ცნობილი ფსიქოლოგის თვითმკვლელობა - მიმდინარეობს გამოძიება

ცნობილმა ფსიქოლოგმა დაიანატ რზაევმა თავი მოიკლა – მან საკუთარ ბინაში 25 იანვარს თავი ქამრით ჩამოიხრჩო. ნათესავები იუწყებიან, რომ გარდაცვლილს დეპრესია ჰქონდა და რამდენიმე დღის განმავლობაში სამსახურში არ გასულა. გარდაცვალების წინ დაწერილ თავის წერილში ის თხოვნას გამოთქვამს, რომ მის სიკვდილში არავინ დაადანაშაულონ. რზაევი 45 წლის იყო.

მიუხედავად ამისა, ბაქოს იასმალის რაიონის პროკურატურამ სააგენტო АПА-ს აცნობა, ფაქტზე აღძრულია სისხლის სამართლის საქმე სისხლის სამართლის კოდექსის 125-ე მუხლით – „თვითმკვლელობამდე მიყვანა“.

აქ, რადიო თავისუფლებასთან გამოთქმულ თავის კომენტარში დაიანატ რზაევი ლაპარაკობს აზერბაიჯანში გახშირებული თვითმკვლელობების მიზეზებზე, რისკის ჯგუფებსა და იმაზე, რომ საჭიროა ასეთი შემთხვევების სტატისტიკის წარმოება და მიზეზების გამოძიება, რასაც აზერბაიჯანში სათანადო ყურადღებას არ უთმობენ.

„თვითმკვლელთა 90 პროცენტი ფსიქიკურად ჯანსაღი ადამიანია. უფრო ხშირად ეს მამაკაცები არიან, ვიდრე ქალები, თუმცა ქალები უფრო მიდრეკილები არიან თვითმკვლელობაზე ლაპარაკისკენ“. ფსიქოლოგი ამბობს, რომ ხშირად თვითმკვლელობის მიზეზი ხდება სოციალური უსამართლობა და პრობლემები, რომლების გადასაწყვეტადაც ადამიანს არავინ ჰყავს, ვისაც დასახმარებლად მიმართავდა.

დაიანატ რზაევი სიამოვნებით აძლევდა ინტერვიუებს და კომენტარებს მედია-რესურსებს. ამიტომაც მასობრივმა საინფორმაციო საშუალებებმა სწრაფადვე მოახდინეს მის სიკვდილზე რეაქცია. ვებგვერდმა minval.az-მა გამოაქვეყნა სტატია სათაურით „თვითმკვლელობა, რომლისაც არავის სჯერა“.

• report.az-ის მოთხოვნის საპასუხოდ, აზერბაიჯანის შინაგან საქმეთა სამინისტრო იტყობინება 2016 წლის მხოლოდ 9 თვის განმავლობაში აღძრულია სისხლის სამართლის 500 საქმე „თვითმკვლელობამდე მიყვანის“ მუხლით.
• ფსიქიატრმა კიამალია ტალიბოვამ, ჯანმრთელობის სამინისტროსთან არსებული ფსიქიკური ჯანმრთელობის ცენტრის სწრაფი ფსიქოლოგიური დახმარების განყოფილების უფროსმა, სააგენტო АПА-ს განუცხადა, რომ მთლიანად 2016 წლის განმავლობაში აზერბაიჯანში სუიციდი 327-მა ადამიანმა ჩაიდინა.

გამოქვეყნებულია 26.01.2017