04.04.20. ქართული ოპოზიცია მასშტაბურ აქციას და საარჩევნო კამპანიის სტარტს აანონსებს
4 აპრილს, 16:00 საათზე, თბილისში, რუსთაველის გამზირზე გაერთიანებული ქართული ოპოზიცია მასშტაბური აქციის გამართვას გეგმავს.
ეს გადაწყვეტილება მას შემდეგ იქნა მიღებული, რაც 10 თებერვალს “ევროპული საქართველოს” ლიდერი გიგი უგულავა დააკავეს.
უგულავას დაკავების შემდეგ ოპოზიციამ შეწყვიტა ხელისუფლებასთან მიმდინარე მოლაპარაკებების პროცესი საარჩევნო სისტემასთან დაკავშირებით.
“ბიძინა ივანიშვილი ცდილობს, ოპოზიცია ამოაგდოს კონსტიტუციური სივრციდან, საარჩევნო სივრციდან. ჩვენ მას ვეუბნებით: დაგამარცხებთ მაინც არჩევნებით და ქუჩიდან ზეწოლას გავაძლიერებთ და გავაღრმავებთ,” – განაცხადა “რესპუბლიკური პარტიის” წევრმა დავით ბერძენიშვილმა.
• საპარლამენტო არჩევნები საქართველოში 2020
გაერთიანებული ოპოზიციის ნაწილი – “ძალა ერთობაშია”, “ევროპული საქართველო”, “გირჩი” და “დემოკრატიული მოძრაობა” მიიჩნევენ, რომ ოპოზიციამ არა მხოლოდ ქუჩაში, არამედ საარჩევნო ოლქებშიც ერთიანი ძალით უნდა იბრძოლოს, რომ არსებული საარჩევნო სისტემის ფარგლებში მმართველი გუნდის დამარცხება შეძლოს.
ეს პარტიები გამოთქვამენ მზაობას მაჟორიტარულ ოლქებში საერთო კანდიდატები შეარჩიონ და ერთმანეთს კონკურენცია არ გაუწიონ.
“ახალი გეგმა მდგომარეობს შემდეგში: დღე და ღამე მუშაობა ხალხთან და საერთაშორისო ასპარეზზე. 4 აპრილს, 16:00 საათზე, რუსთაველზე ვიკრიბებით, სადაც განვაცხადებთ არჩევნებში ჩვენი ერთობლივად თანამშრომლობის მექანიზმი რა გვექნება. ეს არის თარიღი, როცა მართლაც ისტორიული პროცესი იწყება, როდესაც ქართულმა ოპოზიციამ მოძებნა საერთო ენა”, – განაცხადა “ახალი საქართველოს” ლიდერმა გიორგი ვაშაძემ.
“თბილისში ძალიან დიდი და მასობრივი აქცია ჩატარდება. ჩვენ ამ აქციაზე გავალთ უკვე მნიშვნელოვანი შეთანხმებებით, მათ შორის, მაჟორიტარული ოლქების საკმაო ნაწილში შეთანხმებებით”, – აღნიშნა დავით ბერძენიშვილმა და დასძინა, რომ ეს აქცია ოპოზიციისთვის პრაქტიკულად საარჩევნო კამპანიის სტარტი იქნება.
თუმცა, ამ ინიციატივას ჯერჯერობით არ უერთდება პოლიტიკური მოძრაობა “ლელო”.
“ლელო” 4 აპრილს ოპოზიციის დაგეგმილ აქციაში მონაწილეობას აპირებს, თუმცა საერთო მაჟორიტარ კანდიდატებთან დაკავშირებით ჯერ პოზიცია არ აქვს.
“ლელოში” ყურადღებით ვადევნებთ თვალ-ყურს ოპოზიციურ პარტიებს შორის მიმდინარე კონსულტაციებს მაჟორიტარ კანდიდატებთან დაკავშირებით, თუმცა ამ წუთას ჩვენი გეგმით ვვითარდებით. “ლელოს” პარტიული გადაწყვეტილება ამასთან დაკავშირებით ჯერ არ არსებობს”, – განაცხადა “ლელოს” ერთ-ერთმა ლიდერმა ბადრი ჯაფარიძემ.
