საკონსტიტუციო რეფერენდუმი - ძვირფასი სიამოვნება სომხეთისთვის

საკონსტიტუციო რეფერენდუმის ჩასატარებლად 3,4 მილიარდი დრამი [დაახლოებით $7,1მილიონი] გამოიყოფა. ამის შესახებ დადგენილება მთავრობის 20 თებერვლის სხდომაზე გამოიტანეს.

• სასამართლოს ირგვლივ ატეხილი სკანდალი სომხეთიდან საერთაშორისო არენაზე გადავიდა

• სომხეთის პარლამენტი საკონსტიტუციო სასამართლოს თავმჯდომარის თანამდებობიდან გადაყენებას აპირებს

რეფერენდუმი ხუთ აპრილს ჩატარდება. ის საკონსტიტუციო სასამართლოს იმ ხუთი მოსამართლისა და  თავმჯდომარის უფლებამოსილების შეწყვეტის საკითხს გადაწყვეტს,   რომლებმაც თანამდებობები ჯერ კიდევ წინა ხელისუფლების დროს დაიკავეს.

შედარებისთვის – 2018 წლის დეკემბერში, „ხავერდოვანი რევოლუციის“ შემდეგ, რიგგარეშე საპარლამენტო არჩევნებისთვის სამი მილიარდი დრამი [დაახლოებით $6,3 მილიონი] გამოიყო.

პრემიერ-მინისტრ ნიკოლ ფაშინიანის თქმით, ეს ხარჯები გამართლებული იქნება, რადგან ხალხის თავისუფალი ნების გამოხატვისთვის არის მიმართული.

 „მეტიც, დემოკრატიული არჩევნები ფინანსური დანაშაულების წინააღმდეგ კორუფციასთან ბრძოლას ეხმარება. ანუ, ეს სახელმწიფოს ბევრად მეტი უკანონოდ მითვისებული ფინანსური სახსრების დაბრუნებაში დაეხმარება“, – აღნიშნა პრემიერმა.

 ამ ფულიდან 234 მილიონი დრამი [დაახლოებით $490 ათასი] პოლიციისთვის გამოიყოფა, დანარჩენი – 3,1 მილიარდი დრამი [დაახლოებით $6,6 მილიონი] – ცენტრალური საარჩევნო კომისიისთვის.