სომხეთის თავდაცვის მინისტრის მოვალეობის შემსრულებელი ახალ მთავრობაში თავის ადგილს ვერ ხედავს

 „ახალი მთავრობის შემადგენლობაში მუშაობას გამოვრიცხავ“

სომხეთის თავდაცვის მინისტრის მოვალეობის დროებით შემსრულებელი ვიგენ სარგსიანი მოვალეობის შესრულებას ახალი მინისტრის დანიშვნამდე გააგრძელებს. ამის შესახებ ვიგენ სარგსიანმა ჟურნალისტებთან შეხვედრისას განაცხადა.

ვიგენ სარგსიანმა აღნიშნა, რომ ახალ პრემიერ-მინისტრ ნიკოლ ფაშინიანთან პოლიტიკური აზრთა სხვადასხვაობის გამო, ახალი გუნდის შემადგენლობაში თავის ადგილს ვერ ხედავს:

„ჩამოყალიბებული გუნდი პროგრესის უზრუნველყოფას ვერ შეძლებს. მე მაქვს პოლიტიკური შეხედულებები, რომლებიც ამ გუნდში მუშაობის საშუალებას არ მაძლევს. ვერაფერი შემაკავებს, რომ ჩემი მოვალეობა შევასრულო, ვიდრე გავიგებ, თუ ვის დაეკისრა ეს უფლებამოსილება.

ახალი მთავრობის შემადგენლობაში მუშაობას გამოვრიცხავ, რადგან მინისტრი – დაქირავებული მუშაკი არ არის. მინისტრი – პოლიტიკური თანამდებობაა, არსებობს პოლიტიკური შეხედულებები. რთულია, იყო ეფექტური მინისტრი, როდესაც საერთო ამოცანას არ ემსახურები“.

ვიგენ სარგსიანმა თქვა, რომ ყველაფერს იღონებს, რომ მისმა შემცვლელმა წარმატებულად შეძლოს მუშაობა. ის ახალ მინისტრს ყველა აუცილებელ ინფორმაციას მიაწვდის.

 „მომხდარი რევოლუცია არ არის“

ვიგენ სარგსიანი ასევე შეეხო ახლახან განვითარებულ მოვლენებს და უკვე ყოფილი ხელისუფლების საწინააღმდეგო მოძრაობის ლიდერის ნიკოლ ფაშინიანის პრემიერ-მინისტრად არჩევასაც. მინისტრის მოვალეობის შემსრულებელმა თქვა, რომ მომხდარს რევოლუციად არ აღიქვამს. მისი აზრით, ხელისუფლების ცვლა მოხდა.

მან თქვა, რომ ამჟამად სომხეთის რესპუბლიკური პარტია, რომელიც პარლამენტის უმრავლესობას შეადგენს და პრემიერ-მინისტრის თანამდებობა უმცირესობას დაუთმო, კონსტრუქციულ ოპოზიციას წარმოადგენს, და დრო გვიჩვენებს, თუ როგორ იმუშავებს ეს სიტუაცია პრაქტიკაში.

 „საზღვართან სამხედრო ძალის მობილიზება გრძელდება“

პრემიერ-მინისტრ ნიკოლ ფაშინიანის მიერ ბოლო თვის განმავლობაში ინიცირებულ მოვლენებს, რამაც „ხავერდოვანი რევოლუციის“ სახელწოდება მიიღო, საზღვართან დაძაბულობა ახლდა.  ვიგენ სარგსიანის თქმით ეს დაძაბულობა სროლებით არ გამოიხატებოდა.

 „ადგილი ჰქონდა საზღვართან სამხედრო ძალის მობილიზებას, რაც ისევ გრძელდება“, – განაცხადა მან.

სარგსიანმა აღნიშნა, რომ სომხეთის შეიარაღებული ძალები სიტუაციის გაკონტროლებას აგრძელებს და ნებისმიერ მომენტში მზად არის საპასუხო მოქმედებებისთვის.

ვიგენ სარგსიანის თქმით, აუცილებელია სახელმწიფო ინსტიტუტების შეიარაღებულ ძალებთან დაკავშირება, განსაკუთრებით ისეთ ქვეყანაში როგორიც სომხეთია, სადაც ყველა მე-40 მაცხოვრებელი სამხედროა.

 „ადამიანებს უნდა ესმოდეთ, თუ რას ნიშნავს დიდი ჯარი პატარა ქვეყანაში“, – დასძინა მან.

მინისტრის მოვალეობის დროებით შემსრულებელს მიაჩნია, რომ უსაფრთხოება ზეპარტიული ცნებაა, და ქვეყნის დაცვა – მხოლოდ ერთი პარტიის ან საპარლამენტო უმრავლესობის სამუშაოს არ წარმოადგენს.