მუსტაფა ემრე ჩაბუქს საქართველომ ლტოლვილის სტატუსზე უარი უთხრა

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ მუსტაფა ემრე ჩაბუქს და მისი ოჯახის წევრებს ლტოლვილის სტატუსის მინიჭებაზე უარი უთხრა.

ჩაბუქი, რომელსაც ბრალად შეიარაღებული “ტერორისტული ორგანიზაცია” FETO-ს საქმიანობის ხელშეწყობა ედება,  თურქული მხარის მოთხოვნით 24 მაისს თბილისში დააკავეს. მას თბილისის საქალაქო სასამართლოში 25 მაისს წინასაექსტრადაციო პატიმრობა შეეფარდა. ამის შემდეგ ჩაბუქის ოჯახმა საქართველოსგან ლტოლვილის სტატუსი მოითხოვა, რადგან ეს სტატუსი მას დაიცავდა საქართველოდან თურქეთში ექსტრადაციისგან.

თუმცა სამინისტროს დასაბუთებაში, რომელიც გამოცემა “ლიბერალმა” გამოაქვეყნა, აღნიშნულია, რომ თურქეთში ექსტრადირება ჩაბუქისთვის არ არის რისკის შემცველი და რომ  თურქეთის ციხეებში პოზიტიურ ცვლილებებს აქვს ადგილი.

„წარმოშობის შესახებ მოპოვებული ინფორმაციისა და ინდივიდუალური პროფილის შესწავლის საფუძველზე არ იკვეთება იმის შესაძლებლობა, რომ წარმოშობის ქვეყანაში დაბრუნების შემთხვევაში დადგეთ დევნის საფუძვლიანი რისკის ქვეშ”, – აღნიშულია ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს მიერ ადვოკატისთვის გადაცემულ დოკუმენტში.

აქვე ვკიტხულობთ, რომ იმ სასჯელის ზომა, რაც გათვალისწინებულია თურქეთის შესაბამისი კანონის დარღვევისთვის ადეკვატურია და  “ეს სასჯელი ვერ გაუტოლდება დევნას კონვენციური ნიშნით და არ შეიძლება მიჩნეულ იქნას, როგორც არაპროპორციულად მკაცრი”.

ოჯახის ადვოკატმა, სოსო ბარათაშვილმა განაცხადა, რომ სამინისტროს არ ჰქონდა უარის თქმის კანონიერი საფუძველი და ამ გადაწყვეტილებას ოჯახი სასამართლოში გაასაჩივრებს. გასაჩივრებისათვის ჩაბუქს კანონის შესაბამისად 1 თვის ვადა აქვს.

ადვოკატი ჩაბუქის მეუღლესთან თუბა ჩაბუქთან ერთად პრესკონფერენციას 10 ივლისს გეგმავს.

თურქეთის მოქალაქე მუსტაფა ემრე ჩაბუქი თბილისში რამდენიმე წელია ცხოვრობს. ის საქართველოში 2002 წლიდან ეწეოდა საგანმანათლებლო საქმიანობას. იყო დემირელის კოლეჯის მმართველი, ასევე – ბათუმის შაჰინის სკოლის მასწავლებელი.

ჩაბუქის დაკავებას წინ უძღოდა თურქეთის პრემიერმინისტრის, ბინალი ილდირიმის ვიზიტი თბილისში.

დემირელის კოლეჯი, ისევე როგორც ჩაღლარის განათლების ქსელის რამდენიმე საგანმანათლებლო დაწესებულება საქართველოში, ფეთჰულა გიულენის სახელთანაა დაკავშირებული, რომელსაც 2016 წლის 15 ივლისს თურქეთში მომხდარი სამხედრო გადატრიალება ჰბრალდება. თურქეთის მთავრობამ გიულენის მიერ თურქეთში გახსნილ შაჰინის სკოლებზე პირდაპირი იერიში მიიტანა და განაცხადა, რომ იქ “ტერორისტებს ზრდიან”.