სომხეთში კორუფციასთან ბრძოლა გრძელდება, მაგრამ შედეგი ჯერ არ ჩანს

კორუფციული მოვლენები სომხეთის მსგავსი მცირე ეკონომიკის მქონე ქვეყნებისთვის დამღუპველია. ამაზე, როგორც ქვეყნის ხელისუფლება, ისე ოპოზიცია და სამოქალაქო საზოგადოებაც თანხმდება –  კორუფციასთან ბრძოლის დღეს ამის შესახებ აზრის გამოთქმის საშუალება ყველას ჰქონდა – განსხვავება მხოლოდ იმ მოსაზრებებს შორის არსებობს, თუ როგორ უნდა ებრძოლონ მას.

სომხეთის იურისტთა ასოციაციის თვმჯდომარე კარენ ზადოიანი მიიჩნევს, რომ საზოგადოება კორუფციასთან ბრძოლის ტემპებით უკმაყოფილოა – ადამიანებს იმის ნახვა სურთ, რომ დამნაშავეები ისჯებიან – მისი თქმით, საზოგადოებრივი ორგანიზაციები კორუფციასთან ბრძოლის საკითხში თანმიმდევრულები უნდა იყვნენ.

„კუდიანებზე ნადირობის გამოცხადება არ არის საჭირო, ყველაფერი კანონის მიხედვით უნდა გაკეთდეს, ინსტრუმენტები – სახეზეა. საზოგადოება სადამსჯელო ზომების მიღებას ელის. ერთია კორუფციასთან ბრძოლაზე ლაპარაკი,  მისი რეალურ ცხოვრებაში განხორციელება კი სულ სხვაა“, – თქვა მან.

„ანტიკორუფციული ასოციაციის“ თავმჯდომარის, ალექსანდრ ამარიანის თქმით, მიუხედავად იმისა, რომ სომხეთში არსებობს გარკვეული საკანონმდებლო რეგულაციები, რომელთა თანახმადაც, კორუფციაში მხილებულ პირებს სისხლის სამართლის პასუხისმგებლობა უნდა დაეკისროთ, მათი ნაწილი არ მოქმედებს, და შედეგად, კორუფცია ყველა სახელმწიფო სფეროში არსებობს, რადგან დამნაშავეები არ ისჯებიან.

იმავდროულად ექსპერტს მიაჩნია:

„ხელისუფლებაში კორუფციასთან ბრძოლის პოლიტიკური ნება არსებობს, თუმცა კორუფციულ მოვლენებში მონაწილეობაზე უარის თქმამდე თავად ქვეყნის მცხოვრებლებიც უნდა მივიდნენ“.

ხელისუფლება ირწმუნება, რომ კორუფციის აღმოსაფხვრელად ყველაფერი კეთდება. იუსტიციის მინისტრმა დავიდ არუტიუნიანმა თქვა, რომ კორუფციასთან ბრძოლა სამი მიმართულებით ხორციელდება:

• ანტიკორუფციული საქმიანობა;
• პასუხისმგებლობის დაკისრება;
• კორუფციის აღკვეთა.

მინისტრის თქმით, ამ წლების განმავლობაში ხელისუფლებამ კორუფციის წინააღმდეგ მნიშვნელოვანი საპროფილაქტიკო ნაბიჯები გადადგა:

• უკანონო გამდიდრებისთვის სისხლის სამართლის სასჯელი;
• იმ ჩინოვნიკების სიის გაზრდა, ვინც საკუთარი შემოსავლებისა და ქონების დეკლარაცია უნდა წარმოადგინოს;
• ინფორმატორების სისტემის შექმნა;
• ახალი ანტიკორუფციული ორგანოს შექმნა, რომელიც 2018 წლის აპრილიდან ამოქმედდება.

ექსპერტები სასჯელის ფაქტორის მნიშვნელოვნებას აღნიშნავენ, და ხაზს უსვამენ, რომ საკანონმდებლო ცვლილებები არ გამოიყენება  ხელისუფლებასთან დაახლოებული მაღალი რანგის ჩინოვნიკების მიმართ, რომლებიც თავიანთი უფლებამოსილებებით ბოროტად სარგებლობენ და უკანონოდ მდიდრდებიან.

„მთავარ კითხვად რჩება: მაინც რატომ არ მოხდა ამ სფეროში მიმართულების ცვლა, როდესაც ასე ღიად არის  გამოხატული ბრძოლის სურვილი და საამისოდ აუცილებელი ინსტრუმენტების კომპლექსიც იქმნება. მიზეზი ისაა, რომ სიტყვებს ფასი დაკარგული აქვთ, მაღალი თანამდებობის პირთა სიტყვებს კაპიკის ფასი  აქვს და საზოგადოებას ამის არ სჯერა. შედგად კი, შექმნილ ინსტრუმენტებს, იმის გამო, რომ მათ არავინ, ჟანგი მოედება და გამოუსადეგარი გახდება“, – განაცხადა ადვოკატმა ნორაირ ნორიკიანმა.    

„მსხვილი თევზის“ დაჭერა ჯერ არ გამოდის 

სომხეთის პრეზიდენტი სერჟ სარგსიანი რამდენიმე წლის წინათ აცხადებდა, რომ „მსხვილი თევზის“ დაჭერისას „ხელი თავში უნდა ჩაავლო“.

სომხეთის გენერალურმა პროკურორმა არტურ დავიტიანმა ჟურნალისტების იმ შენიშვნის საპასუხოდ, რომ მაღალი თანამდებობის პირებისთვის პასუხისმგებლობა არასდროს დაუკისრებიათ, თქვა, რომ ვიდრე „მსხვილ თევზს“ დაიჭერდე, ჯერ უნდა გაიგო, წარმოადგენს თუ არა ქმედება დანაშაულს, და შესაძლებელია თუ არა ამის დამტკიცება.

„გპირდებით, როგორც კი „მსხვილ თევზს“ დანაშაული დაუმტკიცდება, მაშინვე შეგატყობინებთ“, – თქვა მან