2008 წლის აგვისტოს ომი: ცხინვალს არ სჯერა "ქართული ოცნების"
ცხინვალს არ სჯერა „ქართული ოცნების“
საქართველოში შეიქმნა დროებითი საგამოძიებო კომისია, რომელიც გამოიძიებს ყოფილი პრეზიდენტის, მიხეილ სააკაშვილისა და მისი პარტიის “ერთიანი ნაციონალური მოძრაობის“ დროს ჩადენილ სავარაუდო დანაშაულებს. სხვა საკითხებთან ერთად, საქართველოს დღევანდელი ხელისუფლება სააკაშვილს ადანაშაულებს 2008 წლის აგვისტოს ომის დაწყებაში სამხრეთ ოსეთის გარშემო.
მმართველი პარტია “ქართული ოცნების“ აღმასრულებელმა მდივანმა მამუკა მდინარაძემ განაცხადა, რომ “გამოიკვლევენ 2008 წელს სამხრეთ ოსეთში ყოფილი პრეზიდენტის რეჟიმის მონაწილეობით ომის დაწყების გარემოებებს“.
თავად ცხინვალში სკეპტიკურად უყურებენ ამ საკითხს და თვლიან, რომ საქართველოს ხელისუფლება საკუთარ ინტერესებს ატარებს და 2008 წლის მოვლენები და ოსები მათ არ ეხებათ.
“დრო გვიჩვენებს“ – ე.წ. სამხრეთ ოსეთის საგარეო უწყების რეაქცია
ე.წ. სამხრეთ ოსეთის საგარეო საქმეთა სამინისტრომ საქართველოს ხელისუფლების ინიციატივაზე ოფიციალური განცხადება გაავრცელა, სადაც აღნიშნულია, რომ “პირები, რომლებმაც სამხედრო აგრესია წამოიწყეს, გასცეს ბრძანებები სამხრეთ ოსეთში შეჭრის, მშვიდობისმყოფელებზე თავდასხმისა და ოსი ხალხის გენოციდის ჩადენის შესახებ, უნდა დაისაჯონ“.
ამასთან, სამინისტროში სკეპტიკურად უყურებენ კომისიის მუშაობის ეფექტიანობას:
“თუ რამდენად ზუსტად და გამჭვირვალედ შეაფასებს კომისია 2008 წლის აგვისტოს მოვლენებს, ამას დრო გვიჩვენებს, თუმცა უკვე აშკარაა საერთაშორისო კომისიის (ჰეიდი ტალიავინის ხელმძღვანელობით) დასკვნა, რომლის მიხედვითაც საქართველო აგრესორად არის მიჩნეული.
ასევე, ნათელია ოსი ხალხის არჩევანიც – დამოუკიდებელი სახელმწიფოს მშენებლობა, ურთიერთობების ყოვლისმომცველი გაძლიერება რუსეთთან, რომელიც მისი უსაფრთხოების გარანტორია, და სხვა მეგობრულ ქვეყნებთან კავშირების განმტკიცება,“ – აღნიშნულია სამინისტროს განცხადებაში.
ცხინვალელი პოლიტიკოსი ალან კოჩიევი თავის ტელეგრამ-არხზე მიხეილ სააკაშვილისა და მისი მთავრობის 2008 წლის აგვისტოს მოვლენებთან დაკავშირებით მიმდინარე გამოძიებას გამოეხმაურა.
„გასაგებია, რომ მთელი ეს პროცესი ახლა პოლიტიკური ხასიათისაა და “ქართულ ოცნებას“ საკუთარი ოპონენტების საბოლოოდ განადგურება სურს. მაგრამ როგორც არ უნდა იყოს, თუ იმ დანაშაულთა ჩამდენები მართლაც დაისჯებიან, ამას ვერ ავუვლით გვერდს,“ – აღნიშნა კოჩიევმა.
მისი თქმით, იმედი აქვს, რომ „საქართველოში მოიძებნებიან პატიოსანი ადამიანები, რომლებიც დასვამენ საკითხს არა მხოლოდ 2008 წლის, არამედ 1990-იანი წლების დასაწყისისა და 2004 წლის სამხედრო დანაშაულებზე, რომლებიც ქართველმა შეიარაღებულმა ფორმირებებმა და იმდროინდელმა პოლიტიკოსებმა ჩაიდინეს“.
“სარეკლამო ტრიუკი“ – ცხინვალში სკეპტიკურად უყურებენ თბილისის ინიციატივას
JAMnews-ის მიერ გამოკითხული სამხრეთ ოსეთის ოფიციალური პირები და ექსპერტები “ქართული ოცნების“ ინიციატივას სკეპტიკურად აფასებენ.
ერთ-ერთი ადგილობრივი ექსპერტი, რომელიც ანონიმურად დარჩენას ამჯობინებს, ამბობს, რომ კომისია, რომლის ხელმძღვანელიც საქართველოს იუსტიციის ყოფილი მინისტრია, შესაძლოა მხოლოდ შიდა პოლიტიკურ მიზნებს ემსახურებოდეს.
“ეს მხოლოდ შიდა პოლიტიკური თამაშებია. ეჭვი მეპარება, რომ საქართველოში მართლაც აღელვებთ სამართლიანობის აღდგენა ან ჩვენ წინაშე მონანიება.“
სამოქალაქო საზოგადოების ერთ-ერთმა წარმომადგენელმა კი სააკაშვილის 2008 წლის აგვისტოს მოვლენებზე პასუხისმგებლობის დაკისრების მოთხოვნა “სარეკლამო ტრიუკად“ მოიხსენია, რომელიც სამხრეთ ოსეთის მოსახლეობაზეა გათვლილი. თუმცა, მისი თქმით, ეს „რეკლამა“ სრულიად არაეფექტურია:
“საქართველო არ ცვლის თავის დღის წესრიგს – კვლავაც აცხადებს, რომ ჩვენი რესპუბლიკა მისი ტერიტორიაა. ეს კომისიებიც იმისთვის იქმნება, რომ საზოგადოებრივი განწყობები სამხრეთ ოსეთში საქართველოს სასარგებლოდ შეცვალოს. მაგრამ ჩვენ ეს ტრიუკები დიდი ხნის წინ გამოვიცანით. ჩვენთან არავის ადარდებს – არც სააკაშვილი, არც საქართველო. რაც უნდათ, ის უქნიათ. ჩვენ საქართველოს არც ერთ სიტყვას აღარ ვუჯერებთ.“
“ერთი გასროლით – ორი კურდღელი“
სამხრეთ ოსეთის პროკურატურის ყოფილი თანამშრომელიც მსგავს მოსაზრებას გამოთქვამს.
“ის, რომ საქართველოს მთავრობა 2008 წლის მოვლენებს იძიებს, მე მანიპულაციად მიმაჩნია. ამით მათ სურთ აგვიხსნან, რომ საქართველოში ახლა სხვა პოლიტიკური სისტემა მოქმედებს, რომელიც სააკაშვილის რეჟიმის ქმედებებს გმობს.
ერთი გასროლით ორ კურდღელს კლავენ – შიდა პოლიტიკური სცენიდან საკუთარ ოპონენტებს აძევებენ და ამავდროულად ცდილობენ, ოსური საზოგადოების ნდობა მოიპოვონ.“
მიუხედავად ამისა, ყოფილი პროკურორი აღნიშნავს, რომ “ქართველი პოლიტიკოსები დღემდე საუბრობენ რუსეთის 2008 წლის აგრესიასა და საქართველოს ტერიტორიის 20%-ის ოკუპაციაზე. აშკარა წინააღმდეგობაა. და, რაც მთავარია, დღემდე უარს ამბობენ არაგრესიის აქტზე ხელმოწერაზე“.
ბოდიში, რომელიც (ჯერ) არ ყოფილა
2024 წელს, საქართველოს პარლამენტის წინასაარჩევნო კამპანიის პიკში, მმართველი პარტიის “ქართული ოცნების“ დამფუძნებელმა და ქვეყნის არაფორმალურმა ლიდერმა, ბიძინა ივანიშვილმა, განაცხადა, რომ თუ “ოცნება“ ხელისუფლებაში დარჩებოდა, საქართველო ოს ხალხს მათთვის მიყენებული ტკივილის გამო ბოდიშს მოუხდიდა.
ივანიშვილის ამ განცხადებას საქართველოს საზოგადოებაში უკიდურესად ნეგატიური რეაქცია მოჰყვა. სამხრეთ ოსეთშიც განსაკუთრებული ენთუზიაზმი არ გამოუწვევია – ქართველების უმეტესობა მიიჩნევს, რომ ბოდიშის მოხდა საჭირო არ არის, ხოლო ოსური საზოგადოება დარწმუნებულია, რომ მხოლოდ ბოდიში საკმარისი ვერ იქნება…
2024 წლის 26 ოქტომბერს გამართული საპარლამენტო არჩევნები “ქართულმა ოცნებამ“ მოიგო, თუმცა სამხრეთ ოსეთისთვის ბოდიშის მოხდისკენ ნაბიჯები ჯერ არ გადაუდგამს.
ოპოზიციამ (მათ შორის “ერთიანმა ნაციონალურმა მოძრაობამ“) და სამოქალაქო საზოგადოებამ არც არჩევნების შედეგები აღიარა და არც მთავრობის ლეგიტიმურობა, რაც იმას ნიშნავს, რომ “ოცნებას“ ახლა მთლიანად შიდა პოლიტიკური პრობლემებით არის დაკავებული.
სწორედ ეს არის ის, რასაც ცხინვალში ამბობენ – ბოდიშის საკითხი თბილისის დღის წესრიგში პირველ რიგში არ დგას.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
