ლელომ პიროტექნიკის აკრძალვასთან დაკავშირებით კანონპროექტი მოამზადა

პიროტექნიკის აკრძალვასთან დაკავშირებული კანონპროექტი

საპარლამენტო ოპოზიცია “ლელო – პარტნიორობა საქართველოსთვის” პიროტექნიკის აკრძალვასთან დაკავშირებით კანონპროექტს აინიციირებს. ამის შესახებ დეპუტატმა ანა ნაცვლიშვილმა განაცხადა.

როგორც დეპუტატმა განმარტა, კანონპროექტი ითვალისწინებს ორ გამონაკლისს – ერთი ეს არის ე.წ. F1 კატეგორიის პიროტექნიკა, რომლის უსაფრთხოების მანძილია 1 მეტრი ან ნაკლები და მისი გამოყენება შესაძლებელია დახურულ სივრცეში. მეორე კატეგორიის პიროტექნიკის გამოყენება კი დასაშვები იქნება მხოლოდ მთავრობის განკარგულების საფუძველზე, ერთჯერადად, განსაკუთრებულ შემთხვევებში.

“ჩვენი კანონპროექტი გულისხმობს პიროტექნიკის შეძენა, შენახვა, რეალიზაციის ფაქტობრივად სრულ აკრძალვას, ვინაიდან პიროტექნიკა საფრთხეს უქმნის ადამიანის ჯანმრთელობას, აბინძურებს გარემოს, საფრთხეს უქმნის ცხოველებსა და ფრინველებს,“ – განაცხადა ანა ნაცვლიშვილმა.

დეპუტატი არმაზა ახვლედიანი კი ამბობს, რომ კანონპროექტის ინიციატორებმა შეისწავლეს სხვადასხვა სახელმწიფოს პრაქტიკა პიროტექნიკის გამოყენებასთან დაკავშირებით და “გაიარეს კონსულტაციები გარემოსდაცვით არასამთავრობო” ორგანიზაციებთან. ასევე, კანონპროექტს საფუძვლად უდევს პარლამენტის კვლევითი ცენტრის მიერ მომზადებული კვლევა საქართველოსა და ევროკავშირის სახელმწიფოებში პიროტექნიკის გამოყენების მიმართულებით არსებულ კანონმდებლობასთან დაკავშირებით.

ახვლედიანი იმედს იტოვებს, რომ 2024 წელს საქართველო შეხვდება პიროტექნიკის გარეშე.

● ყველა ამბობს, რომ საქართველოში არაფორმალური მმართველობაა. რაში გამოიხატება ის? მაგალითები
● საქართველოს პარლამენტმა მთავრობას 10-ზე მეტი ადამიანის შეკრების შეზღუდვის უფლება მისცა
● “მშობლებმა არ იციან როგორ ელაპარაკონ შვილებს”. ანიმაციური გმირები სექსუალური განათლებისთვის

საქართველოს პარლამენტში პიროტექნიკაზე საუბარი 2018 წელს დაიწყო, როდესაც პიროტექნიკის ნაწარმის რეალიზაცია მკაცრად რეგლამენტირებული გახდა. კერძოდ, არასრულწლოვანებისთვის პიროტექნიკის მიყიდვა უკვე კანონითაა აკრძალული. შესაბამისი ცვლილება ადმინისტრაციულ სამართალდარღვევათა კოდექსში შევიდა.

კანონის ინიციატორები აცხადებდნენ, რომ პიროტექნიაზე თავისუფალი წვდომა საზოგადოებისთვის, განსაკუთრებით კი არასრულწლოვანთათვის რისკის შემცველია, “რაც არაერთხელ დადასტურებულა სხვადასხვა ტრამვებითა და უბედური შემთხვევებით.”

2018 წლის იანვარში თბილისში მოქმედ სამედიცინო დაწესებულებებში პიროტექნიკით გამოწვეული ტრავმული დაზიანებებით მკურნალობდა 44 ადამიანი, მათ შორის 24 არასრულწლოვანი. 2017 წელის დასაწყისშიც პიროტექნიკის გამოყენების შედეგად 54 ადამიანი დაშავდა.

მიუხედავად იმისა, რომ დაზარალებულთა სტატისტიკა მცირდება, გამონაკლისი არც 2023 წელი ყოფილა. ოფიციალური ინფორმაციით, 31 დეკემბრიდან 3 იანვრის ჩათვლით, პიროტექნიკით 39 მოქალაქე დაშავდა, მათგან 24-ს კი საავადმყოფოში გადაყვანა დასჭირდა.

პიროტექნიკით დაზიანების დროს, დამწვრობის გარდა, ხშირად იხლიჩება, კანი და კანქვეშა ქსოვილი. ზიანდება სისხლძარღვები და ნერვები. ზოგჯერ საჭირო ხდება თითების ამპუტაცია. პიროტექნიკით დაზიანებულთა უმრავლესობას პლასტიკურ-რეკონსტრუქციული ჩარევაც სჭირდებათ.

მაგალითად დიდ ბრიტანეთში პიროტექნიკური ნაკეთობების მიყიდვა 18 წლამდე პირებისთვის იკრძალება. პიროტექნიკური ნაწარმის გაყიდვის, ფლობისა და გამოყენების წესის დარღვევა ისჯება კანონით, ჯარიმა შეადგენს 5000-მდე ბრიტანულ გირვანქა სტერლინგს, ან თავისუფლების აღკვეთით 6 თვის ვადით.

ამერიკის შეერთებულ შტატებში 18 წლამდე პირთათვის სამომხმარებლო ფეიერვერკის მიყიდვა ან გაცემა აკრძალულია ფედერალური კანონით, გარდა იმ შემთხვევისა, როდესაც არასრულწლოვანი დასაქმებულია სამომხმარებლო პიროტექნიკის რეალიზაციის ობიექტზე და მას ზედამხედველობას უწევს ობიექტის სრულწლოვანი თანამშრომელი.