აფხაზეთში პოლიტიკოსებისთვის პენსიების მომატების იდეამ დიდი სკანდალი გამოიწვია

ფოტო: იბრაგიმ ჭკადუა

აფხაზეთის საზოგადოებრივი პალატის საბჭომ თხოვნით მიმართა პრეზიდენტ რაულ ხაჯიმბას, რომ ისტორიული, პირველი მოწვევის პარლამენტის დეპუტატებს 50 ათასი რუბლის ოდენობის (თითქმის $900) პერსონალური პენსიები დაენიშნოთ.

აფხაზეთში ჩვეულებრივი ასაკობრივი პენსია 500 რუბლს შეადგენს (დაახლოებით $9).

აფხაზი ხალხის სამამულო ომის ინვალიდები პენსიად 10, 000 რუბლს (დაახლოებით $180)იღებენ, აფხაზეთის გმირის სტატუსის მქონეების პენსია კი  6,500 რუბლია (დაახლოებით $115).

იმ გვარების ჩამონათვალში, ვისაც პერსონალური პენსია უნდა მიენიჭოს, ბევრი განთქმული პოლიტიკური ფიგურაა, მათ შორის – დღეს მოქმედი პოლიტიკოსებიც.  კერძოდ, სიაში შევიდნენ ექს-პრეზიდენტი ალექსანდრ ანქვაბი, ყოფილი საგარეო საქმეთა მინისტრი სერგეი შამბა, პარლამენტის ახლანდელი სპიკერი ვალერი კვარჩია, და ორი ექს-სპიკერი – სოკრატ ჯინჯოლია და ვალერი ბგანბა.

მთლიანობაში სულ 18 ასეთი ექს-დეპუტატია, და თუკი პერსონალური პენსიების შესახებ გადაწყვეტილებას მიიღებენ, ეს ბიუჯეტს თვეში 900,000 რუბლი დაუჯდება (დაახლოებით $16 000).

საზოგადოებრივი პალატის ეს ინიციატივა საზოგადოებამ უკიდურესად ნეგატიურად აღიქვა, მიუხედავად იმისა, რომ  1991-დან 1996 წლამდე მოქმედი პარლამენტის პირველ შემადგენლობის მიმართ  ხალხში, უკვე დიდი ხანია, შემორჩენილია ეპითეტი „ოქროსი“.

სოციალური ქსელები აღშფოთებული კომენტარებით გაივსო. მოგვყავს რამდენიმე მაგალითი:

„როდესაც ქვეყნის ბიუჯეტი ქარიშხალგადავლილივითაა, მთლიანად დაცხრილული, პალატას შესაძლებლად მიაჩნია, რომ ყოველთვიურად 900 ათასი რუბლი დახარჯოს საკმაოდ შეძლებული ადამიანებისთვის პერსონალური პენსიების გადახდაზე. ისინი ხომ პურის უკანასნელი ნაჭრის ამარა არ არიან? სირცხვილია“.

„ისეთი შთაბეჭდილება იქმნება, თითქოს ეს უბრალოდ პროვოკაციაა. ნუთუ ავტორები არ დაფიქრებულან როგორი იქნება ხალხის რეაქცია, მათი პოლიტიკური ორიენტაციის მიუხედავად? წინა პარლამენტმა უკვე უზრუნველყო თავი კარგი პენსიებით. ნუთუ ეს არ ეყოთ? ეს არის ნამდვილი „ნადიმი ჭირიანობის დროს“ და „ცეკვა ძვლებზე“.

„ამ პარლამენტს ახლა უკვე ორმაგად ოქროსი დაერქმევა. ამ ფულით ომის ინვალიდებისთვის რამდენი წამლის ყიდვა შეიძლება, ან რამდენის სამკურნალოდ გაგზავნა?“

“ასეთი ხელფასი პრეზიდენტსაც კი არ აქვს. სიაში, რა თქმა უნდა, დამსახურებული ადამიანები არიან, მაგრამ საპენსიო ფონდის თანხა ზღვარგადასულია“.

“თავიანთი მოქალაქეების ცხოვრება იმდენად გააუმჯობესეს, რომ აუცილებელია, 50- ათასიანი პენსია მიიღონ, როდესაც მოხუცები 500 რუბლს იღებენ? თურმე, დეპუტატებს თავი როგორ ჰყვარებიათ“.

თავად „ოქროს“ პარლამენტის დეპუტატებიდან ამ ინიციატივაზე ჯერჯერობით მხოლოდ ორმა მოახდინა რეაგირება – ექს-პრეზიდენტმა, დღეს წამყვანმა ოპოზიციონერმა ალექსანდრ ანქვაბმა, და რაულ ხაჯინბას ახლანდელმა მრჩეველმა ვლადიმირ ზანთარიამ.  

ალექსანდრ ანქვაბის თქმით,  მიუხედავად იმისა, რომ დეპუტატების დამსახურებები „აშკარაა“, ახლანდელი სოციალურ-ეკონომიკური პირობები არ იძლევა იმის საშუალებას, რომ უმაღლესი საბჭოს პირველი მოწვევის ყველა დეპუტატს, მათ შორის თავად მასაც, პერსონალური პენსია დაენიშნოს. „პირველი მოწვევის პარლამენტიდან ჩემს ზოგიერთ კოლეგას დღეს მძიმე დრო უდგას, აქვთ ჯანმრთელობის პრობლემები. მიმაჩნია, რომ ეს საკითხები ინდივიდუალურად უნდა გადაწყდეს, გამონაკლისის სახით, მაგრამ არა – სიის მიხედვით“, – თქვა ანქვაბმა.

ვლადიმირ ზანთარიამ პერსონალური პენსიების იდეას „არადროული“ უწოდა.

აფხაზეთის პრეზიდენტ რაულ ხაჯინბას,  რომელსაც საზოგადოებრივი პალატა მიმართავს, ამ საკითხთან დაკავშირებით თავის პოზიცია ჯერ არ გამოუთქვამს.

სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრსარემთხვეოდეს