ირაკლი კობახიძე სანქციებზე: ენტონი ბლინკენი კორუფციაში გასვარეს

ირაკლი კობახიძე სანქციებზე

“ქართული ოცნების” თავმჯდომარე, ირაკლი კობახიძე აშშ-ის სახელმწიფო დეპარტამენტის მიერ მოსამართლეების სანქცირებას ეხმაურება და ამბობს, რომ ენტონი ბლინკენის გადაწყვეტილების უკან “კორუფციული პროცესები დგას”. მისივე განმარტებით, “სახელმწიფო მდივანი ამ ყველაფერში გასვარეს”. 

ტელეკომპანია “იმედის” ეთერში კობახიძემ ასევე განაცხადა, რომ ენტონი ბლინკენი “საქართველოზე ფიქრით არ იძინებს და არ იღვიძებს” და მას ბევრად მეტი საქმე აქვს:

“მომიწევს ცოტა მძიმე შეფასების გაკეთება, პირდაპირ ვიტყვი – ამ განცხადების უკან დგას კორუფციული პროცესები, კორუფციაში ფული არ იგულისხმება მარტო, განსაკუთრებით შემაშფოთებელია, რომ პირდაპირ სახელმწიფო მდივანი, ბლინკენი გასვარეს ასეთი განცხადების დადებისას, რაც არის ძალიან ცუდი, მძიმედ მეტყველებს ადამიანებზე, რომლებსაც ასეთი ინფორმაცია მიაქვს სახელმწიფო მდივნამდე.”

მისივე თქმით, როდესაც მასთან [ბლინკენთან] მიაქვთ ასეთი უხეში დოკუმენტები, ეს არის, “რა თქმა უნდა, ძალიან მძიმე და ეს მეტყველებს კორუფციულ” პროცესებზე, რომელიც ამ ყველაფერს საფუძვლად უდევს.

კობახიძემ კვლავ ახსენა მიხეილ სააკაშვილი და განაცხადა, რომ “თუ ვინმეს, ვინმეს დასანქცირება უნდა, კეთილი ინებონ და დაიწყონ სააკაშვილით”, რომლის გათავისუფლებასაც ითხოვენ აქტიურად და მერე დაგველაპარაკონ ჩვენ.

“ჩვენს მხარეს არის სიმართლე, ეს არის მთავარი. მათ მხარეს არ არის სიმართლე. დაგველაპარაკონ წესებით, ეს არის ჩვენი მკაცრი მოთხოვნა, ცალ ფეხზე ჩვენ არ დავდგებით, ჩვენ ვიდგებით ორ ფეხზე და დავიცავთ ჩვენი ქვეყნის სუვერენიტეტს.

ჩვენ სხვა თემებიც გვაქვს, ბევრ სხვა თემასაც გავიხსენებდი, დღეს არ მინდა ამაზე საუბარი, შეიძლება, მომავალში დადგეს ამის დრო. ბევრი სხვა თემაც გვაქვს, მათ შორის სატელეფონო საუბრებში რეებს ითხოვდნენ ჩვენგან და ა.შ. ეს ყველაფერი არსებობს, ამიტომ, მე მინდა, ყველას მოვუწოდო, დაიცვან წესები და იმოქმედონ წესების შესაბამისად. ჩვენი პრინციპი არის ის, რომ სასამართლო უნდა იყოს დამოუკიდებელი”, – ამბობს კობახიძე.

რაც შეეხება “ქართული ოცნების” კიდევ ერთ ლიდერს, არჩილ თალაკვაძეს, მისი თქმით,  აშშ-ის მიერ სანქცირებული მოსამართლეების დროს სასამართლოში “ბალანსი” დაბრუნდა, რადგან მოქალაქეებიც და სახელმწიფოც თითქმის თანაბრად იგებდნენ საქმეებს. მისივე თქმით, “სამწუხაროა”, რომ აშშ-სა და საქართველოს ურთიერთობები სანქციების ენამდე მივიდა.

“დაბრუნდა ბალანსი, ნიშნავს, რომ სახელმწიფო კი აღარ ჩაგრავს სასამართლოში ყოველთვის, 99% შემთხვევაში როგორც ეს იყო წინა ხელისუფლების დროს, არამედ არის გონივრული ბალანსი, სადაც მოქალაქეებიც ამტკიცებენ თავიანთ სიმართლეს და სახელმწიფოც. ეს აშკარაა, ამის უგულებელყოფა შეუძლებელია, ეს იცის აშშ-მაც”, – განაცხადა თალაკვაძემ.

● აშშ-მ ჩინჩალაძე, მურუსიძე და კიდევ ორი მოსამართლე დაასანქცირა
● კელი დეგნანი სანქციებზე: კორუფციული ქმედებებით სამართლის უზენაესობა შებღალეს
● PACE საქართველოზე: რეფორმების პროცესი ჩერდება

დღეს ამერიკის სახელმწიფო დეპარტამენტმა “მნიშვნელოვანი კორუფციული საქმიანობის გამო” მოსამართლეებს მიხელ ჩინჩალაძეს, ლევან მურუსიძეს, ირაკლი შენგელიას და  ვალერიან ცერცვაძეს, ასევე მათი ოჯახის წევრებს, სანქციები დაუწესა და შეერთებულ შტატებში შესვლა აუკრძალა. ამის შესახებ აშშ-ს სახელმწიფო მდივნის, ენტონი ბლინკენის განცხადებაშია ნათქვამი. 

ენტონი ბლინკენი აღნიშნავს, რომ მათ, როგორც სასამართლოს თავმჯდომარეებმა და იუსტიციის უმაღლესმა წევრებმა, ბოროტად გამოიყენეს საკუთარი თანამდებობები.

დამოუკიდებელი ექსპერტები და უფლებადამცველები უკვე წლებია აღნიშნავენ, რომ ლევან მურუსიძე და მიხეილ ჩინჩალაძე საქართველოში ხელმძღვანელობენ ე.წ. მოსამართლეთა მძლავრ „კლანს“, რომელიც ბლოკავს საქართველოსა და ევროკავშირს შორის კავშირების გასაძლიერებლად საჭირო რეფორმებს.

ორივე მოსამართლე დაკავშირებულია ძლიერ ორგანოსთან, რომელსაც ჰქვია იუსტიციის უმაღლესი საბჭო, რომელიც ქვეყნის სასამართლო ხელისუფლების მთავარი ზედამხედველობის ორგანოა. ითვლება, რომ მათ ასევე აქვთ ფარული ურთიერთობა ბიძინა ივანიშვილთან, საქართველოს უმდიდრეს ადამიანთან, “ქართული ოცნების” დამფუძნებელთან და ქვეყნის არაფორმალურ მმართველად.

მურუსიძე წინა ხელისუფლების ლოიალობითაც გამოირჩეოდა – სანდრო გირგვლიანის გახმაურებული საქმის მოსამართლე იყო ნაციონალური მოძრაობის დროს. მურუსიძის სახელს სანდრო გირგვლიანის მკვლელობის საქმეში ბრალდებულებისთვის სასჯელის შემსუბუქება უკავშირდება.

სასამართლო სისტემის გაუმჯობესების შესახებ პუნქტი ჩაიწერა შარლ მიშელის 19 აპრილის შეთანხმებაშიც. მოგვიანებით რამდენჯერმე გააკეთა განცხადება აშშ-ის ელჩმაც. თუმცა, ხელისუფლებამ დანიშვნების პროცესი არ შეაჩერა და უზენაეს სასამართლოში უვადო მოსამართლეების დანიშვნა გააგრძელა.

31 ოქტომბერს, მოსამართლეთა კონფერენციამ იუსტიციის უმაღლესი საბჭოს 2 ახალი მოსამართლე წევრი აირჩია: პაატა სილაგაძე და გიორგი გოგინაშვილი. მიჩნეულია, რომ სილაგაძე და გოგინაშვილი ე.წ მოსამართლეთა კლანის წევრები არიან, ამასთან, ორივე მათგანი განწესებულია თბილისის სააპელაციო სასამართლოს უვადო მოსამართლედ.