ევროსასამართლომ სააკაშვილს უარი უთხრა სამკურნალოდ გადაყვანაზე
საქართველოს იუსტიციის მინისტრის, რატი ბრეგაძის ცნობით, მიხეილ სააკაშვილს სტრასბურგის სასამართლომ პოლონეთში სამკურნალოდ გადაყვანაზე უარი უთხრა.
“მათ მიმართეს სტრასბურგის სასამართლოს და მოითხოვეს დროებით ღონისძიებად მიხეილ სააკაშვილის ვარშავაში სამკურნალოდ გადაყვანა. დღეს გამოქვეყნდა გადაწყვეტილება, რომლის თანახმადაც, მსჯავრდებულ მიხეილ სააკაშვილს საქმეზე – “სააკაშვილი საქართველოს წინააღმდეგ”, უარი ეთქვა ვარშავაში გადაყვანაზე და ამავდროულად, სახელმწიფოს არ დაევალა მისი ქვეყნის შიგნით სხვა სამკურნალო დაწესებულებაში გადაყვანა”, – განაცხადა ბრეგაძემ საგანგებო ბრიფინგზე.
მინისტრის თქმით, ეს მეტყველებს იმაზე, რომ “სახელმწიფოს ყველა მოქმედება მიხეილ სააკაშვილის შემოსახლების დღიდან იყო კორექტული და ადამიანის უფლებების უმაღლესი სტანდარტების შესაბამისი”.
“დროებითი ღონისძიება იყო მოთხოვნილი, რომ გადაყვანილი ყოფილიყო ვარშავაში, მას ამ მოთხოვნაზე ეთქვა უარი. რაც შეეხება მოტივაციას, ჩვენი მხრიდან წარდგენილი იყო შესაბამისი მტკიცებულებები, რადგან მრავალჯერ ვთქვი და ვიმეორებ – ჩვენ ვსაუბრობთ მხოლოდ და მხოლოდ მტკიცებულებების საფუძველზე და არა აღქმების და შეგრძნებების. დაცვის მხარემაც წარადგინა შესაბამისი მოთხოვნა და ამის შესახებ მე ვერ მოგაწოდებთ ინფორმაციას.” – აღნიშნა ბრეგაძემ.
მისივე განმარტებით, ექიმების მხრიდან თუ იქნება რეკომენდაცია, რომ შესაძლებელია სააკაშვილის გადაყვანა პენიტენციურ დაწესებულებაში, ის იქნება გადაყვანილი.
პატიმრობაში მყოფი საქართველოს მესამე პრეზიდენტის საქმეზე სტრასბურგის ადამიანის უფლებათა სასამართლოში გადაუდებელი ღონისძიების გამოყენებაზე განაცხადი ერთი თვის წინ, 11 აპრილს გაიგზავნა. მანამდე, 2 აპრილს, სახალხო დამცველის მიერ შექმნილმა კონსილიუმმა მიხეილ სააკაშვილი კლინიკა “ვივამედში” მოინახულა და საგანგაშო დასკვნა გამოაქვეყნა.
დასკვნის მიხედვით, პაციენტის მდგომარეობა 19 თებერვლის (წინა ვიზიტის) შემდეგ მნიშვნელოვნად დამძიმდა – მან ოთხი კილო დაიკლო, აქვს მეოთხე სტატიის კახექსია და მძიმე სარკოპენია. დასკვნაში აღნიშნულია, რომ თუ წონის კლება გაგრძელდება, საქართველოს მესამე პრეზიდენტი “საწოლს მიჯაჭვული გახდება“.
რაც შეეხება პროგნოზსა და რისკებს, ომბუდსმენის კონსილიუმის ცნობით, მიხეილ სააკაშვილისთვის კრიტიკულ წონას წარმოადგენს 52-53 კილოგრამი, რის შემდეგადაც დაიწყება ორგანიზმის შეუქცევადი ცვლილებები და ის საწოლს მიჯაჭვული გახდება. დასკვნაში ასევე ვკითხულობთ, რომ “ამჟამად ზედამხედველობის გარეშე პაციენტის მოძრაობა სახიფათოა“, რადგანაც ძალიან მაღალია დავარდნის, სხეულის დაზიანებისა/მოტეხილობების რისკი.
მესამე პრეზიდენტის ოჯახის წევრები და ადვოკატები ჯანმრთელობის მდგომარეობის გამო, სააკაშვილისთვის სასჯელის გადავადებას ან სასჯელისგან გათავისუფლებას ითხოვდნენ და ამ შუამდგომლობით სასამართლოს მიმართეს. თუმცა მიხეილ სააკაშვილს სასამართლომ სასჯელი არ გადაუვადა. გადაწყვეტილება დასკვნით სხდომაზე მოსამართლე გიორგი არევაძემ გამოაცხადა.
კლინიკა “ვივამედში” ამბობდნენ, რომ მიხეილ სააკაშვილის მასის ინდექსი არ შეესაბამება რეანიმაციაში მკურნალობის პარამეტრებს. კლინიკის დირექტორის, ნინო ნადირაძის თქმით, თუ დააპირებენ მის რეანიმაციაში მოთავსებას, ინფორმაციას აუცილებლად გაავრცელებენ. თუმცა 22 თებერვალს გამართულ პრესკონფერენციაზე კლინიკის ექიმებმა თავადაც არ უარყვეს, რომ ექსპრეზიდენტის მდგომარეობა მძიმეა – მათი თქმით, პაციენტს ზოგადი სისუსტე აწუხებს, არაბალანსირებულად იკვებება და წონაში კლებას აგრძელებს
