18 მაისიდან სილამაზის სალონები იხსნება, უქმდება 3 ადამიანზე მეტის შეკრების შეზღუდვაც

18 მაისიდან საქართველოში მუშაობას განაახლებენ სილამაზის სალონები და ესთეტიკური მედიცინის ცენტრები. 

14 მაისის მონაცემებით, საქართველოში კორონავირუსით ინფიცირების 6 შემთხვევაა დადასტურებული. კარანტინის რეჟიმშია 4246 ადამიანი, ხოლო სტაციონარში მეთვალყურეობის ქვეშ – 394 პირი. კორონავირუსით ინფიცირებულთაგან 372 გამოჯანმრთელდა და 12  გარდაიცვალა.

“ეკონომიკის გახსნის” პირველი, 6-ეტაპიანი გეგმის თანახმად, მთავრობა სილამაზის სალონების გახსნას 8 ივნისისთვის გეგმავდა.

თუმცა, პრემიერ-მინისტრ გიორგი გახარიას განცხადებით “ეპიდემიოლოგიური მდგომარეობის გაუმჯობესების გამო”, მთავრობამ სილამაზის სალონების და ესთეტიკური მედიცინის ცენტრების გახსნა 18 მაისიდან გადაწყვიტა. 

სალონებში დაცული უნდა იყოს ჯანდაცვის სამინისტროს მიერ დადგენილი წესები. სალონში არ უნდა იმყოფებოდეს ერთდროულად 5 ადამიანზე მეტი. გარდა ამისა, სალონში შესვლისას ყველა მომხმარებელს უნდა გაუზომონ ტემპერატურა და ჩაიწერონ მისი მონაცემები. ასევე აუცილებელია ნიღბის და ხელთათმანის გამოყენება.

18 მაისიდან იხსნება ის სტომატოლოგიური კლინიკებიც, რომლებსაც შემოწმების შემდეგ ჯანდაცვის სამინისტრომ მუშაობის განახლების ნებართვა მისცა. 

უქმდება 3 ადამიანზე მეტის შეკრების შეზღუდვაც – 18 მაისიდან, როგორც ღია, ისე დახურულ სივრცეში 3-ზე მეტი ადამიანის შეკრება დასაშვები იქნება. 

თუმცა, ეს აკრძალვა  ავტომობილებში მყოფი ადამიანების რაოდენობის შეზღუდვაზე არ გავრცელდება: მანქანაში 3-ზე მეტი ადამიანის ყოფნა ისევ აკრძალულია. იკრძალება მძღოლის გვერდით სავარძელზე მგზავრის ჯდომაც. 

• მთავრობის ანტიკრიზისული გეგმა – ვინ რა დახმარებას მიიღებს
• როგორ აპირებს საქართველოს ხელისუფლება სოფლის მეურნეობის გადარჩენას
• თბილისი გაიხსნა, კიდევ რა ამუშავდა 11 მაისიდან. დეტალურად

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი: საღამოს 21:00 საათიდან დილის 06:00 საათამდე მოქალაქეების გადაადგილება აკრძალულია.

საგანგებო მდგომარეობა 22 მაისს მთავრდება. მანამდე კი შეზღუდვები ეტაპობრივად იხსნება. ამ დროისთვის აღდგენილია ავტომობილების გადაადგილება და გახნილია ის ქალაქებიც, რომლებიც 15 აპრილიდან ჩაკეტილი იყო: ბათუმი, ქუთაისი, რუსთავი, თბილისი. 

საკოორდინაციო საბჭოს გადაწყვეტილებით, 18 მაისიდან გაიხსნება მარნეულიც, სადაც  23 მარტიდან კარანტინია გამოცხადებული. 

კორონავირუსის პანდემიის გამო დაწესებული შეზღუდვების შემდეგ, 2020 წლის იანვრიდან აპრილამდე ექსპორტი 11.9%-ით, იმპორტი კი 11.8%-ით შემცირდა. 

ევროპის რეკონსტრუქციისა და განვითარების ბანკმა (EBRD) კი საქართველოს 2020 წლის ეკონომიკური ზრდის პროგნოზი -5.5%-მდე შეამცირა.