აფგან მუხტარლის პრესტიჟული საერთაშორისო პრემია მიენიჭა

ევროპის კავშირმა, პროგრამა „აღმოსავლეთი პარტნიორობის“ ფარგლებში, აზერბაიჯანელ ჟურნალისტ აფგან მუხტარლის პაველ შერემეტის სახელობის პრემია მიანიჭა.

დაჯილდოების ცერემონია ტალინში, სამოქალაქო საზოგადოების კონფერენციის ფარგლებში გაიართა. პრემია აფგან მუხტარლის ნაცვლად, რომელიც თავის სამშობლოში, აზერბაიჯანში, პატიმრობაში იმყოფება, მისმა მეუღლემ, ლეილა მუსტაფაევამ მიიღო.

ლეილა მუსტაფაევამ ცერემონიაზე განაცხადა, რომ მისი ქმრის – მუხტარლის დაპატიმრება მხოლოდ აზერბაიჯანის პრობელმა არ არის.

“მის გატაცებაში პასუხისმგებლობა „აღმოსავლეთი პარტნიორობის“ პროგრამის წევრ სხვა ქვეყანასაც – საქართველოსაც ეკისრება“, – განაცხადა მუსტაფაევამ.

მისი აზრით, აუცილებელია არამხოლოდ აფგან მუხტარლის გათავისუფლების მოთხოვნა, არამედ იმ დანარჩენი 160 ადამიანისაც, რომლებიც აზერბაიჯანში პოლიტიკური მოტივებით არიან დაპატიმრებულები. მათ შორის 10 ჟურნალისტია – „ევროპა თავის ეკონომიკური ინტერესების გამო, აზერბაიჯანში არსებულ ადამიანების უფლებების შელახვაზე თვალს არ უნდა ხუჭავდეს“, – თქვა მან.

ლეიელა მუსტაფაევამ თქვა, რომ სურდა, თავისი ქმრის სიტყვა წაეკითხა, თუმცა ციხის ხელმძღვანელობამ ტექსტი ამოიღო და მისი ციხიდან გატანა ვერ მოხერხდა. ამის შესახებ უკრაინის ჰრომადსკოეს რადიო იუწყება.

• აფგან მუხტარლი ბოლო ხანს თბილისში ცხოვრობდა, სადაც ის სხვადასხვა ჟურნალისტურ გამოძიებას აწარმოებდა, მათ შორის აზერბაიჯანის მმართველი ოჯახის ბიზნესის შესახებაც. ამ წლის მაისში აფგან მუხტარლი თბილისის ცენტრიდან გაიტაცეს. უფლებადამცველები საქართველოსგან ჟურნალისტის გატაცების გამოძიებას მოითხოვენ.გატაცების შემდეგ, რომელიც, დიდი ეჭვით, ქართველმა სამართალდამცავებმა განახორციელეს, მუხტარლი აზერბაიჯანში გადაიყვანეს, სადაც მას ბრალად საზღვრის უკანონოდ გადაკვეთა და კონტრაბანდა წაუყენეს.