისიის სპიკერი, ანიტა ჰიპერი: “საქართველო: ოპოზიციის ლიდერების პოლიტიკურად მოტივირებული დევნა და დაპატიმრება ეწინააღმდეგება ძირეულ დემოკრატიულ ღირებულებებს.
ეს არის ავტორიტარული ტაქტიკა, საპირისპირო იმისა, რაც ევროკავშირის კანდიდატი ქვეყნისგან არის მოსალოდნელი. „ქართულმა ოცნებამ“ უნდა შეწყვიტოს სასამართლო სისტემის იარაღად გამოყენება.”
მარტა კოსი, ევროკომისარი გაფართოების საკითხებში: “ოპოზიციური ხმების დაპატიმრება თავდასხმაა საქართველოს დემოკრატიულ საფუძვლებზე, რომლებიც დღითიდღე ირყევა.
მე თავისუფალი და პლურალისტური საზოგადოებისთვის მებრძოლი ქართველების გვერდით ვდგავარ და მოვუწოდებ საქართველოს ხელისუფლებას, გაათავისუფლოს ყველა ჟურნალისტი, აქტივისტი და უსამართლოდ დაკავებული პირი.”
ჯეიმს მაკკლირი, დიდი ბრიტანეთის პარლამენტის წევრი: “როგორც დიდი ბრიტანეთის პარლამენტის წევრი, ვგმობ ჩემი მეგობრის, გიორგი ვაშაძის, დაპატიმრებას. მას მომავალ კვირას უნდა შევხვედროდი.
მივწერ წერილს [დიდი ბრიტანეთის] საგარეო საქმეთა მინისტრს და მოვითხოვ დაუყოვნებლივ რეაგირებას.
საქართველოში ყველა პოლიტიკური პატიმარი უნდა გათავისუფლდეს – დიდმა ბრიტანეთმა ივანიშვილისა და მისი კორუმპირებული მთავრობის წინააღმდეგ სანქციები ახლავე უნდა დააწესოს.”
სვენია ჰანი, ევროპის ლიბერალთა და დემოკრატთა ალიანსის (ALDE) პრეზიდენტი: “აღშფოთებული ვარ!
რეჟიმმა საქართველოში ოპოზიციის კიდევ სამი ლიბერალი ლიდერი დააპატიმრა. ეს პოლიტიკური დევნაა. საქართველოში დემოკრატიული ღირებულებებისა და თავისუფლებების ეროზია ჩვენს თვალწინ ხდება. „ქართული ოცნების“ რეჟიმი შეშინებულია მიმდინარე აქციების, მზარდი საზოგადოებრივი ზეწოლისა და ხმამაღალი ოპოზიციის გამო.
ALDE – ლიბერალები და დემოკრატები ევროპისთვის” აგრძელებს ჩვენი მეგობრებისა და საქართველოს დემოკრატიისთვის მებრძოლი მოსახლეობის გვერდით დგომას. „ქართული ოცნების“ რეჟიმმა პატივი უნდა სცეს საერთაშორისო სამართლის წინაშე აღებულ ვალდებულებებს, დაუყოვნებლივ გაათავისუფლოს ლიბერალური პარტიის დაპატიმრებული ლიდერები, მოხსნას ოპოზიციის წინააღმდეგ ბრალდებები და საქართველო დააბრუნოს ევროპულ გზაზე, რომელიც ქართველმა ხალხმა აირჩია და რომელსაც მოითხოვს საქართველოს კონსტიტუცია.”
24 ივნისს “სტრატეგია აღმაშენებლის“ ლიდერი გიორგი ვაშაძე სასამართლომ პარლამენტის დროებითი საგამოძიებო კომისიის მოთხოვნის შეუსრულებლობის გამო დამნაშავედ ცნო და 7 თვით პატიმრობა შეუფარდა. მას 2 წლით თანამდებობის დაკავებაც აეკრძალა.
23 ივნისს, “ქართული ოცნების” სასამართლომ ოპოზიციის სამ ლიდერს – მამუკა ხაზარაძეს და ბადრი ჯაფარიძეს (ლელო – ძლიერი საქართველო), ასევე ზურაბ გირჩი ჯაფარიძეს (კოალიცია ცვლილებებისთვის) პატიმრობა შეუფარდა.
საგამოძიებო კომისიაზე გამოუცხადებლობის გამო ციხეში უკვე სხედან ნიკა მელია, ნიკა გვარამია (კოალიცია ცვლილებებისთვის) და თავდაცვის ყოფილი მინისტრი ირაკლი ოქრუაშვილი.
ყველა მათგანს თეა წულუკიანის საგამოძიებო კომისიაზე გამოუცხადებლობას ედავებიან.
