პატიმართა ნაწილის ოჯახები ამნისტიის კანონპროექტს აქციით გააპროტესტებენ
ამნისტიის კანონპროექტს გააპროტესტებენ
პატიმართა ნაწილის ოჯახის წევრები 19 ივლისს პარლამენტთან “ქართული ოცნების” მიერ ინიციირებული ამნისტიის შესახებ კანონპროექტს აქციაზე გააპროტესტებენ. მათი თქმით, ამნისტია არის შერჩევითი და აქციის მთავარი მოთხოვნა იქნება, გახადონ ის საყოველთაო და გავრცელდეს პატიმართა 1/4-ზე.
იუსტიციის მინისტრი რატი ბრეგაძე “დეზინფორმაციას” უწოდებს გავრცელებულ ინფორმაციას მოშიმშილე პატიმრების რაოდენობის შესახებ და ამტკიცებს, რომ ეს “საზოგადოების შეცდომაში შეყვანას ისახავს მიზნად”.
ბრეგაძე ხაზს უსვამს რაოდენობას, თუმცა პატიმრების შიმშილობასთან დაკავშირებით სხვა დამატებით ინფორმაციას არ ავრცელებს და ყურადღებას ოპოზიციასა და კრიტიკულ მედიაზე ამახვილებს.
“გავრცელებული ინფორმაცია მოშიმშილე პატიმრების რაოდენობის შესახებ არის დეზინფორმაცია, რომელიც მიზნად ისახავს საზოგადოების შეცდომაში შეყვანას!
პირდაპირი, ან ირიბი ფორმით პატიმრების წახალისება შიმშილობისკენ დიდი მავნებლობაა. ოპოზიციას და მედიას, რომელსაც ადამიანურობის პრეტენზია აქვს, არ უნდა სჭირდებოდეს შეხსენება, რომ ადამიანის ჯანმრთელობითა და სიცოცხლით მხოლოდ ნამუსისგან დაცლილი ბოროტმოქმედები თამაშობენ და მანიპულირებენ.” – წერს მინისტრი Facebook-ზე.
ადვოკატების ინფორმაციით, ქუთაისის N2 პენიტენციურ დაწესებულებაში უკვე მეოთხე დღეა, 20 პატიმარი შიმშილობს. მათი თქმით, საპროტესტო ტალღა გაიზრდება, რადგან პატიმრები უკვე 12 წელია ელოდებიან საყოველთაო ამნისტიის გამოცხადებას, ხოლო მთავრობის კანონპროექტი “რეალურად, ციხეში მყოფ პატიმრებს” არ ეხება.
“ეხება მსუბუქ მუხლებს, პირველ ნაწილებს, ნასამართლობის არმქონე პირებს და ასეთ პირებს, როგორც წესი, არც პროკურატურა, არც სასამართლო ციხეში არ უშვებს და ან პირობითი მსჯავრის ქვეშ არიან, ან ალტერნატიული სასჯელების” – თქვა ერთ-ერთმა ადვოკატმა ტელეკომპანია “ფორმულასთან” საუბრისას.
“TV პირველთან” საუბრისას ერთ-ერთმა პატიმრის ოჯახმა განაცხადა, რომ ის კანონპროექტი, რომელიც წარადგინა “ქართულმა ოცნებამ” არის აშკარად შერჩევითი, რადგან გამოყოფილი არის კონკრეტული მუხლები და არ ეხება ყველას.
“ეს იმედი, რაც აქამდე ჰქონდათ და რაც გაუჩინეს, არ წაართვან და უშუალოდ ყველას შეეხოს ეს ამნისტია.”
ამ დროისთვის სასჯელაღსრულების დეპარტამენტს საკითხზე განცხადება არ გაუკეთებია.
- პაატა ზაქარეიშვილის კომენტარი: “ქართული ოცნება“ ევროპაში ერთადერთი ევროფარისევლური პარტიაა, ამბობს ერთს, აკეთებს – მეორეს
- “სერიოზული ხარვეზები” – რა წერია წამების პრევენციის კომიტეტის დასკვნაში “ვივამედისა” და სააკაშვილის შესახებ
- “მამაჩემი კრიმინალური ავტორიტეტია” შვილების მიერ მოყოლილი სამი ამბავი
საქართველოს პარლამენტში „ამნისტიის შესახებ“ კანონპროექტი 12 ივლისს დააინიციირეს. ამნისტიის პროექტი ფრაქცია „ქართულმა ოცნებამ“ წარადგინა. ინიციატორთა თქმით, ამნისტია 2024 წლის პირველ ივლისამდე ჩადენილ სისხლის სამართლის დანაშაულებს შეეხება და სისხლის სამართლის კოდექსის 66 მუხლს მოიცავს. ასევე, 1/6-ით შემცირება 225 მუხლსაც შეეხება [მუხლი 225 – ჯგუფური ძალადობის ორგანიზება, ხელმძღვანელობა ან მასში მონაწილეობა – ისჯება ექვსიდან ცხრა წლამდე პატიმრობით, მასში მონაწილეობა – ოთხიდან ექვს წლამდე პატიმრობით].
ოპოზიციის ნაწილმა პარლამენტში ამნისტიის შესახებ კანონპროექტი 28 თებერვალს შეიტანა. კანონპროექტის ავტორია პარტია “გირჩი”, ხოლო პროექტის თანაავტორები არიან: “ნაციონალური მოძრაობა”, “სტრატეგია აღმაშენებელი”, “ევროპელი სოციალისტები”, ალეკო ელისაშვილი, ხატია დეკანოიძე და ტარიელ ნაკაიძე.
აღნიშნული კანონპროექტის მიხედვით, სასჯელი თითქმის ყველა პატიმარს შეუმცირდება გარდა იმ პირებისა, რომლებიც არასრულწლოვანთა წინააღმდეგ ჩადენილ დანაშაულში არიან მსჯავრდადებულნი. თუმცა, უმრავლესობამ აღნიშნულ კანონპროექტზე უარი თქვა.
