სომხეთში დიდ სამამულო ომში გამარჯვების 72-ე წლისთავს აღნიშნავენ
სომხეთში დღეს, 9 მაისს გამარჯვებისა და მშვიდობის დღესასწაულს აღნიშნავენ.
დიდ სამამულო ომში გამარჯვებასა და შუშის გათავისუფლებასთან დაკავშირებით ადრიანი დილიდან სადღესასწაულო ღონისძიებები იმართება.
ერევანში, გამარჯვების პარკში უცნობი ჯარისკაცის საფლავის მარადიულ ცეცხლთან, პატივისცემის ნიშნად, სტუდენტებმა, სკოლის მოსწავლეებმა, ომის ვეტერანებმა და ქვეყნის ოფიციალურმა პირებმა ყვავილები დააწყვეს.
მედლებით მკერდდამშვენებული ვეტერანები ერთმანეთს ომისდროინდელ მოგონებებს უზიარებდნენ და ფაშისტურ გერმანიაზე გამარჯვების საქმეში მათ მიერ შეტანილი წვლილის დაფასებისთვის მადლობას იხდიდნენ.
„სომხები საუკეთესო ჯარისკაცები იყვნენ, და ჩვენმა ხალხმა შვა ცნობილი მარშლები, რომლებმაც უდიდესი როლი შეასრულეს დიდ სამამულო ომში გამარჯვების საქმეში“, – განაცხადა ჟურნალისტებთან საუბრისას დიდი სამამულო ომის ვეტერანმა, სომხეთის დამსახურებულმა მასწავლებელმა როზალია აბგარიანმა. ის პირველად სტალინგრადის მახლობლად დაიჭრა, როდესაც რადიოკავშირზე მუშაობდა და მფრინავებს მოქმედებების კოორდინირებაში ეხმარებოდა.
„ეს იყო საშინელი ომი… არის ისეთი ეპიზოდებიც, რომლების გახსენებაც კი არ მინდა. იყო დამარცხებები, უკან დახევაც, მაგრამ ჩვენ ჯარისკაცები რწმენამ და სამშობლოსადმი სიყვარულმა გადაარჩინა“, – ჰყვება როზალია აბგარიანი. გამარჯვების 72-ე წლისთავთან დაკავშირებით გაიმართა აღლუმი და გაიხსნა საველე სამზარეულო. გამარჯვების პარკში, კარვებში გახსნილ სამზარეულოებში ყველას ომისდროინდელი ჯარისკაცული საკვების ულუფებით უმასპინძლდებოდნენ.
