სამხრეთ ოსეთის პარლამენტის სპიკერი ამბობს, რომ სოროსის ფონდსა და "კაგებეში" ერთდროულად მუშაობდა

სამხრეთ ოსეთის პარლამენტის სპიკერი პიოტრ გასიევი საჯაროდ მოჰყვა ამბავს, თუ რამდენ ფულს სთავაზობდა მას საქართველოს ხელისუფლება სამხრეთ ოსეთის ახალგაზრდობის გადაბირების სანაცვლოდ, და როგორც ჩაიშალა ეს გეგმები.

პიოტრ გასიევმა სოროსის ფონდში თავისი მუშაობის შესახებაც განცხადა, და განსაკუთრებულად აღნიშნა ის, რომ ამ მხრივ, მთელი მისი საქმიანობა სამხრეთ ოსეთის სახელმწიფო უშიშროების კომიტეტის პატრონაჟით მიმდინარეობდა. გასიევმა ასევე განაცხადა, რომ თავის ამ საქმიანობის შესახებ ის მაშინდელ პრეზიდენტს, ედუარდ კოკოითის პირადად აბარებდა ანგარიშს.

ეს განცხადება დაახლოებით ორი კვირის წინ დაწყებული პოლემიკის გაგრძელებაა.

მარტის ბოლოს ქსელში გაჩნდა ექს-პრეზიდენტის ინტერვიუ, რომელშიც მან არაერთმნიშვნელოვნად განაცხადა, რომ ტატუნაშვილის საქმე სხვა არაფერია, თუ არა ოსეთის ხელისუფლების მიერ რუსეთის წინააღმდეგ  დაგეგმილი  დივერსია. პარლამენტის სპიკერმა ამ ბრალდებებზე რეაგირება მოახდინა და აღნიშნა, რომ კოკოითის განცხადებები მხოლოდ საქართველოს ხელისუფლებას აძლევს ხელს.

გასიევმა კოკოითის სხვა განცხადებაზეც გააკეთა კომენტარი: ყოფილმა პრეზიდენტმა ახლანდელი სპიკერი პროქართულ ორიენტაციაში დაადანაშაულა და სოროსის ფონდთან მისი თანამშრომლობა გაიხსენა.

„ნუ დამადაბალხარისხებთ, მე სოროსის ფონდში კი არ ვმუშაობდი, ამ ფონდის თავმჯდომარე ვიყავი. ფონდის ოპერაცია თავიდან ბოლომდე სახელმწიფო უშიშროების კომიტეტის პატრონაჟით ტარდებოდა, კერძოდ – მისი პირველი მოადგილის. ახლა ამაზე ლაპარაკი უკვე შეიძლება“, – თქვა სპიკერმა.

მან დასძინა, რომ სოროსის ფონდი ყველგან, სადაც ის მუშაობს, ერთადერთ მიზანს ისახავს – „მეხუთე კოლონის შექმნას, რომელიც შესაფერის მომენტს ელოდება, რათა საჭირო დროს ქუჩაში გავიდეს და გადატრიალება მოახდინოს“.

„ჯერ კიდევ მაშინ „კგბ“-ს წინაშე სრულიად მკაფიო ამოცანა იდგა, რომ ეს არ მომხდარიყო და შემდეგი რამ გამოვიდა; როგორც ცნობილია, თუკი არ შეგიძლია, რომ რევოლუციას წინ აღუდგე, მაშინ მას სათავეში უნდა ჩაუდგე. ასე მოხდა ჩვენს შემთხვევაშიც – ყველა ის საშუალება, რაც მეხუთე კოლონის, დამოუკიდებელი ჟურნალისტების ჯგუფის, მრგვალი მაგიდების, ქართველ ახალგაზრდობასთან შეხვედრებისთვის იყო გამიზნული, საბავშვო ბაღებს, საავადმყოფოებსა და სხვა სოციალურ ღონისძიებებს მოხმარდა.

სოროსის ფონდის ოპერაცია სამხრეთ ოსეთში სრულიად ჩაიშალა და ამისთვის შესაბამისი ორგანოების მადლიერებაც მივიღეთ, – ჰყვება გასიევი, – თავად კოკოითიმ კი, მისივე განკარგულებით, არც მეტი, არც ნაკლები, არასამთავრობო ორგანიზაციებისა და უცხოური მისიების საკითხებში, სამხრეთ ოსეთის პრეზიდენტის სახელმწიფო მრჩევლად დამნიშნა“, – განაცხადა სპიკერმა.

ის ასევე მოჰყვა საქართველოს იმდროინდელ ყველაზე გავლენიან პოლიტიკოსთან ირაკლი ოქრუაშვილთან თავის შეხვედრის ამბავს. ეს შეხვედრა სახელმწიფო მრჩევლად გასიევის დანიშვნის შემდეგ შედგა.

„ოქრუაშვილმა 980 ათასი დოლარი შემომთავაზა იმის სანაცვლოდ, რომ ამერჩია ცხრა ავტორიტეტული ახალგაზრდა, რომლებიც საქართველოში სახელმწიფო დეპარტამენტებს უხელმძღვანელებდნენ“, – ჰყვება სპიკერი.

მისი თქმით, თავად მას შინაგან საქმეთა სამინისტროს დეპარტამენტის ხელმძღვანელის მოადგილეობა შესთავაზეს.

„ისინი მზად იყვნენ ყველგან ადგილობრივი ახალგაზრდები დაენიშნათ; როგორც ისინი ფიქრობდნენ, უბრალო ინტეგრაცია მოხდებოდა და ჩვენ საქართველოს ნაწილი გავხდებოდით. ამ შეხვედრისა და იმის შესახებ, რაც იქ ხდებოდა, ედუარდ კოკოითი პირადად მე გავათვითცნობიერე“, – განაცხადა გასიევმა.

მან თქვა, რომ ამ ინფორმაციას საჯაროდ პირველად ამხელს, და ამისთვის „შესაბამისი სანქცია“ აქვს მიღებული.

„საიდუმლო არავისთვის არის, რომ სამხრეთ ოსეთის „კაგებე“-ს უფროსი ან მისი პირველი მოადგილე ყოველთვის რუსეთის „ფეესბე“-ს წარმომადგენელია – და აი, კიდევ ერთი შეკითხვა მაქვს – სოროსის ფონდის აგენტი პარლამენტის თავმჯდომარე გახდა და ეს არავის შეუნიშნავს? და მინდა, ეს საკითხი ამით დავხურო“, – დაასრულა სპიკერმა.

სამხრეთელმა ოსმა პოლიტოლოგმა ტიმურ ცხურბატიმ რადიოსადგურ „ეხო კავკაზას“ ეთერით სპიკერ გასიევის განცხადებაზე ასეთი კომენტარი გააკეთა:

„ვფიქრობ, ის არ იტყუება, რომ „კაგებეს“ მფარველობის ქვეშ მუშაობდა. იმისიც მჯერა, რომ ოქრუაშვილი მას რაღაცებს სთავაზობდა, იმიტომ, რომ არასამთავრობო ორგანიზაციებში თავადაც მიმუშავია, და ასეთი წინადადებით მეც მომმართეს, თუმცა – თანხა გაცილებით მოკრძალებული იყო. მაგრამ, მე „კაგებეს“ მფარველობის ქვეშ არ ვმუშაობდი. პირადად ჩემთვის ამ ინტერვიუში კიდევ ერთი ასპექტია უსიამოვნო.

არსებობს ასეთი გამონათქვამი – „კაგებეს“ ყოფილი აგენტი არ არსებობს. ესე იგი გამოდის, რომ ჩვენს პარლამენტს „კაგებეს“ აგენტი ხელმძღვანელობს? ანუ ის სამხრეთ ოსეთის ხალხს კი არ ემსახურება, არამედ რუსეთის „კაგებეს“(„ფეესბეს“)? რუსეთი ჩვენი მთავარი პარტნიორი და მოკავშირეა. ამაზე არავინ დავობს, მაგრამ, მიუხედავად ამისა, რუსეთის და „ფეესბეს“ ინტერესები, შესაძლოა, სამხრეთ ოსეთის ხალხის ინტერესებს არ ემთხვეოდეს და ეს უნდა გავითვალისწინოთ“.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო