სომხეთში ღვინისა და კონიაკის წარმოების ზრდა შეინიშნება

ფოტო: გრანტ მარინოსიანი, JAMnews

სომხეთში ღვინისა და კონიაკის წარმოების მოცულობა, 2013-2016 წლების მონაცემებთან შედარებით, გაზრდილია. ღვინის წარმოება 30%-ით გაიზარდა, კონიაკის – 61%-ით, ხოლო არყის წარმოების მოცულობამ 31%-ით დაიკლო.

ზემოთ მოყვანილი ოფიციალური მონაცემების კომენტირებისას, სომხეთის ღვინის ეროვნული ცენტრის ხელმძღვანელმა ავაგ არუტიუნიანმა აღნიშნა, რომ ეს ციფრები სინამდვილეს სრულად არ შეესაბამება. „კონიაკთან დაკავშირებით დაშვებულია შეცდომა. შეცდომა დათვლის მეთოდიკით არის განპირობებული, რადგან გამოთვლებში ასევე გათვალისწინებულია შემოტანილი და ექსპორტირებული სპირტის მოცულობები. სინამდვილეში კონიაკის წარმოების მოცულობა შეიძლება 15-20%-ით იყოს გაზრდილი. თუ ამას კრიზისულ 2011 წელს შევადარებთ, მაშინ ღვინის წარმოების 1%-იანი და კონიაკის – 7%-იანი ზრდა გვაქვს, და არყის წარმოების მოცულობის – დაახლოებით 10% -იანი კლება“.

ავაგ არუტიუნიანმა თქვა, რომ სომხური ალკოჰოლური სასმელები ექსპორტით ძირითადად რუსეთში გადის. თუმცა, რუსეთის ფედერაციამ  2025 წლიდან მხოლოდ საკუთარი წარმოების არყისა და კონიაკის რელიზაციაზე გადასვლა გადაწყვიტა.

ღვინის ეროვნული ცენტრის ხელმძღვანელმა თქვა: „ ახლა სანქციები იძულებულს ხდის რუსეთს, რომ ეს პროგრამები უფრო აქტიურად განახორციელოს…  ასეთ პირობებში რუსეთი შემოწმების მეთოდების ინტენსიურად დანერგვას დაიწყებს. ახლახან რუსეთში შეტანილი კონიაკის წარმოშობის შემოწმება დაიწყეს, თუმცა ეს ფორმალური მიზანი იყო. სინამდვილეში, მათ ბაზარზე რუსული კონიაკის პოზიციების გამყარება სურდათ“.

ავაგ არუტიუნიანი ასევე მიიჩნევს, რომ რუსეთთან მიმართებით სანქციების გამკაცრებას, შესაძლოა, სომხეთისთვის დადებითი შედეგებიც ჰქონდეს: ჩვენს მეწარმეებს ახალი ბაზრების ძებნა და საკუთარი პროდუქციის გაუმჯობესება მოუწევთ.