სამხრეთ ოსეთში ჟურნალისტები ჩინოვნიკებისგან ინფორმაციის მიღების პრობლემებზე საუბრობენ

სამხრეთ ოსეთში ჟურნალისტები ამბობენ, რომ მათ ოფიციალური სტრუქტურებიდან ინფორმაციისა და კომენტარების მიღება უჭირთ.

ბევრი ჟურნალისტი ამბობს, რომ ისინი მოჯადოებულ წრეში ხვდებიან. „ინფორმაციის ხელმისაწვდომობის შესახებ“ კანონის თანახმად, ჟურნალისტებს ინფორმაციას უწყებების პრეს-სამსახურები უნდა აწვდიდნენ. ისინი მოთხოვნაზე პასუხს იმდენ ხანს აჭიანურებენ, რომ ინფორმაცია აქტუალობას კარგავს, ხოლო უწყებების ხელმძღვანელებთან დაკავშირების მცდელობისას ისინი კანონს იშველიებენ და ჟურნალისტებს ისევ უკან, პრეს-სამსახურში აგზავნიან.

მედია-პორტალმა „ეხო კავკაზა“  ამ პრობლემის თაობაზე რამდენიმე აზრს მოუყარა თავი;

იური ბეტეევი, ინტერნეტ ვებგვერდის „ალანიაინფორმ“-ის მფლობელი:

„ხელმძღვანელ პირებს არ ესმით, რომ თავი არ უნდა წარმოიდგინონ პატარა მეფეებად, რომლებსაც მიაჩნიათ: ეს ჩემი ორგანიზაციაა და რასაც მინდა, იმას ვაკეთებ. სინამდვილეში, რაც მეტად ხელმისაწვდომი იქნება ინფორმაცია, მით უფრო ადვილი გახდება საზოგადოებაში არსებული დაძაბულობის მოხსნა. ჩვენთან ორი სახალხო პროტესტი ჩატარდა, სამოქალაქო აქციები, და ასეთ მოვლენებს სახელმწიფო ტელეარხით თუ გადმოსცემენ, საზოგადოებაში უფრო ნაკლები კითხვა გაჩნდებოდა – თანაც, არხისადმი ნდობა გაიზრდებოდა“.

პარლამენტის დეპუტატი ამირან დიაკონოვი მიიჩნევს, რომ შექმნილ სიტუაციაში ჟურნალისტები თავად არიან დამნაშავეები:

„უბრალოდ, იცოდეთ თქვენი უფლებები და მათთვის იბრძოლეთ. აიღეთ კანონი და ჩინოვნიკებს წინ დაუდეთ. უთხარით: ვალდებული ხართ, რომ ეს ინფორმაცია მომცეთ, თუ არადა, კანონის შეუსრულებლობისთვის მოგიწევთ, პასუხი აგოთ“.

ექსპერტის, ალან ჯუსოევის თქმით,  ჟურნალისტებს უნდა ესმოდეთ, რომ ინფორმაციის მიღების შეზღუდვის ობიექტური მიზეზებიც არსებობს:

„მაგალითად, სასამართლო სხდომა. მისი გახსნილობის შემთხვევაშიც კი – იქ, შესაძლოა, პირად ცხოვრებაზე ლაპარაკობდნენ – პირადი ცხოვრების საჯაროდ გამოტანა კი არავის სურს. ჩემი აზრით, სასამართლოში ვიდეოგადაღება არ უნდა ხდებოდეს”.  

საზოგადოებრივი ორგანიზაციის „ჟურნალისტები ადამიანის უფლებებისთვის“ თავმჯდომარემ ირინა იანოვსკაიამ JAMnews-ს განუცხადა:

„სამხრეთ ოსეთში ორი კანონი არსებობს, რომელთა თანახმადაც, ოფიციალური პირები ვალდებულები არიან, რომ ჟურნალისტებს ინფორმაცია მიაწოდონ. სამწუხაროდ, ეს კანონები მთელი სისრულით არ ხორციელდება. თუკი ჟურნალისტებს ჩინოვნიკებისა და მათი პრეს-სამსახურების წინააღმდეგ ჩივილი მოუწევთ – არცთუ სახარბიელო სიტუაცია შეიქმნება. ჩვენი საზოგადოება პატარაა, ყველა ერთმანეთს ვიცნობთ – მაგრამ, როგორც ჩანს, სხვა გამოსავალი არ არის“.

პუბლიკაციის ტერმინები, ტოპონიმები , აზრები და იდეები აუცილებელი არ არის, რომ  JAMnews-ის ან მისი ცალკეული თანამშრომლების აზრებსა და იდეებს ემთხვეოდეს.  JAMnews უფლებას იტოვებს, პუბლიკაციებისთვის დართული ისეთი კომენტარები წაშალოს, რომლებიც შეურაცხმყოფელად, მუქარის შემცველად, ძალადობისკენ მოწოდებად ან რაიმე სხვა მიზეზით ეთიკურად მიუღებლად იქნება შეფასებული .