მსოფლიო საპატრიარქოს წარმომადგენლები საქართველოს პატრიარქს შეხვდნენ. მთავარი თემა უკრაინა იყო

საქართველოს ეკლესია კვლავ არ ჩქარობს უკრაინის ეკლესიის ავტოკეფალიის ცნობას.

კონკრეტული გადაწყვეტილების გარეშე დასრულდა თბილისში ვიზიტით მყოფი მსოფლიო საპატრიარქოს წარმომადგენლებისა და საქართველოს კათოლიკოს-პატრიარქის ილია მეორის დღევანდელი შეხვედრა.

მსოფლიო საპატრიარქოს წარმომადგენლები თბილისში უკრაინის ავტოკეფალიის დეტალებზე სასაუბროდ ჩამოვიდნენ.

ორსაათიან შეხვედრას საქართველოს საპატრიარქოში სინოდის რამდენიმე წევრი, მათ შორის პატრიარქის თანამოსაყდრე, მეუფე შიოც ესწრებოდა.

შეხვედრის დასრულების შემდეგ საქართველოს საპატრიარქოს წარმომადგენლებმა აღნიშნეს, რომ მსოფლიო საპატრიარქოს წარმომადგენელთა ვიზიტს რაიმე განსაკუთრებული გავლენა საქარველოს ეკლესიის პოზიციაზე არ მოუხდენია.

საქართველოს საპატრიარქო კვლავ თავის აზრზე რჩება – არ ჩქარობს უკრაინის ავტოკეფალიის ცნობას.

როგორც მეუფე შიომ შეხვედრის შემდეგ თქვა, როგორც დაგეგმილი იყო, წმინდა სინოდი ამ საკითხს შემდეგ სხდომაზე განიხილავს, რომელიც გაზაფხულზე გაიმართება. მანამდე კი, საქართველოს საპატრიარქო ამ თემაზე არავითარ გადაწყვეტილებას არ მიიღებს.

„ძალიან მნიშვნელოვანი შეხვედრა იყო. რაც მთავარია, გამოიკვეთა მათი კორექტული პოზიცია ჩვენი ეკლესიის მიმართ, რომ ისინი არ ჩამოსულან იმისთვის, რათა დაგვარწმუნონ ჩვენ, მივიღოთ ესა თუ ის გადაწყვეტილება. ასევე, მნიშვნელოვანი ის არის, რომ ჩვენს აუჩქარებლობას სრული გაგებით ეკიდებიან. ეს მიტროპოლიტმა საუბრისას რამდენჯერმე გაიმეორა”, – განაცხადა მეუფე შიომ.

ჟურნალისტებმა მეუფეს ისიც კითხეს, თი რამდენად ახდენს პროცესზე გავლენას უკრაინის ეკლესიის ავტოკეფალიისადმი რუსეთის ეკლესიის უარყოფითი დამოკიდებულება.

მეუფე შიომ უპასუხა: „სამწუხაროდ, ჩვენთან არის ისეთი განწყობები, რომ ჩვენი ამჟამინდელი პოზიცია ასოცირდება რუსულ გავლენასთან. სინამდვილეში, დღეს თქვენ მოისმინეთ მსოფლიო საპატრიარქოს პოზიცია, რომ ისინიც ეთანხმებიან ჩვენ პოზიციას.“ 

მსოფლიო ეკლესიის დელეგაციის ხელმძღვანელმა, საფრანგეთის მიტროპოლიტმა ემანუელმა ჟურნალისტებს უთხრა, რომ  მსოფლიო საპატრიარქოს დელეგაციის თბილისში ვიზიტის მიზანი იყო საქართველოს საპატრიარქოს ინფორმირება უკრაინის ეკლესიის ავტოკეფალიის შესახებ მიღებული გადაწყვეტილების დეტალებზე და არა “რაიმე აზრის  თავსმოხვევა და ზეწოლა”.

” ჩვენ ვიცით, რომ საქართველოს კათოლიკოს-პატრიარქს აქვს სიბრძნე იმისთვის, რომ მიიღოს ბრძნული გადაწყვეტილება. “ – უთხრა ჟურნალისტებს მიტროპოლიტმა ემანუელმა. 

ფრანგმა მიტროპოლიტმა რამდენჯერმე ხაზი გაუსვა იმას, რომ “ახლა მთავარი არის  ერთობის შენარჩუნება მართლმადიდებლურ ეკლესიებს შორის”.

მისი თქმით,  დელეგაციის თბილისში ვიზიტი არ იყო განპირობებული იმით, რომ მსოფლიო საპატრიარქოს რაიმე უთანხმოება აქვს ქართულ ეკლესიასთან.

“ჩვენ არ ჩამოვსულვართ იმიტომ, რომ საქართველოს ეკლესიასთან მიმართებაში არსებობს ურთიერთობის რაიმე პრობლემა. ჩვენ გვაქვს საერთო აზრი, საერთო შეხედულებები და ეს იყო ჩვეულებრივი ძმური, კეთილი შეხვედრა მოძმე ეკლესიებს შორის“ – განაცხადა მიტროპოლიტმა ემანუელმა.

თბილისიდან გამგზავრებამდე მსოფლიო საპატრიარქოს წარმომადგენლები საქართველოს პრეზიდენტსაც შეხვდებიან.

_________________

უკვე თითქმის ერთი თვე გავიდა, რაც 5 იანვარს მსოფლიო პატრიარქმა ბართლომეოსმა ხელი მოაწერა უკრაინის ეკლესიის ავტოკეფალიის დამადასტურებელ ტომოსს.

ამ დოკუმენტით, მსოფლიო პატრიარქმა უკრაინის ეკლესიის რუსული ეკლესიისგან დამოუკიდებლობა აღიარა.

თუმცა, საქართველო ამ დრომდე არ ჩქარობს იგივეს გაკეთებას.

უკრაინის თემამ განხეთქილება წარმოშვა ეკლესიის შიგნით – სინოდის წევრთა ნაწილი მიიჩნევს, რომ საქართველომ უკრაინის ავტოკეფალია უნდა აღიაროს.

მეორე ნაწილის აზრით კი, საქართველომ ამ მიმართულებით სიფრთხილე უნდა გამოიჩინოს. მათი მთავარი არგუმენტი ის არის, რომ უკრაინის ავტოკეფალიის აღიარების შემთხვევაში, რუსეთი აფხაზეთის ეკლესიის ავტოკეფალიას აღიარებს.

მსოფლიო საპატრიარქოს წარმომადგენელთა საქართველოში ჩამოსვლამდე რამდენიმე საათით ადრე, საპატრიარქომ საჭიროდ ჩათვალა, რომ ამ თემაზე კიდევ ერთი განცხადება გაევრცელებინა.

29 იანვრის განცხადებაში წერია, რომ უკრაინასთან დაკავშირებით “აჩქარებული, წინდაუხედავი ქმედებები სიკეთეს არავის მოუტანს”. 

განცხადებაში ასევე აღნიშნულია, რომ ამჟამად მთავარი ამოცანაა “მართლმადიდებელთა ერთობის შენარჩუნებისთვის ზრუნვა”.

საქართველოს საპატრიარქო სასულიერო პირებს სიმშვიდისკენ მოუწოდებს:

“უკრაინის ეკლესიისთვის ტომოსის მინიჭებამ მთელს მართლმადიდებელ სამყაროში, აზრთა სხვადასხვაობა გამოიწვია როგორც საერო, ისე სასულიერო წრეში. ჩვენთანაც გამოიკვეთა ორი მხარე, რომლებიც ცალ-ცალკე ცდილობენ, ის პოზიცია, რაც მართებულად მიაჩნიათ, ყველა საშუალებით დაიცვან” – ნათქვამია განცხადებაში.