სომხეთის 2017 წლის ათი საუკეთესო სპორტსმენის სიამ მწვავე დისკუსია გამოიწვია

სომხეთის მედიამ ქვეყნის 2017 წლის ათი საუკეთესო სპორტსმენის სია გამოაქვეყნა. საუკეთესოთა ათეული სპორტულ ჟურნალისტებს შორის ჩატარებული კენჭისყრის შედეგებისა და  გულშემატკივრთა მობილური შეტყობინებების (sms) მიხედვით განისაზღვრა.

საუკეთესოთა სიაში შევიდნენ:

• გენრიხ მხითარიანი, ფეხბურთელი, ინგლისური კლუბის „მანჩესტერ იუნაითედის“ ნახევარმცველი;
• არტურ ალექსანიანი, ბერძნულ-რომაული სტილით მოჭიდავე, ოლიმპიური ჩემპიონი, მსოფლიოს სამგზის ჩემპიონი;
• ლევონ არონიანაი, საერთაშორისო გროსმეისტერი, მსოფლიო თასის ორგზის მფლობელი;
• გრიგორ მხითარიანი, სომხეთის სამბოს ნაკრების წევრი, მსოფლიო ჩემპიონი;
• მაქსიმ მანუკიანი, ბერძნულ-რომაული სტილის მოჭიდავე, მსოფლიო ჩემპიონი;
• ოვანეს ბაჩკოვი, მოკრივე, სომხეთის მრავალგზის ჩემპიონი, ევროპის ჩემპიონი;
• სიმონ მარტიროსიანი, ძალოსანი, ოლიმპიური თამაშების ვერცხლის პრიზიორი;
• ედგარ სტეპანიანი, სომხეთის ველოსპორტის ნაკრების წევრი;
• არტურ ტოვმასიანი, სომხეთის სპორტული ტანვარჯიშის ნაკრების წევრი;
• ტიგრან კირაკოსიანი, სომხეთის სამბოს ნაკრების წევრი, მსოფლიო თასის ოთხგზის მფლობელი, მსოფლიოს ჩემპიონი და ევროპის სამგზის ჩემპიონი.

სპორტსმენებს სიმბოლური სტატუეტები და Hyundai Elantra-ს მარკის ავტომობილების გასაღებები გადასცეს.

თუმცა, ამ წლის საუკეთესო სპორტსმენების შერჩევას ყველა სამართლიანად არ მიიჩნევს. არსებობს მოსაზრება, რომ ამ წოდების ღირსი ბევრი სპორტსმენი ამ სიაში ვერ მოხვდა.

კერძოდ, უკმაყოფილება გამოთქვა ბერძნულ-რომაული სტილით მოჭიდავე არტურ ალქსანიანმა. მის განცხადებას სპორტის სამყაროში დიდი გამოხმაურება მოჰყვა. საქმე ისაა, რომ პირველად ხდება, როდესაც საუკეთესოთა რიცხვში მოხვედრილი სპორტსმენი უკმაყოფილებას გამოთქვამს.

„მე ამ სიას არ ვეთანხმები. წელს ჩვენ გვყავდა მსოფლიო და ევროპის ჩემპიონატების გამარჯვებულები, რომლებიც ამ სიაში ვერ მოხვდნენ. ვფიქრობ, ეს სპორტის სამინისტროს მიზეზით მოხდა. ალბათ კენჭისყრა არასწორად იყო ორგანიზებული. როგორ შეიძლება მსოფლიოს ჩემპიონი სიაში ვერ მოხვდეს? ნურავის დარჩება შთაბეჭდილება, თითქოს ჩემს აზრზე იმან იმოქმედა, რომ მე ამ სიაში პირველი არ ვიყავი. უბრალოდ, ამ კენჭისყრის შედეგებს არ ვეთანხმები“, – განაცხადა არტურ ალექსანიანმა.

წლის 10 საუკეთესო სპორტსმენის სია გააკრიტიკა არტურ ალექსანიანის ძმამ – რაფაელ ალექსანიანმაც, რომელიც ასევე ბერძნულ-რომაულის სტილით მოჭიდავეა. მისი აზრით, ფეხბურთელი გენრიხ მხითარიანი, რომელიც ინგლისურ კლუბ „მანჩესტერ იუნაითედში“ თამაშობს, ამ სიაში ვერ უნდა მოხვედრილიყო.

„ფეხბურთელ გენრიხ მხითარიანს დიდ პატივს ვცემ. სომხური ფეხბურთის ისტორიაში ის უდავოდ საუკეთესო ფეხბურთელია, მაგრამ თავისი ქვეყნისთვის მას ისეთი არაფერი მოუპოვებია, რომ ქვეყნის საუკეთესო სპორტსმენთა შორის მოხვდეს. ის, რომ მან ჩვენს ქვეყანას სახელი გაუთქვა, იმას არ ნიშნავს, რომ სომხეთის ათი საუკეთესო სპორტსმენის სიაში უნდა შევიდეს“, – განაცხადა სპორტსმენმა.