სომხეთის ახალი ხელისუფლება სამსახურებრივი მანქანების ნაწილზე უარს იტყვის

სომხეთის მთავრობის აპარატი, ხარჯების ოპტიმიზაციის მიზნით, სამსახურებრივი მანქანების რაოდენობის 30 პროცენტით შემცირებას აპირებს. მინისტრთა კაბინეტის აპარატის ხელმძღვანელი ვარაუდობს, რომ წინა შემადგენლობა ძალიან ბევრ ფულს ხარჯავდა ტრანსპორტზე, და ამიტომაც, სტრუქტურის კუთვნილი 110 მანქანიდან დაახლოებით 70 უნდა დარჩეს.

 „ვფიქრობ, რომ საწვავი ბიუჯეტს ძალიან ძვირი უჯდება. აქ მართლაც მნიშვნელოვანი ეკონომიის გაწევა შეიძლება“, – აღნიშნა მთავრობის აპარატის ხელმძღვანელმა ედუარდ აგაჯანიანმა.

მან ასევე განაცხადა, რომ წინა აპარატი ზედმეტად გაბერილი იყო, დაუსაბუთებელი და გაუმართლებელი ხარჯების ნებას რთავდა:

 „საქმე , პირველ რიგში, სამსახურებრივ ავტომობილებს, და საწვავისთვის გამოყოფილ ქვითრებს ეხება. ეს ყველაფერი დაუსაბუთებელი იყო, და თქვენ მალე ამაში დარწმუნდებით“.

აპარატის ხელმძღვანელი არ გამორიცხავს, რომ სამსახურებრივი მდგომარეობით ბოროტად სარგებლობის შესახებ საქმეები, შესაძლოა, ეროვნული უშიშროების  სამსახურს გადაეცეს.

ნიკოლ ფაშინიანის პრემიერ-მინისტრის თანამდებობაზე არჩევის შემდეგ მის მიერ ჩამოყალიბებული მთავრობის ზოგიერთმა წევრმა სამსახურებრივ მანქანებზე უარი თქვა. კერძოდ, პირველმა ვიცე- პრემიერმა-მინისტრმა არარატ მირზოიანმა მის განკარგულებაში არსებული ხუთი მანქანიდან ორი დაიტოვა. მირზოიანის მაგალითს მიჰბაძა ვიცე-პრემიერმა ტიგრან ავინიანმა. ხოლო მეტროთი მგზავრობისას გადაღებული განათლების და მეცნიერების მინისტრის აირაკ არუთიუნიანის ფოტოს სოციალურ ქსელებში აქტიურად განიხილავენ.

შესაძლოა, უახლოეს ხანში სომხეთში მინისტრთა კაბინეტის ყველა წევრისთვის სამსახურებრივი ტრანსპორტით სარგებლობის საერთო წესი მიიღონ.