პუტინმა და ტრამპმა განსხვავებული შეფასებები გააკეთეს

ჰამბურგში, მსოფლიოს 20 წამყვანი სახელმწიფოს სამიტზე დონალდ ტრამპისა და ვლადიმირ პუტინის პირველი პირადი შეხვედრა შედგა. ეს შეხვედრა დაგეგმილზე მეტ ხანს გრძელდებოდა – ორ საათსა და თხუთმეტ წუთს.

შეხვედრის ერთადერთ კონკრეტულ შედეგად იქცა განცხადება სირიის სამხრეთ- დასავლეთში ზავის მიღწევის შესახებ. მოსკოვში ამას მაშინვე „გარღვევა“ უწოდეს. თუმცა, ვაშინგტონში ოფიციალურმა პირებმა აღნიშნეს, რომ ცეცხლის შეწყვეტის თაობაზე ყველა წინა შეთანხმება დაირღვა.

სახელმწიფო მდივნის ტილერსონისა და საგარეო საქმეთა მინისტრ ლავროვის  განცხადებებიდან გამომდინარე, მოლაპარაკებებზე მთავარი საკითხი იყო ამერიკის არჩევნების პროცესში რუსეთის  სავარაუდო ჩარევა. ლავროვის თქმით, აშშ-ის პრეზიდენტმა „მოისმინა და მიიღო“ ვლადიმირ პუტინის რწმუნება იმის შესახებ, რომ ამგვარ ჩარევას ადგილი არ ჰქონია. თუმცა, ტილერსონმა მოლაპარაკებების შედეგი სხვაგვარად დაახასიათა: მხარეებმა სხვადასხვაგვარად შეაფასეს მომხდარი, და გაუგებარია, შეძლებენ თუ არა ოდესმე შეთანხმებულ პოზიციამდე მისვლას.

ასევე განსხვავებულად აფასებენ მოსკოვსა და ვაშინგტონში სირიასთან დაკავშირებული მოლაპარაკებების შედეგებს. რუსეთის მხარე, რომელიც ასადს უჭერს მხარს, თანამშრომლობაზე ლაპარაკობს; ამერიკული მხარე კი ამბობს, რომ ასადისთვის პოლიტიკურ პერსპექტივებს ვერ ხედავს.

რუსეთისა და აშშ-ის პრეზიდენტებმა ვერც კიდევ ერთი საერთაშორისო კრიზისის თაობაზე შეძლეს რაიმე კონკრეტულ შეთანხმებამდე მისვლა – საქმე ეხება ჩრდილოეთი კორეის აგრესიულ ქმედებებს.

მთლიანობაში დამკვირებლები ტრამპისა და პუტინის შეხვედრის შედეგებს უკანასკნელის ტაქტიკურ წარმატებად მიიჩნევენ, რადგან ის დიდხანს ცდილობდა მიეღწია და მიაღწია კიდეც ამ მოლაპარაკებებს. მაგრამ მისი საბოლოო მიზანი იმ ამერიკული სანქციების გაუქმება იყო, რომლებიც რუსეთის წინააღმდეგ ყირიმის ანექსიის შემდეგ დაწესდა. ამ მიზნის მიღწევა კი საეჭვოა, რადგან პრეზიდენტი ტრამპი, აშშ-ის არჩევნებში მის სასარგებლოდ  რუსეთის ჩარევის ჯერაც გაუქარწყლებელი ეჭვების გამო, თავის ქვეყანაში მძლავრი წნეხის ქვეშ იმყოფება.