სომხეთში დამოუკიდებელი ანტიკორუფციული ორგანო შეიქმნება

სომხეთში მიღებულია გადაწყვეტილება ახალი ანტიკორუფციული ორგანოს შექმნის თაობაზე. ამის შესახებ სომხეთის საინფორმაციო საშუალებებს სომხეთის იუსტიციის მინისტრის მოადგილემ, სურენ კმორიანმა აცნობა.

„ანტიკორუფციული კანონის შექმნის თაობაზე კანონის პროექტი უკვე შემუშავებულია და საზოგადოებრივი განხილვისთვის არის გადაცემული. უახლოეს თვეებში კანონპროექტი დასამტკიცებლად მთავრობას წარედგინება. ეს იქნება დამოუკიდებელი ორგანო, რომელიც კორუფციის შემთხვევების აღკვეთით დაკავდება, და უფლებამოსილებათა საკმაოდ ფართო წრე ექნება“, – აღნიშნა კმორიანმა.

საკითხი ოპოზიციის წარმომადგენლებს, საზოგადოებრივ ორგანიზაციებსა და ხელისუფლებას შორის შორის ცხარე განხილვის საგნად იქცა.

მმართველი უმრავლესობის დეპუტატი გევორგ კოსტანიანი, რომელიც მანამდე გენერალური პროკურორის თანამდებობას იკავებდა, ახალი ორგანოს შექმნის აუცილებლობას ვერ ხედავს: „ჩვენ ათი ასეთი ორგანოს შექმნა შეგვიძლია, მაგრამ ეს იმას არ ნიშნავს, რომ ეს კორუფციასთან ბრძოლის ეფექტიანობას აამაღლებს“.

ოპოზიციური საპარლამენტო ფრაქცია „ელკის“ დეპუტატი, უფლებადამცველი არტაკ ზეინალიანი ამასთან დაკავშირებით აღნიშნავს, რომ მკვეთრი და თვალშისაცემი დასახელების მქონე დამატებითი სტრუტურების შექმნას  არ ემხრობა: „მე იმის მომხრე ვარ, რომ მოქმედმა ორგანომ – კორუფციასთან ბრძოლის საბჭომ – შესაბამისი უფლებამოსილება მიიღოს და თავისი ფუნქციების სრულფასოვნად შესრულება შეძლოს“.

ამავდროულად, სომხეთში ევროკავშირის დელეგაციის მეთაურმა, ელჩმა პიოტრ სვიტალსკიმ აღნიშნა: „თუკი სომხეთში არსებულ კორუფციას ღირსეული პასუხი არ გაეცემა, საეჭვოა, ევროკავშირის მხრიდან სომხეთის ეკონომიკაში მნიშვნელოვანი ინვესტიციები განხორციელდეს“.

ელჩის თქმით, გასულ წელს ევროკავშირმა სომხეთის ხელისუფლებისგან გარანტიები მიიღო ორმხრივი თანამშრომლობის გაღრმავების შესახებ –  როგორც კორუფციასთან ბრძოლის თვალსაზრისით, ისე სხვა სფეროებშიც.