ორგანოების ტრანსპლანტაცია საქართველოში. საქმე აღძრულია, დაკავებულია დირექტორი

თბილისში  სამედიცინო კლინიკა „ლანცეტის“ დირექტორი, ფარმან ჯეირანლი დააკავეს. ის  2016 წლის მარტში ღვიძლის ტრანსპლანტაციის შედეგად პაციენტების გარდაცვალების საქმესთან არის დაკავშირებული.

საქართველოს პროკურატურა მას პაციენტებისათვის დიდძალი თანხის გამოძალვასა  და მათთვის   სიცოცხლისთვის ან ჯანმრთელობისთვის საფრთხის შემქმნელი გარემოების შესახებ ინფორმაციის დამალვაში ადანაშაულებს.

კლინიკა „ლანცეტის“ საქმიანობით პროკურატურა  მას შემდეგ დაინტერესდა, რაც  2016 წლის მარტში ორგანოების გადანერგვის შედეგად  საქართველოში მცხოვრები ორი პაციენტი  გარდაიცვალა.

როგორც გაირკვა,  კლინიკამ მათ არაწორი ინფორმაცია მიაწოდა. კლინიკის დირექტორმა 2016 წლის დასაწყისში აზერბაიჯანიდან ქირურგ-ტრანსპლანტოლოგი მოიწვია, რომელსაც  არ ჰქონდა საქართველოს სახელმწიფო სერტიფიკატი არცერთ  სამედიცინო სპეციალობაში, რაც ქართულ კანონმდებლობას ეწინააღმდეგება.

კლინიკა „ ლანცეტი“  სოციალური ქსელით და ტელევიზიით აქტიურ სარეკლამო კამპანიას ატარებდა, თითქოს  კლინიკაში მუშაობდა  თურქეთიდან მოწვეული  სპეციალისტი, რომელიც  უფასო კონსულტაციებს მართავდა.

კლინიკას კონსულტაციისთვის საქართველოს ორმა მოქალაქემ მიმართა.

პაციენეტებს უთხრეს, რომ საჭიროა  ღვიძლის სასწრაფო ტრანსპლანტაცია, რომელიც 40 ათასი დოლარი ღირს. პაციენტებს უთხრეს, რომ ოპერაციას გამოცდილი სპეციალისტების ჯგუფი გააკეთებდა, რომლებსაც ღვიძლის გადანერგვის არაერთი წარმატებული ოპერაცია ჰქონდათ ჩატარებული.

ორივე პაციენტმა თანხა კრედიტით აიღო. მათ ოპერაციები  2016 წლის 3 და 8 მარტს ჩაუტარდათ. ორივე მათგანი ერთი კვირის შემდეგ გარდაიცვალა.

„ ოპერაციის ჩატარებამდე, შპს ,,ლანცეტის“ დირექტორი ფ.ჯ. ვალდებული იყო პაციენტების, დონორების და მისი ოჯახის წევრებისთვის  მიეწოდებინა ინფორმაცია იმ რისკების შესახებ, რაც ახლდა ღვიძლის გადანერგვას და ასევე მოეხდინა მათი წარდგენა  ტრანსპლანტაციის საბჭოს წინაშე და თანხმობა აეღო ოპერაციის ჩატარებაზე, რაც მის მიერ არ იქნა შესრულებული.“ – ნათქვამია პროკურატურის განცხადებაში.

საქმე დიდი ოდენობით თანხის მოტყუებით  დაუფლებასა და სიცოცხლისთვის ან ჯანმრთელობისთვის საფრთხის შემქმნელი გარემოების შესახებ ინფორმაციის დამალვის ფაქტზეა აღძრული, რაც  ექვსიდან ცხრა წლამდე თავისუფლების აღკვეთას ითვალისწინებს.