ოცნების ერთპარტიულმა პარლამენტმა ადმინისტრაციულ და სისხლის სამართლის კოდექსში რეპრესიული ცვლილებები მიიღო
რეპრესიული ცვლილებები კოდექსში
“ქართული ოცნების” ერთპარტიულმა პარლამენტმა დაჩქარებული წესით ადმინისტრაციულ და სისხლის სამართლის კოდექსში რეპრესიული ცვლილებები მიიღო – მეორე და მესამე მოსმენები 6 თებერვალს გაიმართა.
კერძოდ, ცვლილებები შევა: ადმინისტრაციულ სამართალდარღვევათა კოდექსში, შეკრებებისა და მანიფესტაციების შესახებ კანონსა და სისხლის სამართლის კოდექსში.
რას გულისხმობს ცვლილებები
● საკანონმდებლო პაკეტის მიხედვით, 15-დღიდან 60 დღემდე იზრდება ადმინისტრაციული პატიმრობის ვადა.
● მესაკუთრის თანხმობის გარეშე დახურულ სივრცესა და შენობებში აქციების ჩატარება და საჯარო კრიტიკა, ავტომაგისტრალების, ხიდების, გვირაბების, ესტაკადების, მუნიციპალიტეტის მიერ განსაზღვრული სატრანსპორტო კვანძებისა და რკინიგზის ბლოკირება იკრძალება.
● ადმინისტრაციულ სამართალდარღვევად განისაზღვრება სახელმწიფო პოლიტიკური თანამდებობის პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით, რისთვისაც მკაცრი სანქციები განისაზღვრება.
● სისხლის სამართლის კოდექსში იქნება რიგი ცვლილებები: ძალადობრივი ქმედებებისკენ საჯაროდ მოწოდება აქამდე ისჯებოდა მხოლოდ ჯარიმით და საზოგადოებისთვის სასარგებლო შრომით, არსებული ცვლილებით, ამ ქმედებისათვის განისაზღვრება პატიმრობა სამ წლამდე ვადით.
● იზრდება სისხლის სამართლებრივი პატიმრობის ვადა პოლიციელების მიმართ წინააღმდეგობის, მუქარის და ძალადობისათვის და ეს გადავა მძიმე დანაშაულთა კატეგორიაში 5 წლიდან 6 წლამდე.
● სისხლის სამართლის წესით დაისჯება, პოლიტიკურ თანამდებობის პირზე, სახელმწიფო მოსამსახურეზე, ასევე საჯარო მოსამსახურეზე თავდასხმის ან ძალადობის მუქარის ჩამდენი პირი.
● მკაცრდება სანქცია პოლიციელზე, ხელისუფლების წარმომადგენელსა და მათი ოჯახის წევრებზე თავდასხმისათვის, ჯგუფურობის არაერთგზისობის საშიში საშუალებით განხორციელების შემთხვევაში. ეს კონკრეტული გარემოებები გადავა დამამძიმებელ გარემოებებში.
● სისხლის სამართლის წესით დაისჯება, პოლიტიკურ თანამდებობის პირზე, სახელმწიფო მოსამსახურეზე, ასევე საჯარო მოსამსახურეზე თავდასხმის ან ძალადობის მუქარის ჩამდენი პირი.
დეპუტატებმა მეორე მოსმენის შემდეგ კანონპროექტში ცვლილებები შეიტანეს, რის მიხედვითაც “შეკრებებისა და მანიფესტაციების შესახებ” კანონის მე-9, მე-11 და მე-11 პრიმა მუხლებით გათვალისწინებული ნორმების დარღვევა, გამოიწვევს:
1. ჯარიმას 5000 ლარის ოდენობით ან ადმინისტრაციულ პატიმრობას 15 დღემდე ვადით, ორგანიზატორის შემთხვევაში კი 15 000 ლარით დაჯარიმებას და 20 დღემდე ადმინისტრაციულ პატიმრობა;
2. ქმედების განმეორებითი ჩადენა გამოიწვევს ადმინისტრაციულ პატიმრობას 25 დღემდე, ნაცვლად კანონპროექტის თავდაპირველ ვერსიაში ჩაწერილი 20 დღისა.
3. ორგანიზატორობის შემთხვევაში განმეორებითი ქმედების ჩადენისთვის განისაზღვრა 60 დღემდე პატიმრობა. პირველად ვერსიაში ეწერა, “5 დღიდან 60 დღემდე პატიმრობა.
