როგორ იცვლება ქართველი მწეველების ცხოვრება? მოკლედ ახალ რეგულაციებზე

საქართველოში მოწევა 2018 წლის 1 მაისიდან უკვე ოფიციალურად თითქმის ყველგან იკრძალება. ძალიან ცოტა ადგილია, სადაც თამბაქოს მოხმარება შესაძლებელია იქნება ჯარიმის გარეშე. ასევე იცვლება თამბაქოს რეალიზაციის წესებიც.

პარლამენტმა თამბაქოს კონტროლის შესახებ საქართველოს კანონში შესაბამისი ცვლილებები 2017 წლის 17 მაისს შეიტანა.

ცვლილებების ინიციატორი საპარლამენტო უმრავლესობის დეპუტატი გუგული მაღრაძე იყო.

სად იკრძალება მოწევა?

მოწევა სრულად იკრძალება:

[no_list]

• სააღმზრდელო, საგანმანათლებლო და საგანმანათლებლო-სააღმზრდელო დაწესებულებებში, დახურულ სპორტულ ნაგებობებში
• სამედიცინო და ფარმაცევტულ დაწესებულებათა შენობებში
• ბენზინგასამართი, გაზგასამართი და გაზგამანაწილებელი სადგურების მთელ ტერიტორიაზე;
• იმ შენობასა და დაწესებულებაში, სადაც ინახება ცეცხლსაშიში ნივთიერებები;
• კაფე-ბარებში, რესტორნებში, სხვა ადგილებში, სადაც ადამიანები იკვებებიან;
• სასტუმროებში (სასტუმროების ნომრების 50%-ში მოწევა უკვე  2018 წლის 1 იანვრიდან იკრძალება)
• სილამაზის სალონებში;
• მაღაზიებში;
• სავაჭრო ობიექტების შენობებში;
• კერძო ოფისებში;
• ქარხნებში, ფაბრიკებსა და სახელოსნოებში, საწყობებში;
• საზოგადოებრივ ტრანსპორტში,მათ შორის, ავტობუსში, სამარშრუტო ტაქსიში, საჰაერო ხომალდში, მეტროპოლიტენში, ტრამვაისა და ტროლეიბუსში.
• სტადიონებზე, რომელსაც ჰყავს ადმინისტრაცია (სტადიონებისთვის გათვალისწინებულია განსაკუთრებული რეგულაცია – მოწევა შესაძლებელი იქნება ტერიტორიის 50%-ზე, მაგრამ იმ პირობით, რომ უზრუნველყოფენ მწეველების იზოლაციას არამწეველებისგან).

[/no_list]

ჯარიმები მოწევის წესების დარღვევისთვის

შენობა-ნაგებობაში ან/და მის კუთვნილ ტერიტორიაზე თამბაქოს მოწევისთვის, ჯარიმა 500 ლარია, განმეორების შემთხვევაში – ორმაგდება;

მრავალბინიანი სახლის სადარბაზოში, სახურავსა და ლიფტში მოწევისთვის ჯარიმა 50 ლარია, განმეორების შემთხვევაში – ორმაგდება;

წესების დარღვევის შემთხვევაში დაწესებულება დაჯარიმდება 500 ლარით, განმეორების შემთხვევაში – ორმაგდება;

საზოგადოებრივი ტრანსპორტის მძღოლი ტრანსპორტში მოწევისთვის დაჯარიმდება 500 ლარით, განმეორების შემთხვევაში – ორმაგდება;

თუკი ფიზიკური პირი საზოგადოებრივ ტრანსპორტში მოწევს დაჯარიმდება 50 ლარით, განმეორების შემთხვევაში კი – ორმაგდება.

სად არის დასაშვები მოწევა?

[yes_list]

• კერძო საცხოვრებელ სახლში;
• თამბაქოს კვამლის შემსწავლელ სპეციალიზებულ ლაბორატორიულ დანადგარში;
• პენიტენციურ სისტემაში;
• წინასწარი დაკავების იზოლატორში;
• სიგარაბარში, რომელიც „ლიცენზიებისა და ნებართვების შესახებ“ საქართველოს კანონის შესაბამისად გაცემული ნებართვის საფუძველზეა მოწყობილი
• სამორინეში
• აეროპორტის სატრანზიტო ზონაში, სპეციალურ მოსაწევ ოთახში, რომელსაც უნდა ჰქონდეს ცალკე სავენტილაციო სისტემა და რომელშიც არ უნდა ხდებოდეს საკვებისა და სასმელის შეტანა და მოხმარება.
• სტაციონარული ფსიქიატრიული და პალიატიური მკურნალობისთვის განკუთვნილ დაწესებულებებში და მძიმე ავადმყოფი პაციენტისათვის განსაზღვრულ ადგილებში.

[/yes_list]

უკანონო ხდება სიგარეტის გამოსახულებაც კი

აკრძალულია თამბაქოს მოწევის დემონსტრირება მასობრივი ინფორმაციის საშუალებით, სხვა ბეჭდური ან ელექტრონული საშუალებით, მასობრივი ჩვენებისა და თეატრალური წარმოდგენის მეშვეობით, თუ ეს არ არის შემთხვევითი ჩაწერა ან/და შემოქმედებითი ჩანაფიქრის ნაწილი. გამონაკლისია ღია სივრცეში პირდაპირი ეთერის მიმდინარეობისას კადრში მწეველის შემთხვევითი მოხვედრა.

ასევე შეუძლებელი იქნება მოწევასთან დაკავშირებული რაიმე აქსესუარის ან ნივთის ლატარეაში გასათამაშებლად შეთავაზება.

სიგარეტი  ყველა ვიტრინიდან და დახლიდან გაქრება, ისე რომ იგი ხილვადი არ იყოს შესაბამისი ობიექტის გარედან.

იკრძალება თამბაქოს გაყიდვა ელექტრონული ან მექანიკური მანქანის საშუალებით.

იქ, სადაც სიგარეტის გაყიდვას დაუშვებენ – ოღონდ დახლსა და ვიტრინაში ყოველგვარი დემონსტრირების გარეშე – გამოიფინება დიდი პლაკატი, რომელზეც წარმოდგენილი იქნება კანონმდებლობით დამტკიცებული სამედიცინო გაფრთხილება და  თამბაქოს მოხმარებაზე უარის თქმის მსურველთათვის საკონტაქტო ტელეფონის ნომერი კონსულტაციის მისაღებად.

JAMnews-ის გამოკითხვა ნინოწმინდაში – რას ფიქრობენ ადგილობრივები თამბაქოს მოწევის აკრძალვაზე

კიდევ ერთი გამოკითხვა თემაზე ” მოწევა-არმოწევა”, რომელიც ჩვენ რამდენიმე თვის წინ თბილიში ჩავატარეთ